ملحمة عشق طه وريا

هذه المساهمة منقولة
طه ... وريا ملحمة عشق من التراث السوداني النبيل تجسدت فيها مجموعة من القيم الراقية الأصيلة ... الشجاعة .... الكرم .... النجدة .... المروءة ... ممزوجة بعاطفة نبيلة وود جارف ....
الشاعر ابراهيم العبادي من شعراء منطقة البطانة ..تلك المنطقة التي اشتهرت بفن الدوبيت والمسادير هذا الفن الذي اثري الادب السوداني ...

مشهد أول :

طه يفخر بنفسه ويحكي "لحبيبته " ريا عن حلم مفزع شاهده في منامه يخشى أن يتحول إلى واقع ...

طه:
أخوك يا ريّة أخوك وكت الخيول يدبكن
اخوك يا ريّة أخوك وكت الرماح يشبكن
أخوك جبل الثبات وقت القواسى يحبكن
كم بكيت وكــم قشيت دمـوع الببكن

ريا يعجبا الكلام و تسأله بلهفة ...
ريّه:
وراك أسـود علىّ ... ما نمت أسـع طيب ؟

طه:
هه.. بسم الله قـــولى أخــوك طيب طيب
شديد وحاضـر ... وقلبوُ ماهـو مغـيب
إلا الشفتو فى النـوم من هوايلو يشيب

ويمضي طه ساردا تفاصيل الحلم ...

الزول فى الصُحا مخدوم عليهو شقاهو
وإن غمد شويه تجى الهموم لاحقــاهو
الصف أب لبوس أنا ما بخافو لقاهو
يا ريت الحلم فى صحاي كان بلقـاهو

كان خير ولاّ شر برجاهو ما بهـم بـالى
وحارسني الثبات من الكبـار قُبّـــالى
وكت حســع صحيت وشفتك قاعدة قِبَالى
إن إتلخبت الكـون تـانى مـانى مبـالى

(ريا تحاول التخفيف عنه ومحاولة القاء اللوم على "نومة العصر" ذات الهواجس .. )

ريّه:
كعب نوم النهار أمس العصير كت نايمه
رأيت قدام فريقنا اشوف صقـوراً حايمه
كبيرن غـار على من نـومي تبّيت قـايمه
صحيت مهجومه لا مفصل ولا في قايمه
(هنا يحس طه أن حلمه مشابه لحلم ريا ويتوجس خيفة )

طه:
إنتى كمان رأيتى صقور ؟ حكاية غريبة
علامة كافيه ظنيت الحكايه قريبه
هاك من الصحيح الما بتدخلو الريبه
هذي الحله بي عينىّ أشوف تخريبه

قالت رية :
تف الشينه ليه فاجعني ليه يا طه
انت الدغري وانت الكاشفه ياك غطاها
كان الدنيا هادي العقبة تتخطاها
ما بضلل سماها وما ابتشيلني وطاها

(هنا يعرض طه على ريا الذهاب إلى أرض المك نمر ... دار جعل .. خوفا من وقوع مكروه ... ريا هنا قعدت تبكي عندما عرض عليها الأمر )

طه:
ما بفيد البكى وكلامى احسن تنسي

ريّه:
كيف ما ببكى كيف افوت مراتع أُنسي
افقد كل شىء .. عزي .. ورجالي .. وأنسي
تطلق فوقى ناراً ... عقباً تقول لى أنسى ؟

طه بدأ يحكي لريا تفاصيل الحلم ....

ريّه:
ورينى الحلم التورك مذهول

طه:
اصبرى لىّ أروق عقد الفكر مبهول
احكيلك شنو الشفتو والله مهول
شفت الوَحَده.. شفت النار وشفت الهول

احكيلك تمام الشفتو ما بتغابا
جايين العصير أنا وانتي من الغابة
سايقالك بهم قدامي بي رقابه
بيناتك والفريق ... اتولعت تقابه

قدر ما نشوف بعيد قدّامنا نلقى حريق
وكت النار ولعت ما شفنا تانى فريق
باصرنا المروق مالقينا لينا طريق
تشكى من العطش واخوك يابس ريق

فترتى قعدتى .. وانا محتار جلست حداكِ
حاقب الدرقة ختيت سيفى فوق أوراكي
وكت بِِِعِد البهم ... لي قسعو قمتي براكي
قسعتي وجيتى ومعاك .. كورة صقور تبراكي

تبّيت بي عَجَل شافنّى جَفَلْن وطارنْ
غابن من عيونى وفى اللعوت إضّارن
ما غابت كتير .. جن يقدلن ويتبارن
قدامن كبيرن ... عايننى وغارن

سلّيت سيفي لاقاهم اخوك يالضامرة
تور عنز أم هشيم الفى المجامع دامرة
سيل تلوي اندفق فوقو السحايب هامره
حجر الصاقعه فرتاق الصفوف العامره

بادرنى الكبير ، ديك استعدن وقفن
مامهلتو طار راسو وجناحيه يرفّن
طارن دَيك .. وكت بي ريشو رقد إتكفّن

قالت رية :
عارض ومات خلاص لي الليلة يمكن عفّن

طه قال لي رية :

نحمد ربنا .... الليلة مات عارِضــنا
وان كان عمروا طال يا ريا كان قارضنا
يلحقوا بي عجل ديش همنا المارضنا
نبدا زواجنا بكرة منو البيجي يعارضنا

بطال البعيش في الدنيا اصلوا غناهو
ان كان مالو راح غير اهله مين يدناهو
سمح الفوق اساس ابواتو تمه بناهو
والزول دون قبيله .. غناه شن معناهو

