مسدار دوار

ياناس النمه العندو نمه الينمها هنا

الشم خوخت بردن ليالى الحره

والبراق برق من منا جاب القره

شوف عينى الصقير بى جناحو كفت الفره

تلقاها ام خدود الليله مرقت بره

تعرف لى مشاهيد الرقاد والفره

فلاخ المصب بيهو بتبين تتوره

فوق حيا فوق محل من الصعيد منجره

شاد الله الكريم ما تلقى فيه مضره

اب عراق فتق قرنو المبادر شره

والباشندى عمت مهششيب الدره

من النقره كل حين فوق عليو منصره

ها الايام محاريها القليعه ام غره

قدمت من هنا مبى ضانها سمعت كره

فوق كارتوت شخيتيرا تخين خره

قلاتو الوهاط بى لشغه قبلو محره

يا باسط النعم تسقيها فى ها المره

ياناس الله عاد العندو قولا يقولا
قولولا السمح الشينه لات قولولا
تواضع والجمال والله ما معقولا
الجود والكرم هي الي عارفا اصولا

الشيب والشباب من نظره عيونك داخو
حتي الجهال من ريدك عقولم راحو
فكي الشعر لو مره ادي صراحو
بيشوفا الجريح اكيد بتبري جراحو

بت المن قرين مرقن علي الجبال
وفوق (بيه وبلوس) مابرجن الوبال
صفرا درعتن تتدلى لا البهال
وبيضة شاش قرابيبن تريع البال
*****
مرقن يا مجيب لي جملة السؤال
شاحدك تجمعن من مطبق الحلال
ما ينقص حساب الدرج ولو بي عجال
ونحن نجيب لهن في كل يوم موال
********
من (بيلا) الصباح إتسربقن همال
والدوف فوق حقائبهن كترتو جمال
الخور العطيش بلدا عزاز ورمال
ومدروك ما هو من حر النهار بي كمال
******
قطعن (ودعول) بجرن شفاقي عدال
ختمن مقرح الحربة الجبالها طوال
قلت أمات قرود وردنو بي القبال
وخلقا كيف برمولن دمير حبال
*******
من امات رميلة متركشات لا شمال
وسمعن هدمي لا قدام كرير أضلال
بشلحط بريقن راح يشيل ولوال
تيسن زاعلن باكر مع الشهلال
*****
خلاهن رتوع في بقيل وخرجة نال
لا مت دور الوادي السرى سيال
فوق قمزوز طلع شاف في ملينو زوال
وقلعة (كو) حفيرها لقالو فيها نعال
******
مطامنات هناك لامن نهارن زال
وشرفن كلهن شمن دعاش اتعال
مابيات البلد دايرات حقو السروال
وصفا متع الغناي قدر ما قال
****
في عاقب نهار سون لهن مرحال
وعينيهن خلقن زرق برا كحال
من كرف الحويل بقين دحين في حال
وديل ليمن على الناس المتلنا محال
*******
جاهن منزقف وقتا عصير وشفاف
وكاسب ليهو بيهن من صدف ما بخاف
ديل الطبعهن دايم الأبد عواف
في نايط السروج لقين بقيلا جاف

ساتي يا اخوي مرورك كتيييييير شرفنا
بيهو امبسطنا وكلامك جمييييييل كيفنا

احمد الفرجونى يحكى ---
عدت من البادية لاجد كلبى الذى اعتمد عليه فى القنيص ميتا على رصيف الشارع غارقا فى الدم الغانى فكاد قلبى ينفطر بعد ان دهسه سائق لورى فانشئت على الفور***

مادوامة ياتمام كيوف الشارع
اصلو الدنيا معدا والمعيشة شوارع
بعد ماكنت سباحا يمينك ضارع
كتلت الليله وادردقت فوق الشارع
*******
ضربك لوري عاد ينشل يمين السايقو
وينعصر النفس وتعوم عليه طوايقو
متل ماتف زورك قندراني يضايقو
ويتفو تفيف ملاحا مايلقى زولا يلايقو

تسلم وموضعك جد عجبني
قاعد بقلب فيهو والزمن سرقني
إلا الكهرباء قطعت وجد حيرتني

والفرجوني عندو قصص كتيره وجميله منها

يذهب الفرجونى الى المحكمة : شيخ المر يجلس على موقع متميز بين قومه يسترعى الحكمة لحل المشاكل : ولا تخطئ عينه الغريب : يامر الصبية باكرامه : قوم ياولد سوط الليمون للضيف . ثم ياتي الصبى بقرعة ماهلة عكرانة بالليمون . وضعها الفرجونى امامه ولم يشرب منها . يقول له شيخ المر : ات مكاجرنا يالضيف؟ قالها عندما مر الوقت ولم يشرب الفرجونى منها . نهض الفرجونى وبدا كلامه للشيخ : والله ياشيخ المر انا مظلوم والظالمنى ات. يقع كلام الفرجوني على الحاضرين وقوع الدهشة . ثم يصيح شيخ المر ظالمك انا؟ ات منو ياخوى وجيت من وين وداير شنو؟
يجيبه الفرجونى بالشعر مباشرة :
جيت من غادى يافارس الشوارق الغر
جيت من غادى ياصفاى الحناضل المر
جيتك وعندى فيك املا كبير يا المر
بدور كلبا من الغنم المعادى يجر
****
ويبدا الفرجونى فى مواصفات كلبه الذى يريده :
مرخرخ شايله واسع ارساغ ولين غر
باهى وريد منيع ليمان وفى عرقوبو لون وقصر
رقيق قدوم طوال اضنيهو ماهن صر
رهيفا جلدو زى توب السواكنى الحٌر
*****
يضحك شيخ المر : كدى اشرب الليمون وبرد جوفك ونمشى البيت نضبح ليك الشايلة وحرم كلبك تسوقو معاك .

ساتي الزعيم الليلخ هزا ورزا
جابلو كلام جميل ثابت وما بتهزا
من مسدرانا هوووي اوعك تجيبلك فزا

رد اهل العوض لمحمد موسي
رسالة بليغة من أهل العوض مخصوصة
للإبن الظريف ود المدن ود موسي
بدور رد السؤال لو باللغة المهموسة
فينا نقيصة ولا الصورة جات معكوسة ؟

جبتا الفتنة تعلن حرب بى جاسوسة
والسبب الفنيلةالقلت في الوسخ مدسوسة
نحن نفوسنا في بحور العفاف مغموسة
مية غمسة لاعار لا دنس لا سوسة

نحنا أهل العوض والعزة ما بنكوسا
أصحاب سمته وأصحاب فرسةً موسوسة
نحنا أنعامنا بتعاف ترتع المعفوسة
ونحن جدودنا عادي بطيعوا الجاموسة

إيانا أهل العوض أهل النحاس أب رنّة
أهل البَدر ة والمهيوب وأهل الشنّة
أهل عزة وأهل سمتة وعروض ومحنة
ناس البادية ناساً عشرتن تتمنى

نحن أهل العوض حافظين عهود ما خناّ
وللجار و العشير بالشينه ما تعجلنا
بيوتنا مسيد ضيوف زمن العدم ما بخلنا
وما بصح الوليد في أعرافنا يجاهلنا

ونحنا أهل العوض والله لاتقينا ولا تبدلنا
واثبين كالأسود من واجبة ما اتماهنا
في البر في البحرتلقانا وين ما كنّا
في قمم الرجال كذب البمِس لى حصونّا

ونحنا أهل العوض في الحالي و الفات كنا
قج شرك الكلا م في مشينا ما بعطلنا
بس بوعيك أكان دقس في أصولنا ومتجاهلنا
نحسب في الجدود ستين ومن غير إنََّ

ونحنا ربّونا الشياب فوق ماما ماتعجنا
حافظين لسان حافظين كرامة أهلنا
أشبال من أسود في ضبعة ما تهجنا
سايرين سير كرام لامن نلاقي اجلنا

ونحنا ذاتنا يا ود موسي ما بواخذونا بي بنولـِّد
و الـما عندو رأي حقو يتبع ويقلد
ولو ما مخـّك المخمودوحسك المتبلد
جامعة موسكو ما جابت دكاترة تولد ! ؟

ما راعيت شعور الناس شعورك فاترة
بتسيء للعزار أهل السيوف الباترة
أَمَانةً تَدخنك شطة ودموعك قاطرة
ما سمعت بالولادة أتخصصولا دكاترة !؟

نحن والله عرب وأولاد عرب لينا الشرف والعز
بنسرح بالرزق نحلب نصـُر ونجز
ويوم الحارة والعركة السلاح برز
ثابتين كالجبال الشامخة ما بنفز

المخسوفة والمرقوعة ياها لباسنا
المجلوبة والمقنية من ميراثنا
الجار والعشير من الكتف لى راسنا
في المال والعروض تخشى الملوك من باسنا

ليه يا ود موسى بتذم الرجال بالعايلة
ما بعشّوا الضيوف تحت السحابة الشايلة ؟
ما سمعت في أم همج كاكوم عقيد الزايلة ؟
ما سمعت بالنمر حرق الخديوي القايلة ؟

لكن لسانك فك يا إبني أصلو مابتستامن
تشحن في النفوس من الغبينة مُداماً
بس سمة المن مثالك في البحر بترامن
العربي إن رقص ألبل قرونن قامن

دحين ياخي رغم الغطرسة بالتمثيل وحبة كاشك
تلقى أصفارنا أكبر من مساحة داشك
شبعانين طحين من الفطير ودراشك
أخير تبعد بخاف من شوكنا يخرب شاشك

ومهما زعمت من عزة ونفخ فشفاشك
أعلم طينّا أنصح من تراب خشخاشك
شوف ليك ناس رخاس تاخد عليهم فاشك
أول غلطة كان تنيتا بنعل خاشك

دحين ياخي اولاد عرب والغير عرب كلهم أخوانك
إحذر واكترث شكل قوافي لسانك
والرمي فوق الجماعة بالتعابير خانك
في نص البحر بتدور تقج صيوانك ! ؟

نحنا نضافنا يا ود موسي مو صابون
نحنا نضافنا فى عروض وشرف مصيون
نحنا نضاف ضراع بالدكري المسنون
طيبين عُشرة ولكن للخصيم طاعون

نحنا سماحنا يا ود موسي مو كريمات ولمعة لون
نحنا ولدنا عاشميق عكس للعرجون
نحنا ناس لينا أعراض بيحكما القانون
سماحة الزول يفرّج كربة الممحون

نحنا دفعنا يا ودموسي ما جركان
ونحنا ما بندفع الجبنة وحليب الكان
ونحنا دفعنا فى النوق أمات سناماً بان
نحنا ضربنا للعوق انفجار بركان

وكان كلمنا يا ود موسي بنقول الكلام حقاني
وكان غنينا بنخت الشعر فى معاني
عزيزين فى النسب من ذلة مابنعاني
نحسب فى الجدود ستين ومن غير عاني

دحين يا غبار الكبرياء المن المعالم حاجب
أحذر منّوا لا ينسيك حقوق الواجب
ومن أمثال تراثنا الفي العرف والواجب
مهما العين تطول مابتعلى فوق الحاجب

وعشان ما نغلط معاك ونشيل النقط من شينك
أوعى تعضعض الناس البوضحوا شينك
هسع وقعت في الحلة ووجب تكشينك
شن ودّاك لشعراء البطانة تشينك

دحين ياخي الطامع في كثيرة الغير قليلتو تضيع
وسيد بيت القزاز ما ببدأ بالجديع
بولاد الحديد القاسي في القطيع
العربي إن حرن وسط المحاص مابطيع