ما بنفرح بي مال ونقول كفانا ورثنا
نفخر بالرجال في الحارة يبقوا ترسنا
نجمع ناسنا هيلنا من الكبار حارسنا
يحضروا اهلنا فرحانين يباركوا عرسنا

كل بطحاني يفرح بي عرسنا مناهو
ساعة جمعتن ... بيتنا بيتمو بناهو
عذاب عيش العزب يا ريا مر ضقناهو
سمح الزول صبي ... يلد ويربي جناهو

طبعاً ريا ما قبلت موضوع العرس ده لانو ابوها عبد الله المعروف بـ " أب كِبس" ما تم سنه من وفاته والناس في حالة حداد ... قامت قالت ليهو :

دا الاعوج تراهو والشين نهاية حدو
إن شاع دا الخبر بملا الفريق لا حدو
يقولوا ابكبس من دخل ود احدو
فرحوا وعرسو لا موجعن لا حدّو

إن كان في الفريق ماتت مريه ذليله
لي الحول يرفعوا العرس الدخاتوا الليله
خليه ابكبس راجل الرجال ودليلا
إن كان بي قبيلة تعدوا تبقي قليلة

خليهو الكلام وعرسنا في دا الحال
من بالك أمرقو محال والف محال
علي ميتة ابوي لي الليله حول ما حال
نصبح بكره للونسه وبهادل حال

رد عليها طه وقال ليها ...

الموت ما شمت غاية البخود والببرو
والحد والحزن ما جابو زول من قبرو
الزول في الشدايد أولي يلزم صبرو
يترجي الكريم مولاه كسرهو يجبرو

بنخاتر منو الوجعه هيلنا برانا
نحن أهل المصاب والناس عزا مجابرانا
في آخر المُراح دايماً تجي الفترانا
هادا الحد ندوس والناس عُقب تبرانا

بعدين ريا شافت تحسم موضوع العرس ده مع طه وانه لازم يتم السنة كالعادة المتعارف عليها في الحداد فقالت :

الناس بالمكارم والفعال بتباهو
زي الفطرة ينشا الزول حسب مرباهو
عادة جدو عادتو ونحل ابوه نباهو
يلبس ثوب قبيلته ان دارو ولا اباهو

من الليلة حول مضّيهو تاني اتكلم
الدايروا بيتم رب العباد ان سلم

رد عليها طه :
تاني امضّي حول وانا بالحسار اتألم
علي حكمك صعب انا قابلو ما بظلّم
نستني السنة قاسية وصعيبه علينا

ردت عليه ريا :
تم الاتفاق من الكلام خلينا
زي عادة البلد لا زدنا لا قلّينا
إن شاء الله السنة بي خيرا عايده علينا

يا طه البهم قرب رجوع سراحو
بنات واولاد ديك ناس فريقنا الراحو
نصيحة سمعتها من الكبار الراحو
قالو العربي ما بنعز كان ما مراحو

وتقوم ريا فايته علي الفريق وطه يعاين فيها وهي ماشه ويقول :

ياليت السعادة ان كان وقت ايدية
كنت اعيش غني في الدنيا بالزنديه
علي حَكَموا ناسي الفي اخذوا الديه
اموت بالعطش والمويه بين ايديا

اه يا رب ارحم صبري امسى ضنين
يمحق دي السنه ربي الحليم وحنين
يخصمه من حياتي رضيت بعشرة سنين

أثناء ما ريا راجعة قابلت ود دكين ومعاه خمسة من العرب وهي داخله علي الفريق في مشهد يفسر لها الحلم الشافتو هي والشافو طه ... طبعا ود دكين زول فارس ... وسامع بي ريا وياها زولتو ... قام واحد من العرب المعاهو ناداها :

بالضيفان تمري ... لا سلام لا كلام
صدقوا اهل المثل : توب العرب صح لام

ردت عليه ريا :
حبابكم عشرة ومن دون كشرة والف سلام
يا وجوه العرب المتلي ما بتلام

انا بت الرجال اهل الدرق والسيف
بت الما بهم بي حساب الخريف والصيف
بت البحجو لى المرقوب بكرموا الضيف
انا ريا ... كان شفتكم افوتكم كيف ؟

قام العربي قال ليها :
من وين في الاهل كفاك فخر يا بنية

ردت عليه ريا :
انا بت البيوت المن بعيد معنيه
بى فوق السما نفوسنا وبيوتنا حنيه
انا بت ابكبس في النسبه بطحانيه

قام رد عليها ود دكين طبعاً عرفها انها هي زولتو زاته فقال :

عبد الله ابكبس عز البطانه وفخري
في راس العرب بنعدّ ماهو الوخري
كريم وهميم كان للقبائل دخري
بت شيخ العرب هيلك صحيح تفتخري

توقد نارو ديمه الما بكوس الجمره
وفي الضيفان يهوش سكينو دايماً حمره
بي كاس ما عبر لبنو بيجيك بالعُمره
هيلو الشكرة هيلو العزة هيلو الإمرة

المرحوم ابوك كان للقبيله غطاها
عزك قديم عمك حسين ابو طه
ان شاء الله اخوك دي السكه ما تخطاها ؟

بقصد بيها ود عمها طه يعني هل هو في مكان أبواته

فردت عليه ريا قايله :
كما يسد مكانن قدموا ليش يوطاها

يعني ماشي في الواطه ليشنو غير إكرام الضيف وإغاثة الملهوف

لا يفوت ولا يموت الساحتو يوت مغشيه
تقابة الفريق يوقد صباح وعشيه
زايد في الرجال طالق قفاي ووشيه