نحن والله لا بنخاف لا بنعاف ولا بنتهدد
لا بنكل ولا بنمل ولا بنتردد
كمان للزول البخون عُشرتنا ما بنتودد
نبقالو البلا في كل فِجَة مَمَدَّد

ياسر أخـــوي في دي بالجـــد قــلبت الهـــوبا

كــــنا طفشـــانين خــليت نفـــوســـنا طـــروبا

كتّر في زين الكلام وأمسح من وجوهنا شحوبا

ياك الدخـــــري وياك فـــارس الحـــــــــــــوبا

تفخـــــر بيك المســـيد أحفــــاد السبحـتم لالوبا

هلا بالشباب فرسان الكلام والحوبه

ســـاتي ابراهـــيم الــزول الـرزين الــراقي

من طـيب الكلام جـود لينا وما تفضل باقي

نضمك كان لذيذ أطربني وزود علي أشواقي

بقــيت أفتش للــكلام كان ألقى بين أوراقي

أغـــريك الســـلام وأرفــق معــاه أشــواقي

سيد احمد الحاردلو

أنحنَا السَّاسْ
ونَحنا الرَّاسْ
ونحن الدّنيا جبناهَا
وبَنيناها..
بِويت ..فى بِويتْ
وأسْعل جدى ترهاقَا
وخلى الفَاقة .. والقَاقا
-3-
تقول لِى شنو
وتقول لِى منو ،
-4-
تَالا أبوى .. بعنخى لَزَمْ
وتَالا اللُمْ..أَبوىْ أوْلبَابْ
وأمى مهيرة بتْ عبودْ
وأخويا المهدى ..سيد السيفْ
والخلى النصارى تقيفْ
هناك ..فى القيفْ ،
-5-
تقول لِى شنو
وتقول لِى منو ،
-6-
ونحن الشينْ
ونحن الزينْ
ونحن العقبه والعتمور
ونحن القِبله .. والقرعانْ
ونحن الشانْ
ونحن النانْ
أتينا عشانْ
نسوى الدّنيا للإنسانْ
تقول لِى شنو
وتقول لِى منو ،
-8-
ونحن الصّافى
والوَافى ،
ونحن الشّافى
والكافِى ،
ونحن الزادْ
ونحن العِينه
والزِيّنه ،
ونحن – يمين – أهالينا
أهلى سرورْ
ووكَتين ينزل المستورْ
تَرَانَه النور
-9-
تقول لِى شنو
وتقول لِى منو ،
-10-
ونحن الجبنه واللبريقْ
ونحن قداحنا سَاوات ضيقْ
ونحن بيوتنا مفتوحاتْ
مَسَاىْ .. وَصباحْ
ونحن وشُوشنا
مطروحاتْ
مَسَاىْ وصباحْ
ونحن السَمحه
والقَمحه
ونحن الطله .. واللمحه ،
ونحن الصِيدْ
ونحن العيدْ ،
-11-
تقولى لِى شنو
وتقولى لِى منو ،
-12-
ونحن عُزَازْ
ونحن حَرَازْ
ونحن هَشَابْ
ونحن قُمُوحْ
ونحن تُمُورْ
ونحن عُيُوشْ
ونحن النيلْ
وَكضَاب – يا زويل – منْ قالْ
إنّك .. تانى لينا متيلْ ،
تقولى لِى شنو
وتقولى لِى منو ،
-13-
ونحن الحَجه والتوبه ،
ونحن الهِجره .. والأوبه ،
ونحن كُتَارْ
ونحن كُبَارْ ،
ونحن – يمين – جُمَال الشيلْ
ونحن – يمين –نَضِمنا قليلْ ،
-14-
تقول لِى شنو
وتقول لِى منو ،
-15-
ونحن مِحايه
نحن طِرايه
نحن فِدايه
نحن سِمايه
نحن حجاب
ونحن اللوحْ
ونحن شَرَافه فى الدنيا
ونحن كِتاب عِلمْ مفتوحْ
على كل البُلودات ..نُورْ ،
ونحن – يمين – مَداين نورْ ،
ووشنا نورْ
تقول لِى شنو
وتقول لِى منو ،
-17-
ونحن الحِنه والجرتقْ
ونحن الزفه والسيره ،
ونحن ..أبشرى والشبال ،
ونحن السَىْ
ونحن الوَىْ
ونحن الرقبه .. والتُمْ تُمْ
ونحن اللَمْ ..
يكون فى الدنيا ..متلنا ..لمْ
-18-
تقولى لِى شنو
وتقول لِى منو ،
-19-
ونحن العَاجْ
ونحن الصَاجْ
ونحن البوشْ
ونحن الحوشْ
ونحن الناسْ
وكتين الديارا ..يباس
وإن درت العديل والزين
تعال يا زول ،
وإن كست الكعب والشين
أرح .. يا زول
-20-
تقولى لى شنو
وتقول لى منو ،
-21-
ونحن السورْ
ونحن الحُورْ ،
ونحن بناتنا محروساتْ
ونحن وِلادنا ضُلالاتْ
ونحن أُماتنا ياهِنْ ..ديلْ ،
وجِيب ورينى زيىِّ منو ،
وتقول لِى شنو
وتقول لِى منو ،
-22-
ونحن فَزَعْ
ونحن وجَعْ
ونحن اليُمه ..واليَابَا
ونحن أريتو بالتَابَه ،
ونحن – يمين – إذا حَرّتْ ،
نخلى..رُقَابه ،
-23-
تقولى لِى شنو
وتقولى لِى منو ،
-24-
ونحن زَغَاوه والعطرونْ
ونحن الدُونَا ..مافيشُ دونُ
ونحن وِلاد مَلك خِرتيتْ
وسَابَ الجرْ
وحجَر السِكه ،
والتاكا ،
وسيّدنا الفى الجبل ..دَاكَا
ونحن – يمين – نضِمنا كُتُرْ
وشيَتنا كُتُرْ
وأسعَل ناس كَرن والطُورْ ،
وأسعَل كَررى .. والعَتْمُورْ
وأسعل – يا جنَاَ – الخرتُومْ ،
وشوف كيفن زعلنا كُتُرْ ،
وشوف كيفن فرحنا كُتُرْ ،
أنحنا الـ للرجال خُوسَه ،
ونحن –يمين – جِنَات موسى ،
-25-
تقولى لِى شنو
وتقول لِى منو ،
-26-
ونحن الدوكه
والضُلاله ، والدونكه ،
ونحن الدانقه ،
والراكوبه ،
ونحن الفَكَه
والشِبكَه
ونحن الحجزه .. والعكَه ،
ونحن الجُودْ ،
ونحن أسودْ ،
ونحن النَانْ ،
حديثنا إذا أرِدتو رُطَانْ
وحين دايرين ..نسوى بَيَانْ ،
-27-
تقول لِى شنو
وتقول لِى منو ،
-28-
ونحن الخَلوهَ والدايره ،
ونحن تَكيه العايره ،
ونحن الضُّلْ ،
ونحن الكُلْ ،
ونحن سبيل غريب الليلْ ،
ونحن صباح مسافر الليلْ ،
ونحن فَنَاجرةَ الدّنيا ،
ونحن حَبَابْ
حديثنا حَبَابْ
تعال شَرِف .. وشوفنى منو ،
وتقولِى شنو ،
وتقولِى منو ،
-29-
أقيف لِسَعْ
وأقيف وأسمعْ ،
ونحن صديرى منضوم ويلْ
ونحن القَرمصيص ..بلحيلْ ،
ونحن التوبْ
ونحن الووبْ
وناس حبوبْ
وناس حَرّمْ
ونحن إذا رأينا كبيرْ
نقيف طولنا ..ونقولْ لُه ..حَبَابْ
ونديه البُكَان ..ترحابْ
ونحن. اليَانَا ديل .. يا زولْ
وتسعلنى .. وتقول لِى منو
وتقولِى شنو ،
-30-
أقيف لسعْ
وأقيف .. وأسمعْ
ونحن التَايَهْ
والاندايَهْ
والزِريعهْ
والعيزومهْ
واتفضلْ ،
ونحن الرايَه مرفُوعه
ونحن الكُلفَه مرفُوعه
ونحن حلفتَ ... مدفوعه
-31-
تقول لِى شنو
وتقول لِى منو ،
-32-
وأما عجيبْ
وأما غريبْ ،
وأقيف لسعْ
وأقيف .. وأسمعْ ،
-33-
أنا الكَعَب البسوى الويلْ
وأنا الزول السَمِحْ ..بلحيل ،
وداير ..منَِّهُمْ .. يَاتُو ..،
تقولى لِى شنو
وتقول لِى منو