رد عليها و دكين :
ما دخل التراب البركه في الذريه
والخلاك وراهو ما بقولوا مات يا ريه
دايما في القبائل سيرة ابوك مطريه
بيكي وبي اخوك تزيد ودي المحرية

قام واحد من العرب داير يعرفا انه ده شيخ العرب ود دكين فقال :
ما بتسألي لا من وين ولا وين ترسو

قالتلوا ريا في ذكاء واضح :
كيف العربي يسأل ضيفو كيفن تنسو
أول بكرموا ويخابروا ساعة أنسه
من مقلب حديث يعرف أبوه وجنسو

فرد عليها العربي :
عملتي حسابو ضيفك وكرموا وجبتيه
يخجل كان سألتي وإسمو ما عرفتيهو
إسم شيخ العرب سامعابو ما شفتيهو

ده خريف البطانه المالو فيها مشارك
هيلوا السارحه .. هيلوا الصاهله .. هيلوا البارك
ما وقع لك كلامي ساكته لي شنو خبارك ؟
فخرك ود دكين جاك في فريقك زارك

ردت عليه ريا :
اهلا حبابو العزو ماهو لفايه
اب ناراً تولع للضيوف دفايه
بي شيخ العرب الإفتخار ما كفايه
تابعو ان جانا نجري ونخدمو حفايه

رد عليها ود دكين :
بارك ربي فيك عقلك يدوم يا ريا
كرمك ماهو كلفه دي طبعتك فطريه
إياك بت التلوب والسمته فيك محريه
قديييم فوت البطاحين عزه للشكريه

في الوكت دا جاء طه ولقاهم واقفين ..فقال :
مرحبتين حباب مرحب خريفنا الزارنا
حباب شيخ العرب اتشرفنبوا ديارنا
حباب راس العرب البيهو كل مدارنا
تنزلوا في الدرب مالنا .. ماتت نارنا ؟

رد عليه شيخ العرب :
حباب طه الضرس والفي الصهيباب راس
الجود والكرم هيلك قديم ميراس
نارك ما بتموت يا ولده الفراس
قاصدين أم شديد ومعانا عوجة راس

رد عليه طه :
لعدوك العوج يا الفي الكبس سراي
راسك ما بدوش مليان رجاله وراي
باكر لي ام شديد اركب معاك براي
يا شيخ العرب لاكين تختوا كراى

طبعاً شيخ العرب ما فهم كلمة "كراى" دي فقال لي طه :

هادي الشورة يا طه الغلبني دليله
كل البسمعو القاهو فيك قليله

رد عليه طه شارح ليه كلمة كراي

كراي الدايروا تبقوا ضيوفنا انتو الليلة
ترقدوا في الفريق حتي إن عشانا بليله

رد عليه ود دكين :
مسّكنا الدرب أسرع قوام ما تلعب
دارك ديمه عامره والسمح ما بكعب
يكفيني الوصف لا تشد جمل لا تتعب
وهّدنا الطريق عُقب الوصول ما بصعب

رد عليه طه :
يمين تغشوا الفريق بتفوتوا نحنا مقابر ؟

رد عليه شيخ العرب :
عامر انشاء الله ديمه اياك مرسى العابر
مشطوطين خلاص مسكنا في دريب جابر
نخاف عوج الطريق منو لي المقدر خابر

رد عليه طه:
دريب جابر مزم والسكه سالكه ورايقه
فرقان ما بتلاقيك ما بتعوقك عايقه
اخد خاترنا نحنا قالوا واصله السايقه
بتراوح ام شديد باكر زواملك فايقه

رد عليه ود دكين:
الزول ان وعد شين ميعادو يخلفو
في ربط اللسان يسخابو دمو يتلفو
سفري الليله زولين فيهو ما بختلفو
ضروري اصل ام شديده عليْ وعَد بي حلفو

ما بعرف ازوق من نشيت تبيت
فريقكم ليْ فريق وبيتكم يمين لي بيت
اجيك ديناً علي حتي إن بقيت حبيت
هاك وعداُ نجيض ارجانا بكره مبيت

شوفتي انا للفريق ايام بكي ابواتك
ما غابيني حالك سمعت بي نخواتك
فريقك بكره ضيفوا وما بفوتوا وحاتك
إلا أحققك وبراي اشوف نفحاتك

يا ود الهميم النفسو ما معارضاهو
كرم الضيف عليك مكانة ابوك فارضاهو
جاييك في أمُر ان تابا وان ترضاهو
غيرك ما بكوس واملي بس تقضاهو

رد عليه طه :
غرضك مقضي كان احتاج لخيل وجمال
والضان والإبل سارح يمين وشمال

ردعليه ود دكين:
فوق القولتو انا لي فيك آمال

رد عليه طه:
بي دمي الغرض اقضاهو خلي المال

المهم طه زي فهم شيخ العرب داير شنو

رد عليه شيخ العرب:
دي المأموله فيك وين الدرب خترنا

رد عليه طه :
دربكم في السلم

شيخ العرب :
والله تب ما ودرنا
بكره نجيك ان قلينا ولا كترنا

وهنا ودعهم شيخ العرب وسار بي جماعته قاصد ام شديد وعلي اساس في اليوم التاني ينزل ضيف علي طه وقبيلة البطاحين وفي اليوم التالي طلع طه مع ريا منتظرين ود دكين حسب موعده معاهم وفي الحديث قال لي ريا:

في البال لي ضمير شيخ العرب متعوب
قايم نفَسو يختف في الكلام مرعوب
ما خاتيلوا شئ ما شوفتي كيف مرعوب ؟

حمد ود دكين مرتع ديارو وربعو
ده الشئ السمعتوا من الاباه والتبعو
الراجل فعايلو يبينلك طبعو
انا ود الخلا البعرف اسوده وضبعو

ردت عليه ريا :
اعوج كان يخلف الليله ميعاد جيتو
رجال وحريم كل اهل الفريق في رجيتو
قطعوا السارحه كل زول في مراحو سعيتو
كبار وصغار و حتي الراعي خله رعيتو

قال ليها طه :
محال يخلف محال قال جايبو غرضاً عندي

ردت عليه ريا :
كــان غـــــــــــــرضاُ صـــــــــــعــــــــب ؟؟؟؟؟
يتبع

طبعا الجماعة كلهم عارفين إنه ريا لي طه ... وأمرهم مقضي ... رد عليه عبد الله قال :

يفتخروا البطاحين ساحتم راحبالك
لكن ريا امرها مقضي من قبالك
فات فيها الفوات لي طه هادا قبالك
من دون ريا قول الدايروا والفي بالك

دا فريق الصهيباب مافيهو واحده حقيره
مال ، ورجال ، وعز ، في الحله مافي فقيره
كثير الزي ريا مليان البلد من غيره
ان درت السغاروان كان قصدت كبيرة

شيخ العرب ما عجبو الرد .. قام قال :

إن مال الشجر ما بتكسرن فراعو
وقمحان الطلب لي المابجيبه ضراعو
ليه يا أهلنا للبيناتنا ما بتراعوا
القال راسو موجعو بربطولو كراعو ؟

هنا يرتفع ايقاع الميلودراما و"تسخن" الأحداث وتبدأ تتجه نحو الإثارة ..
رد عبد الله محاولا اثناءه عن طلبه ... قال ليهو :

حبل المهله يربط انت ارتاح بيت (بكسر الباء)
بكره نمر سوا ونلفي البيوت بيت بيت
سمي الدايرا ولوم البقولك ابيت

رد عليه شيخ العرب :
يمين بالله غير الغايه مالي مبيت

هنا طه الكلام حرقو تب ... وساكت من قبيل يسمع في "خرمجة" شيخ العرب .. متمسكاً بأهداف الضيافة وإكرام المضيف ... لكن غلبو بعد دا ...

طه قال لي شيخ العرب :
شيخ العرب أمرك بشوفو حقاره
وما جايباك مرا الجابتك بس غارة
وقرناك كثير ونفسك ابيتا وقاره
خبرك هادا ما دايرلو دق نقاره

قام واحد من اعوان شيخ العرب اسمه علي وجه الكلام لي طه وقال :
قبلك في اللجج يا طه راحو الهدو
تتجاسر علي شيخ العرب بتهدو
زولكم ماعقل يا كبار كان ما تهدو
بعنادوا الفريق خايف يسبب هدو

هنا الجو المجلس توتر وقام طه قال :

انا المالح الكارب خريفي وصيفي
المثلك تبيع ما بطول فوق قيفي
كان ماالليله في بيتي وبعدك ضيفي
في الشي السمعتو برد عليك بي سيفي

رد عليهو شيخ العرب :

كفي يا بطاحين فيكم اتغشينا
كرمكم جانا طامح رخسة اتعشينا
بعد الشى السمعنا كان ما مشينا
خايف في اجتماعنا تقع وقايعاً شينه

في وداعة الله عقب بيناتنا ما في علاقه
وات يا طه اتشفيت شبعت شلاقه
عمرت الشر سعيت دليته بي معلاقه
نحن وانتو بعد الليله يوم نتلاقه

قام عبد الله عاوز يرضي شيخ العرب ود دكين فقال :

من ولدك زعل كل البلد بتكاورو ؟
ارحكم بيتنا بيتو ونحن زولنا نداورو
نتدابر نشوف نحزم جمعنا نشاورو

رد عليه شيخ العرب :

ضيف الغابه حالف ده الفريق ما أجاورو

قام عبدالله قال :
سمح ارجانا يمكن طه نحنا نجبروا

رد عليه شيخ العرب :

الزول في الرقاد شقو البريحو بخبرو
والزول البليد بي ايدو يحفر قبرو
عاد بنسوي عوسنا وطه يلزم صبروا

رد طه علي شيخ العرب و قال :

سوي الدايرو وكتر الكلام خليهو
والشر القصدتو معاي ابقي عليهو
طير اصل السما حتي القمر دليهو
يوم نتلاقه كل واحد بعرف الليهو

الكلام وصل حدو وطلع شيخ البطاحين ود دكين وعيونو مليانة شر ... قام واحد من البطاحين اسمه أحمد قال لي طه :

أقيف يا طه عندي نصيحه ليك ابداها
العقده الصعيبه العاقل بيتعداها
الشكريه كثره نحنا مانا لداها
انا عندي العرب بي ريا أخير نفداها

رد عليه طه مستهزئاً :

ده راي السديد يا احمد تراك بي فكرك
روح لي ود دكين وريهو يسمع شكرك
يديك مال كتير وقبيلتو ترفع ذكرك
تصبح عمده فوق روسينا تخلف حكرك

قام رد علي طه عمه عبد الله فقال :