شنان العجيب جاب الكلام منظوم
الشعر الجميل عندو راقد كووووم
ويامسدار سيدك وصل وجب علينا الصوم
بحر الشعر شن قدرنا فيهو نعوم

صالح جلال كتب:
سيد احمد الحاردلو

أنا الكَعَب البسوى الويلْ
وأنا الزول السَمِحْ ..بلحيل ،
وداير ..منَِّهُمْ .. يَاتُو ..،
تقولى لِى شنو
وتقول لِى منو

مسدارنا زاد بهاهو بي طلتكم
سال الله الكريم الرحمه تبقي غشتكم
وجودكم شرف الكعب غيبتكم

مرحب شنان سيد الكلام الزين
بي طلتك مسدارنا اصبح زين

مرحب حباب صالح في مسدارنا
جيتكم من بعيد ونارى العلى وقادة
جافا النوم غميد والعين بقت سقادة

قالت كيفن حالو يا قميرية
يبقى عليهو متل العلى حمة عضام نارية
بذّكرنى عند ساعة الهجعة ويقول يا ريا
والا خلاص نسانى وبقيت عندو ما مطرية

كل ما اطراهو يا قميرية ريشات فؤادى يفرن
تقول عقد انقطع يجرن دموعى يترن
قلبى مرات يجر مرات يقيف يتحرن
واحس بى تياب جمر فوق لى عضاى انشرن

يعلم خالقو يا قميرية قلبى بريدو
فكرى معاهو رحل شال المنام فوق ايدو
الشوق العلى زايد تملى جديدو
والريد العلى فات العبار تحديدو

روّحى ليهو يا قميرية واحكى الحاصل
قوليلو الشوق عليك ليل بى النهار متواصل
قوليلو المنام بقى بى السهر متفاصل
قوليلو كفاك نجيع عود لى ديارك واصل

روّحى سافرى يا قميرية والله يعينك
ومن عقب الطريق مولاى يبقى ضمينك
جمّعى في هواك من الشمال ويمينك
لامن توصلى القدار وفيهو بتنوم عينك

الاخ/ ياسر
الاخوة الاعزاء
زاد المسير ووقود المشوار
لكم منى اسمى ايات الشكر
بعد هذة السياحة فى رياض الشاعر الكبير (الحاردلو)وهو شاعرمبدع اسهم شعره اسهاما ظاهرآ فى مسيرة الشعر الشعبى ( الدوبيت) واضف الى ذلك اعتمد الحاردلو الاستعارة فجاء بصور كانها الحقيقة مما زادت شعره ابداعآ.
نالت المرأة نصيبا كبيرا من شعره الغزلى.
من غى ام شليخ شوف جسمى كيف منحول
امسيت فى لهيب نار الحسار مملول
وتغنى ايضا للصيد وبرع فى مطاردته ووصفه.