ليه أحمد تهينوا نصيحتوا ما ضاراك
ما حق النقص وانت بتعرفوا براك
وكت بتسوي عوسك وما بتشوف بي وراك
نشاور ريا يمكن ريا ما دايراك

رد عليهو طه :

صدق القالوا خربانا البلد بكبارا
ديك ريا أسألوها واعرفوا اخبارا
من غير السفر ما عندي تاني دباره
نحنا وانتو بي دي الحالة ما بنتبارا

رد أحمد :
يا طه المصاعب للقبيله تقودا
مسافر وين مخلى النار بوراك موقودا
طه:
انا السمتان جليس الردفولا عقوده
حد السيف بقطع عقدتو المعقوده
رد طه :
ما ولعت ناراً انتو تقعو فيها
شن دايرين براى وانا نارى مدفيها
أحلف ليك يمين دى الحله متقفيها
باكر من صباحى قبل يحس الفيها

رد عبدالله :
نحن كبار اخيرلك ترضى بعرفتنا
مع الشكريه احسن نشترى الفتنا
ندى ود دكين ريه ونكتل الفتنا
ما من خوف ملاقات الرجال حرفتنا
رد طه :
من الفيها ما بزح ان تزحزح مره
وان حين نعود ان طال زمنا ومره
عيش الدنيا ان كان يحلى وان كان مرة
الزين ما بدوم والزول بموت فت مره
رد عبدالله :
وقت صممت ما ترجع وتسمع قولنا
وسفرك دا محال ما بقبلنو عقولنا
الموت ما بنخافو الخوف يمبن مُوهلن
بنعاين بعيد بنخاف بهادل عونا
عبد الله يواصل محاججه طه:
الشكريه بي سيوفن صغيرنا معتق
ما ابناباه الكتال ونقول جرحنا اتفتق
مرحبتين حباب الشر محل ما بتق
تنقد الرهيفه انشاء الله ما تتلتق
رد طه:
الشكريه غوش واكتر علينا حساب
ضيف ليهم لميم ما بتربطو الانساب
انا لي غارتن حسبت الف حساب
كان تتعدوا راي يقين عقابكم ساب
بجيكم حمد ومعاه الرجال تابعه
قولوا ليهو طه طفش وريا معاه
كيف نرضي السفيه الادبو ما برعاه
يرفض طلبك انته ونحن كيف نسعاه
ابقي قاصدو وحدي والقبيله محايده

عقبان ان رجع فوقو الخسائر عايده
وانا كان درني انا اابترجع جموعو الزايده
وان حصلني حت ما اظن يعود بي فايده

رد عبدالله :
ما بقيف ود دكين واصلو السرج ملحوق
في دربك بسوق يا طه ياك ملحوق
وات صنديد تصد الميه ماك ممحوق
بنخاف كترتن وايد الرجال بتحوق
رد طه:
ليه خايفين علي؟؟ الدنيا عيشا مخاطر
الواجب نسوي ونرجي ستر الساتر
في وداعه الكريم الليله نيتي انا خاتر
يا دار ريا ما كان الفراق بالخاتر
كفايه مع السلامه انتهينا خلاص
غير الشوره دي ما لينا تاني خلاص
في يميني ابحريره الدكري القصاص
ما بخاف ود دكين ان جاني بي رصاص
يخرج طه من المجلس ويحاول احمد ان يوقفه فلا يلتفت اليه
احمد:
عم عبدالله خبرك هادا شيتن فاجع
كيف بنطاوعو من بيناتنا يطفش ناجع
عبد الله :
سمعتوا كلامو من الفيها ما متراجع
في الشئ الشايفه قط بي هينه ما بعود راجع
احمد:
نركب نلحقه نخليه يمشي براه ؟؟؟
عبد الله:
شورتو القاله اخير من نلحقه ونبراه
العاقل بحسسب لي التجي متافراه
ويفكر علي القدامو والبي وراه
احمد:
فوقو ابسوقو قط في ظني ما بخلوهو
كيف موقفنا ساعه يلحقو يكتلوهو ؟؟
عبد الله :
ان وقع القدر ما بتقدروا تصدوهوا
ود وكتو الكلام هسع اخير قلوه
وينفض المجلس بانتظار ما تاتي به الاقدار
الان طه وريا قاصدين شندي عشان يتحامو بالمك نمر وابتدا طه يغازل ريا فقال ليها:
درقي يكركب كمه ركبي يشيل دي الهمه
اصلي بطرز رمه مني تحود الامه
جملي يكسر الهربه سيفي يحل من كربه
قلبي سمينا تربه ما ابتقماني الغربه
يا ريا الحلم ما شفتي كيف اتهول
اتفسر براه وبالشين علينا اتاول
داخل راسي فكرا من ما بتحول
بكتلو ود دكين ان كان قرب وان طول
ريا:
اسود ود دكين بي اسمه ما تحجينا
هو الفرقنا قمنا من البلد هجينا
عقب في دار جعل تاني الخرابه بجينا
ما بسوي الرماد المك نمر بحجينا
طه :
ماشيه بي كرعيه
تلاته ايام وضحوه وكان معاي سعيه
هسع مشينا يومين لا فتقه لا في رعيه
كيف يلحقنا دون شندي ومعاه معيه ؟؟
قبيله دار جعل محميه فيها اسوده
تقدل بالمكارم ديمه فاجعه حسوده
راسا المك نمر كل القبيله يسوده
ركازه القبايل في السنين السوده
بكره نجيهو ابسيفا يجز بولادو
العز والكرم من الكبار تيلادو
ما اظن ود وكين بي شينا يوطي بلادو
ماخد بت اخوه شمه ام اولادو
ان ودعتك المك ما بخاف المتلو
اهون من شراب المويه عندي اكتلو
ارجع للبطاحين تاني راينا نفتلو
الشكريه تغيو وغير حرب ما بتلو
يا ريه البطاحين اصبحت محقوره
علي الشكريه دايما سارحتن معقوره
ما بتلقالا عز وتعيد مكانه وقوره
الا تلعب الغاره وتغدي صقوره

ريا:
في دار الشديد ابقالنا قوم دربنا
بي وصفك دحين من شندي نحنا قربنا
ما بنفتق عشا بالفتقه دي تسربنا
ما بنومو الرجال يمك يمسكو دربنا
هنا يسمع طه حركه خيول قادمه فيقول لي ريه:
بسمع حركه
ريا:
شد ديل يبقي رعاويه
طه:
حركه صهب ده ركب سروج ما حويه
قربت مننا وفي ظني ناسه شويه
كان ناس فزع ما بجيبو حته ضويه
ريا:
ياهم ناسنا خمسه عقاب رجالن وينو؟
بتشوف ود دكين برز براهو هوينو

طه :
الشي البينا نحن سعينا لي تهوينو
ضايقنا اب فعج ما ظن يعود لي عوينو
الناس المعاه عرب صعيد يا ريا
ما اولاد عمو ديل والله ما شكريه
معروفين تمام في كل بلد اجريه
كان حفرولو بير ولقوهو شجره ضريه
الجاينها بحكيها ليك اجمال
قايمين من هناك بارنو بي امال
عارفين ود دكين ما بهم بي خيل وجمال
بكتلني ويسوقك وهم يسوقوا المال
وان مات ود دكين ودي الظانها في فكرى
بتشوفي الفضائح الما بتجيك من شكري
الشكريه فرسان ومستحقين شكري
ده الصح قلتو ليك انا لا بخاف لا مكري

المهم ريا قالت لي طه :
يا طه استعد الناس عنونا عديل

طه :
وين شفتي القطابي مسوي همو قديل
بضاير العوق اخوك الما بهم من ديل
براك بتشوفي ياما اشبعن بهديل

وهنا يلتقي طه وودكين

ويبادر شيخ العرب قائلا:
لطه :

اتعبت الزمل حفيت وراك متسبقه
احسن ليك تفوت ريا وتحل الربقه

طه:
كان كل القبائل جات علي منطبقه
افوت من ريا يا شيخ العرب؟؟ ما بتبقا

ود دكين:
البلقي القبائل ما بسوي سواتك
خربت قدلتك يا طه وين دعواتك
تاني بعد جريك البشهدن به خواتك
فارقك الثبات فارق درب ابواتك

طه :
يا شيخ العرب جربت لحسه كوعك ؟؟؟؟
كل ما اوقرك في الشين اراك تتقدم
اتعكنن خلااااااااااص انا صبري حصنو اتهدم
اصلو البينا ما بتنفكا من غير دم
الكاينه التكون بي وراها ما بندم

قام واحد من جماعة شيخ العرب وإسمه عمر للنيل من طه فيقول :
عمر :
اصلو الخمله ما بسمع نصيحه الهادي
اول خفنا ليك من البهادل هادي
يا طه البهدد ما بضرب الوادي
يمشو عليه الرجال يجري ويقبل غادي

طه :
هسع تشوفو ان كان صح وكان تهديد
وصلتو الميس ده حين .. وحديد يلاقي حديد
بنبرش الطروره ويثبت الصنديد
خليهو المضي لاقي البجيك جديد

عمـر :
نافذ فيك قدر يا طه انته عميته
في الهروب وقعته .. عترته ما سميته
منه وجاي قضيت وبقيت خلااااااااص زول ميته
في تركتك كفاي انا بركب اب سوميته
( ابو سوميته ده الجمل بتاع طه )

طه :
الداير الغني يعمل حساب لي فقرو
كعب الضله كيف المتلي انته تحقرو ؟؟؟
ابسوميته خلي الليله سيدكم اعقرو
وين تاني الملاج وكتين يتلب صقرو

ود دكين :
لم باقي الكلام يا طه بهمك سرب
جييييييييتك استعد

طه :
مرحب حبابك اقرب
من قومه الجهل انا لي لقاك مدرب
يا شيخ العرب الليله نجمك غرب
وهنا تقع معركه عظيمه بين الفارسين والباقين وبعد ساعه من القتال يسقط شيخ العرب ود دكين ميتا بين يدي طه :

طه :
تري شيخ العرب قبض الربح من تجرو
اتوسد تقيله انشاء الله ثابت اجرو

( ثم يلتفت الي عمر ) :
وانتو الشوره كيف .. عندي الزمل وبحجرو
صنقعو .. ده السماء .. بطيرو ولا بتجرو ؟؟؟

عمر لي أحمد وقد طار قلبه :
ابرز يا عمر الروح في ايد الخالق
بتجابه الضرب في الدرقه ساسك غالق

أحمد لي عمر :
عان ده الخشيم دايما تنط متشالق
ما تنزل عليه ... مالك ات ماك بالغ

طه :
ضربي صعيب علي وصف البوصف عازر
في غارب التلوب انا نايبي دايما غارز
اسمعو يا طمش كان ما يجيني مبارز
واحد منكم بضرب طرف ما فارز
تري ابسوميته اركب يا طفلول سافرته
قبيل وقت الكلام زي الاسد طفرته
مال دمك بهت متل القول جفرته