السيتوها في بعد المــــكانه العاليه
ضاقت الواسعه تب مسخت علي الحاليه
أوهمتونا بي بقـــــجة شلتت باليه
أغريتونا بي كــروشا ملانه بزاليه

الشكــكني في نفسي وأحارَ سؤالي
أنا يا الليله ما شف لـي طرحه تلالي
ما شفت القدل لافـــح تويبو العالي
والاسكيرتو إلا تشوفو فوق بنغــالي

أما العزبه حالا بالمحـــل ذاكرنو
وما تشوف ها الفِقَر قبلك كتير خادعنو
من كترة نجوض البيض ويوت سالقنو
قعدنا وكت نشوف الديك بنخجـل منو

ما تطرى ام وضيب لا حولها شايله الحفه
سنتين في رجاك ودمعها اتصــــفى
عدم البوخه سالها شقــوق ونصها جف
فرقها منك آب كـــدار سجاره وسفه

عاجت الدنيا واتبدل عمـــاري خراب
نكبة حظ وجور أزمـــان ونجما غاب
أغرز إيدي في النعمه واخـــمو تراب
أقول جا القمري يا بيتاي واقبضو غراب

وقال أيضاً في الغزل:
أنا كان عندي والي ولا صاحبي صليح
كان جنزرني ما دام قلبي ماهو نصيح
بقيت في صلاتي اتذكر هواها واصيح
أنم في الركعتين والباقـي اتمو نويح

قريقس قول لو قلبي الليله طاري نديدو
واضحت حالي زي حال المتلت قيدو
لي أمل الرجوع والماضي تاني أعيدو
ولاّ حكايتي زي جمل الطريفي وسيدو

ظِبَيَّا كان بيردن فوق مشارعي ضعنها
ذخيرتو الحيه في تمرة فـؤادي ركنها
علي الماقالو خرتت من وليها رسنها
سينا مساسق النمله المواليه سـكنها

خَتَفِي الحرقصن قـبله ومزنهن رشّ
دغدغ مهجتي وضرع المـوايق بشَّ
ريدتي وحات سبيباً فوق قصارك نشّ
ما خلف لي غير طاعون وروح منقشه

الوقفت قصادي وغمــزت لي عينيها
ديسا كابي لا عند القصار كـــاسيها
الخلاني ارح طول النـــهار باريها
شوف عيني البنات مرات يشاغلن فيها

سماحة البقعه والغوش المـلون زيف
ما بنسوني مريودي الطبيعه ظــريف
حالي الليله من فرق الملمو عـــفيف
حال فرعون بعد ما موسى وصل القيف

آه يا نفسـي من هذا الأذى المـحقون
نفسي سقيمه من العافيه راقــد دون
أنا والله من فرق المـــــتبر لون
بشيل الليل نويح وارجا النهار مغبون

عندك قاهر الجــن والإنس غبيوها
هيبة عنتر الكـــل العرب هابوها
ان سلطت علي أعمار البشر ولوها
ترد الروح بعد مُلاَّكها ما يشيلوها

تواريب ليمنا كل خريف بتبطل كافيه
متين يصدف مسورنا وتفتكرنا الجافيه
نتلقاها بي لهفة قــــــلوباً وافيه
رجلا راكبه في نعالين ورجلا حافيه

يا اب حلق القعاد طولنا فيهو خلاس
لاكين للأسف قاعدين مع اولاد ناس

دفق الحِرته والبكري القلاه المحماس
وهجم اللونو أنضف من دهب عباس

حسن موسي الهمام كلامو قل ودل
في الزين والنعيم الديمه دلو مدلا
مشكورين كتيرانت وود عبد الله

فتحى عثمان عتيق كتب:هلا بالشباب فرسان الكلام والحوبه

حـــبابك فـــتحي وحــباب أخـــو الأخوان

مشـــرّف المســدار والليــلة نورك بان

يابت يارهـــف قـــومي أفـــرشي الديوان

يحردن أمات شلخ كان ما نضبح الخرفان

يا الهمباتة هووووووووووي وين اب حجل واخبارو؟

همــل للفــــــريق وسمعتـــــــه بــــــــاع لي دارو

فــــــي درب العشـــــق كايـــــس دروبــــــو ودارو

او لايـــن شــــــهود سائــــــق هنـــــوك دفـــــــارو

مليـــــــان بالحســـــــان الــــــودرن افكــــــــــــارو

*********

وعكـس الريــــح كمـــان تشهد وشايــلة غبــــارو

نفحـــــــات الشعــــــر وريحــة كمــــــان عبـــــارو

اكــان ناسي القـــديم ااااخوي ومو بتطرالـــــــو

ذاكـرنك دوااااام اهـــــل الفـــــريق باصغــــــارو

*********

فــــــارقت الجميــــع من غيــــر احــــم دستــورو

لا عـــرفنا العشق ؟ لا عــــرفنا شــــن بـــــدورو

يا جيــــلاني خـوي ما قــــت عقــــــب بتــــــزورو

تقطــــع للحجــج وتســــلب سيـــــوفو جفـــــورو

الدرب البجيب كمش القروش مو هين
وما بمشيهو ديك بيوتن اب جليدن لين
الولد البقوم من ام حمد مدين
غصباً عنو يالساحر يسوقن بين

[/quote]

صالح جلال كتب
سيد احمد الحاردلو

نحن الجبنه واللبريقْ
ونحن قداحنا سَاوات ضيقْ
ونحن بيوتنا مفتوحاتْ
مَسَاىْ .. وَصباحْ
ونحن وشُوشنا
مطروحاتْ
مَسَاىْ وصباحْ
ونحن السَمحه
والقَمحه
ونحن الطله .. واللمحه ،
ونحن الصِيدْ
ونحن العيدْ ،
تقولى لِى شنو
وتقولى لِى منو ،

[/quote]