عمر وقد ارتعدت فرائصه:
من القلتو ليك انا عديييييل تبت واستغفرته

طه :
انا علي حلف ان كان بقيتو سريه
منكم انتهي قبال تجي العصريه
جيتكم استعدوا تاني ما فيش ريه

هجم عليهم طه لكن الاتنين قامو جارين يتحامو بي ريا وقالوا بي صوت واحد :

هاديل السيوف واقعين وراك يا ريا

طه :
يا خضره المفرهده فوق جروفه نديه
علي الواقع وراك انا كيف اشيل ايديه
حتي كان كتلني عافي ليه الديه
دمي ومالي هيلك واقبليه هديه
ريا :
رجال التابه ... انتو الستره تب ما فالكم
اتامنتوا قوموا وامشوا سوقوا جمالكم
حت مال ود دكين سوقوهو يتبع مالكم
نمشي في حالنا نحن وانتوا تمشوا في حالكم
طه :
زايله رقد ود دكين اسد القبيله الراعي
كان ما ضايقني هو .. ما كت قطعتو ضراعي
ريا :
تتاسف ليه ليه كان دار يجز براعي
والنعلات حرام ما تضوقه تاني كراعي

ده كان القسم الاقسمتو ريا لو ود دكين قتل طه وسباها
طه :
موت المتلو نقصان للعرب في الجمله
كان راس الجرارق وهو البقود الحمله
اطرا فعايلو جفني يجف بعد ما يمله
كما شويييه كان داير يعمل العمله
وتوجها الي شندي حيث المك نمر .. يصل طه الى شندي و يدخل على المك نمر وحواليه اركان حكمه و وزرائه :
طه :
التلب اللزوم مدخور يشيل العايلة
يقدل بى مهل فوقه الحمولة الهايلة
اياك مرق القبايل فيك نسند المايلة
فراج كربة الهم اب قبايلا جايلة
عامر جمعكم انشاء الله ما ينفض
ما جابنى مال ما بدور دهب لا فضة
بدور المك نمر سيد النحاس الجض
جيتو على حملة غيرو ما بتنجض
المك نمر :
تقضى كان بقدرها
طه :
انت اللزوم ماك حاشى
الاك زي حزمتى تشيلها تقدل ماشى
التقيان تفشو والضعيف بتراشى
ما داب قبيلتك انحن بيك نفاشى
جيت يا مك واملى فيك تكشف همى
فى الاول وداعتك و فى حماك بت عمى
وقتين تقبلها تكون شلت تلتين همى
و التلت الاخير تحجانى تحقن دمى
بت عمى اب كبس ما كان ابوها فقير
ابوي قبالو مات وربانى كنت صغير
وكت لحق عش وراهو مانى حقير
اصد الغار على جاري و لى عروضى اغير
المك نمر :
مالك هسى شن جاك
طه :
جاتنى جنية حربة ربى ما بى خاطري ما بالنية
المك نمر :
كتلت منو وجريت
اها دي المابيها لكن خفت الورانية
الموت ما بخافو الخوف يمين مو هولى
الشئ البخافو بخاف بهادل عولى
كان الناس الوراي براي يسعو لى
فى راس لبكتلتو اقيف يمين لى حولى

كان هم برضو بى تارهم و ياخدو الهيلتى ( يقصد روحه )
ما كنت التجيت ضاقت على مهيلتى
يامك ناسى قلة بخاف يخربو قبيلتى
بى جعل احتميت فوقك سندت تقيلتى

الشكرية تقيو و ى الجوار ما براعو
حمد ود دكين فى راسى خت كراعو
سمع بى سفري قاصد شندي قام بسراعو
قاطع دربى يخرت ريا قال بى ضراعو
جيت من اهلى قاصدك ما بقبل تار
انكشف الامر دحين براك اختار
يا اما تبقى بينى والبخافو ستار
ولا تفتلنى انت نسيبو و تاخد التار

اياك عز القبايل و الكرم فيك طبعه
و جارك ما بهم ان كان مسوي السبعة
ان كان اجلى تم اخد قصاصى التبعه
و الياكلو الاسد اخير لو من الضبعة
يلتفت المك نمر للجعليين من حوله و يقول :
مطارق جعل انتو الكلام سامعنو
قولو دحين رايكم وفكركم الشارعنو
يهب احد الجعليين واقفا :
كان ضيفنا ما نحجاه و ندافع عنو
نرمى سيوفنا ليه تانى الحصان ساعينو
قديم يا مك ديارنا مرتع الامال
و شعبة الكون وركازة الزمان ان مال
صغيرنا ان جال يضاير العوق يمين وشمال
بدمانا النزيل نحجاه قبل المال
اديهو الامان يقدل و يلقى مناهو
البقى فوق امان المك منو البدناهو
كل اسم جعلى من اعلاهو لى ادناهو
محال يبعد والمك نمر ادناهو
المك نمر :
انتو كبارنا شورتكم جمعنا بتعمرو
مارستو الدهر ضايقين حناضلو و تمرو
غاية الحى فناه الموت نهاية امرو
لكن بى وراه ذكرو بصبح عمرو