صالح جـــلال الليــلة جـــانا وزارنا

الزول البشوش الكرمو فاض عمانا

معزوم ياعريس اليوم عشاك معانا

تنزل في الدرب !! مالنا ماتت نارنا ؟

من كم دور ومن كم يوم
انا العيني جفاها النوم
شحنه قلبي بالكولوم
أقاوم في السهر بالاوم
وشدة ريدي بلامبير
فرق جهدك .. علي كتير
بعد لمسات حنان الريد
بقت شحناتي .. بالتأثير
ادور في بعدك البؤري
وزي ماجارت ..الايام
علــــــــــــي جوري
اشعه طيفك الحالم تكسر
جوه منشـــــــــــــــوري
عدسات عيونك اللامه
يشع نورن
ياسمحه بنات الحي
تذيد من جازبيتك لــي
تذيد في انعكاسه علي
يالصلاح رجال الفيزياء
شـــدو الحيل
خوتكم تكون نافعه
وقوتكم تكون دافعه
ودعواتكم تجينا عديل
....
يا امـبير ويا ناس جــول
انا الولهان انا المكتول
وفاقت طاقتي الفين جول
حرارتي الكامنه بالتصعيد
ومـــــــأبيه تذول
انشتياين يجر في سبحتو بالفتون
وياجاليلو بي منظارك الموزون
...
دعيتكم
جمله يالصلاح
تلمو شملنا في ثانيه
واشوف .. السمحه متفايه
شايل الكاميرا في يدي
عشان مالتقط صوره
اشعه وجنتك
تسقط
علي
حدقاتي مكسوره
وشامه خدك الوردي يشع نورة
اقيفي موازيه لي قلبي
ورجاي ماتقيفي في البؤره
عشان صورتك تكون واقع
وماتكون لي خياليه
علي
محور
رموش
عيني
وقفته تكون عموديه
ومن مركز تكور حبنا الازلي
اشوف صورتك حقيقيه
واقطاب ريدنا تتجازب
بوحدات مغنطسية
واسال ربي
يالسمحه
مع الحركه الجزيئيه
نعيش في فرحه
ننسي الناس
ننسي الدنيا ننسي الكون
تكون كلماتنا بالفوتون
واشعاعاتنا بالنيون
وعزم القوه لينا عيون
والوان طيفنا الفيم لون
اختف الكتروناتك
واهديك انا برتون
نعيش في زره متعادله
ننســـــــــــي الدنيا
ننســـــــي الناس
ننسـي الكون

حسن موسى كتب:الدرب البجيب كمش القروش مو هين
وما بمشيهو ديك بيوتن اب جليدن لين
الولد البقوم من ام حمد مدين
غصباً عنو يالساحر يسوقن بين

ود موسى الوجـيه كلامـو واضـح وبيّن

في طبعــو هادئ وعابــد للإله مـتديّن

أخــو أخـوان ويوم الحـارة تب مو هيّن

شـيّال التقـيلة ومسّــاح دمـــوع الببكن

ياك ابو رهف سيد الكرم في الدار....تب مغروسه فيك من قمت في القدار.

يا ساتي الكريم ما بنعزم في دارو....حتي المنتدي ضويت لي مسدارو

ياسر يا الكرم يا صاحب المسدار...اب قدحا كبير الزي جبل قدار.

تقبلوا تحياتي

مانى التنبل البقول سويت
وما نهرونى عن ساعة السؤال قريت
ان حرن بكار ما هن صفائح زيت
وان بردن نقود مانى البخيل صريت

قال الشاعر:-
شبه في البتارين بعناية مقزز
وخصرك طى حجاب وعنقك طويل ومحزز
الجرحو غور بيّ لا إنفتق ولا نزز
وينو ويني حتى طيفو البزورني تعزز
وقال آخر :-
سُوق أم قجة بالحدبات بدور ولداً في الراس ضربو ممرن
يا المسدار خالك ضارس سيفو يجز الدرع الحديدو مقرن
تور عنزاً مرياح محندد قرنو باعج عنتيل الأسود الكرن
فوق الدبال راكز كان خاب ما بترضى أم عِقصاً جرن

قال الشاعر :-
الزول أب وجيها قمر تسعه زايد خمسه
شهانى المنام من خمسه لاعند خمسه
السبب الملخبت لى حواسى الخمسه
حبى للزول السكونو شارع سته ناقص خمسه

وقال آخر:-
بعد الليل سجا ونجماتو ظهرن وضون
زار طيف الحبيب غير حياتى ولون
الزول القبيل من خالص الجمال اتكون
مبيتنا الليله عندو رب العباد ان هون

ودشوراني:-
يا ياقوتة الحضرى الحضارمى زبونك
عازة وغالية طلعن فى التريا تمونك
عاليا ارداف ضامرة هاف وقارن نونك
انكال بالجمال لامن دفق ماعونك

يا تمرة كريمة القاد سبيط عرجونك
لو كان امنوك زاهد الدنيا بخونك
معلومية الذكاء فيها ماهرة فنونك
ربى كساك بالهيبة وصدر قانونك

يا فوسيبة الوادى الروايا مرونك
حب المنقة والانناس حلاتك ودونك
محال ما بتمتعى الحى بهواك وشؤنك
مهوس بيك وقلبى عليك وبقيت مجنونك

قمر السبعتين نورك مضوى دجونك
يقل ويقفد الحيا والصبر مسجونك
واعى الناس يضيع ما بين قسام وهونك
كل المالى مركزو صار قتيل مسنونك

عودتك قامته مربوعة وكحيلة وجونك
خدك دكن الشف والفدى الفى اذونك
ديسك كابى خمر وصندلية دهونك
ماهو غريب على لو كان ساهرنبى طعونك

مختار هو النشاك ورعاك وصف ذهونك
ماك مسيومة فى الاسواق منيعة حصونك
كتير من عاش مدهور وعلقنه ظنونك
نحن برانا ما بختانا سوط عربونك

ظبية عنس الريل المجازى هنونك
جنيبة خيل قيافة ولابسه والكون كونك
يا اميهية الصيف فى خلاك وبقونك
باب ليمك عرج واقف غفر كركونك

ها الايام على مقطوع سلك تلفونك
وقلبى المبلى رتبتيله ميدان قونك
ما دام انتى حاملين السلط فى عونك
ظلمك لى مقبول بالحريص كردونك

يا سجاعة الليل الملولحه غصونك
فاقد سمحه كان ما زاد عليك مو دونك
وين يا جريعة النحل اللذيذ مشنونك
كبدت نوق مسارى ومطرك ليمونك

يا لولية الغواص صعيب مخزونك
قفل واختفى ومنع المودة حزونك
قمح القجة شركه وضحى بمليونك
عسى اوجد لماك واسعد واكون ممنونك

لك الشكر ياسر على هذة السياحة فى ربوع البادية.
وشوف الكلام السمح دى فى السمحات والشجاعة والرجولة والفخر.

انا تمساح فداسي الكسرو مابتجبر
وانا البلا الحرق الشجر بعد ما خدر
انا كان حرامي ماني حرامي هدوم
وبختف ناس ام قجه بين الدالي والمزموم
وقال احدهم يواجه عقوبه الاعدام
يا حاضرين وفاتي الجته اتوصوبا
الروح ازعجت ناجت بقت مطلوبه
تلغراف يودي خبرنا للمحبوبه
لا اسف علي الدينا ودي في الجبين كتوبه

[b]وقال واحد في حب البنات

الليله الصعيد جاب الهبوب من جاي
فوق للفرع تلب جنا القوقاي
مرضان البنات ما بنفعو اللولاي
والدخل القبر ضايق الهبوب من لاي

الناس بالمكارم والفعال بتباهو
زي الفطرة ينشا الزول حسب مرباهو
عادة جدو عادتو ونحل ابوه نباهو
يلبس ثوب قبيلته ان دارو ولا اباهو

الولد البخاف من القبيلة تلومو
بخلف ساقوا فوق تيساً رقيق قدومو
اما يجيب رضوه البهم البينقر فومو
وإما تخامشن قدح الرماد حرومو

سلام يااهل الدار
كل مااقول ادخل علي المسدار
تخذلني الجهاز المسمي الفار
داير ادخل واقول اشعار
وفي سوقكم ابيعلي شمار

اول بادي لي تذكار
ماتنسو الليالي العشرة والاذكار
وصيام يوم عرفةللذنوب كفار

وارجع علي السدار واجدعكم بي واحدة

يقول احدهم:
الليل والنهار واحد علي العميان
واللوم والشكر واحد علي السجمان
عز الراس دهن عز القرب قطران
عز الخيل لجم عزالحريم وليان

من مسرحية عرس البشير التي يقول مطلعها :
وكت الليل برد والكون صمت كالعادة
وتلمت نجومو الكبار وقادة
وكل زولا سوا ايدو وسادة
وقلوب العاشقين بعاد تتلاقي

ودمتم بخير

خال فاطمه الزول الاصيل في طبعو
كلامك سمح ما شانو زولاً سمعو
شب في بيت التقي كل رفايقو وربعو
مولاي يا كريم ثني وزيد في ورعو
مسدار دوار 60948

ياسر الأصم حيـّـاكَ ربّ التوبة
مرحبتين حباب أشعارك المسكوبة
دة البوست التمام في ضُلّو نقلب هوبة
ومن طيبة غُناك سمّعنا دُق النوبة
سندان الرجال في الحارة ماملعوبة

كلامك شفا الحزانا يتعزوبا
رضيت النفوس فرجيت ليها كروبا
في مسدارنا اقدل وعدلنا المخروبا

ود أبوزيد قـدل وأحــترنا نحنا معــــاه

الإبداع شعارو وين يمشي يمشي معاه

كان دخل المنتدى الناس تقــيف ترجـاه

وكان غابلو فــد يوم كل الخـلق ترجاه

سائلك يا كريم التوفيق يكون في خطاه

مرحبتين أكيد حيـّاك أخوي (شنان)
وأهلاً بيكَ في الضل اليساع الناس
ياسر مجتهد لكن أخوك عوّاس
وياريت ماتغيب وتكون من الجـُلّاس
راجل ود رجال حشاك مانسناس
اقدل ياكنار ديمة مرفوع راس
.

سلام مثني وثلاثة واربع
من خال فاطنة وللجميع يتفرع
المسدار جميل والكل تفنن وابدع
صورت الجميع في تلة او في مشرع
في همبريب والقمره نوره بيسطع
من الحردلو جاب ياسر درر تترصع
شنان ياهمام في شعره حاكي الاصمع
ود عبد الكريم بي نمو اجهش وادمع
ودابوزيد قدل في سوق عكاظ واتضرع
صالح ود جلال من ذهب المسادير وزع

فتش منتدانا واحة وظلالها وريفة
اقلام بي بفهم تكتب يزيد تشريفها
ياسر حادي قائد المسيرة وسيفها
خال فاطمة كونترول لي حاضرها وارشيفها

صالح بفهم يكتب حروفه معاني
فتحي ودعتيق ودالمسيد ارواني
عبد الكريم يكتب للبعيد والداني
اخوي شنان في الغربة جد بيعاني

ادخل منتدانا تلقي البساط مفروشة
جدران من علم ذوق واحترام معروشة
في كرسي الرئيس تلقي الشباب مدروشة
وفي فشة خلق الرااايقة شيم منكوشة

مرحب بالضيوف الجيتو غير تسجيل
تقروا وتطلعوا لا كتابة لا تعديل
بدل الجهجهة والفرجة نص الليل
احسن سجلوا,,,تقروا وتكتبوا عديل

من خريج حروف تكشف تنم عن حالي
لناس منتدانا اصحاب المقام العالي
مشكورين كتير فشيتوا خلقي وحالي
مرات بي فهم مرات تقلبوا تسالي

عذرا للي غاب سهوا سقط من بالي
او اسما غريب يصعب يخش موالي
مستر ياسر اخوي لازمآ تجيبوا سؤالي
الموضوع مثبت ولا الرصيف طوالي؟

ياسلااااااااام
إيه الإبداع دا وإيه الحلاوة دي
خال فاطنة / محمد ابوزيد
يسلمو الأيادي
يعطيكم العافية
ودمتم ،،،

محمد الكلام صار اكبر من مستوانا ولانجد كلمات لنعبر لك عن مدي استمتاعنا ونشوتنا وفرحتنا عما خطه اناملك ولو صرت اكتب واكتب واكتب الا ان يحين الاجل ولو بحثا في قواميس اللغه العربيه عن كلمات نصيغها لتبين لك مدي اعجابنا و وروعه كلماتك لا ما استطعنا ان نوفيك حتي ولو بالجزء اليسير النادر القليل من حقك لا يسعنا الا ان نقول لك واصل ابداعاتك يا مبدع ياعجييييييييييب

وجوابي هو ( حرم انثبتو اكراماً لكلماتك)

إيه ياشباب المنتدى نورتو البلد وزدتو فى تشريفا سايل الكريم ان نجمعنا معكم وحقيقة اسعدنا مداخلات
الشباب وصرنا نملك رصيدا ضخما من الادباء لك التحية ياسر &شنان &الود الزينة عسق ابوزيد وجاري العزيز خال فاطنة *وودموسى والمهندس صالح والعريس ود ساتى &وساتي ابراهيم وكل الشباب مسدار دوار 176464

خال فاطنة كتب:سلام مثني وثلاثة واربع
من خال فاطنة وللجميع يتفرع
المسدار جميل والكل تفنن وابدع
صورت الجميع في تلة او في مشرع
في همبريب والقمره نوره بيسطع
من الحردلو جاب ياسر درر تترصع
شنان ياهمام في شعره حاكي الاصمع
ود عبد الكريم بي نمو اجهش وادمع
ودابوزيد قدل في سوق عكاظ واتضرع
صالح ود جلال من ذهب المسادير وزع

شفتو البدر في سماه وكـتين يســطع

شفــــتو النجــوم تتلألأ كــيفن وتلمع

شفـتو خال فاطنة الليلة كـــيفن أبدع

من العــسل جـــــود لينا لا من نشـبع

مكانك في العيون وفوق قلوبنا إتربع

المبدعون شنان؛ محمد؛ ابو فاطمه؛ ساتي ؛ حسن موسي؛ صالح نفارق الابداع شويه
ونديكم شويه من المنقول الي ان يجود قريحتكم بالروائع

عكير الدامر فى وصف الدنيا

سرورك ما بتم عاقباهو ديــــمة الفجعـــــــة

وظاهرك ليـــــنا سكر الا طعمك وجعـــــــة

كم طفشتي مرتــــــاح وقلبو مابي الهجعــــة

روحو تشابي وانت قطعت خـــط الرجعــــه
.....

تقابلك عروس تعشق معانــــي رقيصـــــــه

تملاك بالمحبة وتمشي نازله نقيصـــــــــــه

ما يغريك دلاله وتوب جمال بلقيســــــــــــه

عاين للقبور وبعدين سماحـــته بتقيســــــــه

...

بتقابلك جنينة تمتعك بي ثمــــــــــــــــاره

وترقد في امانا وتنهمك بعمـــــــــــــــارا

باكر تبقى ليك حنضل تشوفو دمــــــــارا

تسحب منك .... وتدق مسمـــــــــــــــاره

...

زولاً شاف رقاد العبروهو مشبــــــــــــر

والزول البرص فى الطوب ووشو مغبر

إتأكد دة بكرة مصير غير إتكبـــــــــــــر

إنسى الموت والمــــال والبنون إتبتــــــر

...

دى الغدارة دى الحقارة دى العقـــــــارة

كم قلبت زغاريد عرسه بي نقــــــــــارة

أعلِنا بالحرب قبال تشب الغـــــــــــــارة

وقبل الروح تغرغر وتبقى في الغرغارة

...

إتغشينا بي حبك لبسنــــــا عبايــــــــــــة

يا موية الرهـــــاب الما ملت كبايــــــــة

عجيب يا دنــــيا أمرك الا نحنا غبــــاية

عاشقين الجمــــال في لمعة الحربايـــــة

و ليتنا يا اخوه نطبق قيم الاجداد السمحه

أنا التوب العشارى الـباهـى زيقو
وانا الدابـى إن كمـن لـلزول يـعـيـقـو
وانا فـراج الــرجال وكـتــين يـضــيقو
وانا الـمأمون على نـسوان فريقو

راسك شيلو فوق ات يا ولد ما هين
وجدك فى الرجال اجواد وفارس ودين
اختك فى البنات معروفة عرضها صين
وات فارس هلالا فى المعارك بين

نحمدك يا كــــــريم الواهب الأنعـــــام

يــــوم العيد دغــش تب البشارى وقام

على أرض الشمال النّاسا ديمه كــــرام

أشوف فوسيب الجروف الساقنو بالأنغام

شقيــــت من الجبال بى الما بعرف الوقـــــفه

زايد فى الخبيب وجـــلدو زايــــــد الــــرجـــــفه

التفاتيش والحميد التمتــــام ليهـــــا إتقــــــــفه

وسط العتـــامير شفتا سلوك الكهربا المتردفه

***************

جيـــــــت ملتــــــقى طــرق المنهم طـــــــولنا

وبـــان النخــــيل بانـــــت رواســـــى أهـــــلنـا

وادى المــــلك عنيـــــــتو من الملتقى إتسهلنا

غـــدانا عِــــــن خـــال ساره بى خرافو ما مهلنا

******************

حبـــاب وســـلام وسط الجميليـــــــــن خلقــــــه

وبقـــت فيـــــنى نار الذكـــــــريات منطلقــــــــــه

ملفـــــــوف القــــــوام عند الضميــر منطفقــــــه

عابى صـــــــديره رمانا المعــــــمر طلقــــــــــــه

منقوووووووووووووول