اياها الضامرة وعليها كنت مصمم
ما اتعداها رايكم جايي ليها متمم
سار فى امانى طه بالزمام متزمم
و ادوهو هدومى و بعمامتى اليكون متعمعم
ارتع فى امانى انا البفش البتقو
يلزمنى اليمين ان ولدي جاك ما اعتقو
بالمال الشرط عازم اباك ينرتقو
وان كان قالو لا عقبا نوسع فتقو
نبه بالامان فوق النحاس بشربو
عشان يسمعو كل الناس البعاد والقربو
عقب البدنى طه يمين عقابو نخربو
انا المك نمر كبريت يحرق الجربو
طه :
نمرا يركب الكيك البطل يتحرن
نمرا يقلب العوق ام صفوفا جرن
خلوات صدرو فى علوم الحروب كم قرن
سيفو بينسف الدرع الحديدو مقرن

ما نمر الشدر حاضن فروعو مقيل
ده النمر البضاير الصف محل ما يميل
كل ما اقول شكر القاهو فيهو قليل
كفو بيخجل العين السحابها منيل

قبيلة المك قبيلة ما بتختا اصولها
العشمان يعيش فوق ضلها ومحصولها
بالشين البدورها بعيد عليهو وصولها
فروعها سيوفها ومطارق جعل فى اصولها
عرمان جدكم والنسبة عباسية
و اعياد فضلكم لليلة ما منسية
هاهى الدنيا حية بى فخركم مكسية
نزيلكم ما بهم ان سوى الاف سيئة
مين سابق العرب فى اصلها و فخوذة
مثبوتة الرجالة وعنكم ماخوذة
صغيركم يدخل الحارة ام لبوس يخوضها
مجرب من قديم سيفكم بوابر الخودة

واحد حاجب كان قاعد جم نمر قال

نبه بالامان فرسان فازن وهزت
دقين النحاس فوق الرجال اتعزت
عروس الكُجرة فرحانه وطرب اهتزت
عرمان عزُّ لله قبيلتو بيك اعتزت

المك

وصلو طه للبيت المخصص ليهو
واحفظ كل موجودو وجميع ماليهو
خدمتك ياحسن تقعد معا تسليهو
فى كل يوم تعين ناس يغفرو عليهو

طه

عاشمكم مأكده ما بيرجع خايب
صغيركم رايو عند الغير يوازن الشايب
وشايبكم مدرب رايو دايماً صايب
فارسكم جسوراً ما بدقدق هايب

ثمانية ايام قهر عينيا جافى منامى
ساكن قلبى ديش الهم محاصرو وكامن
دخل عريان وخايف مرقت لابس وآمن
ما تنوم عين عدوك الليله نام مطامن

المك

مالك يا النصيح متل التقول فى محنه
قول انعشنا بالصوت الجهور افرحنا
ابدى بنصايحك وبيها أخير انصحنا
واختم بالحماس بالفينا قول لىّ نحن

النصيح

خلى عجب النفس الدنيا قيد قصير
وبشرك اطرحو لا تكون دوام متغير
لا يغيرك هوى ضُل الضُحى المتدير
كم سبق الاجل خلا الامل متحير

الروح ياتيها على اى حال نصيبه
والصايداها من حال البريه تصيبه
ارضى فيما بيدك قدرها وتنصيبه
إن لم ترضى قد زدت المصيبه مصيبه

الليك ان قاطعك ان كنت فاضى واصلو
واعف ان اساء واجعلو بِرك واصل
كلما ازداد سفه ازداد فى حلمك واصل
بذلك تكفى شرو بغير درق ونوافل

ما بتعاند القدر وانت ليه متألم
صدرك بيتو فاضى ولله امرك سلم
إن عاقق معيق او اصحبك متكلم
ارجى جزاك يوم ينصر المتظلم

المك

قول نحن من بيت مُلك وديانا
تواريخ السلف قاديانا
نحن نفوسنا ما معاديانا
ترفع ديمه فى وديانا

النصيح

نحن الما إنجمع بى فارغه كور لمتنا
تعلو المقاليد السما قمتنا
نحن الفى العرب ما بتنغفر زمتنا
تيجان الملوك تعمل حساب عمتنا

نحن الدنيا هيلنا زملنا ديمه الشيحه
الغفر المخاوف لينا بطنو مسيحه
للعشمان تجد دارتنا ديمه فسيحه
ترمى الفى زحل وتخت بدالو كسيحه

تراها الدنيا حيه ادونا عنا امانا
من عهد الصغر لى عند وكت هرمانا
بى مر الدهور ثم العصور وازمانا
لو كان بالوهم فت يوم سهاما رمانا

و هم في مجلسهم داك دخل عليهم واحد جعلي مسرعاً فقاطع حديثهم قائلا

الشكرية زاحفة الليلة جات بى عقابا
ختت فى النصاب لى كتالنا مادة رقابا
لقيت يا مك جمال سارحة خربو الغابة
و اندك الزرع لا قصبة لا رقابة

المك نمر

مطير درقة وين فارقت عقلك شرق

الجعلى

انا ود الحروب البى سيوفا مجرق
ادينى الاذن يا مك وسيفى مطرق
اعصر كيكى فوق كوش العريب يتفرق

المك نمر

الخيران كتار ما اظنهم متسابا
وبى كتال قوم جعل ما بفرحو الكسابة
ما بجو ناس كتال الناس معانا نسابة
و البيناتنا لابد يحسبولا حسابا

يدخل عليهم وفد الشكرية

سلام دار جعل يا مك نحن رزينا
بى موت ود دكين كل القبيلة حزينة
محمد بقول بى نسبك اتعزينا
رسل لينا طه قبال تجى تعزينا

المك

قبيل يوم حمد دار طه جاهو براهو
ما دق الطبول و قبيلته جات تبراهو
السواها طه اكبر على محراهو
راجل خاف جري تجري القبيلة وراهو

ضعيف كاتل حمد فى القوة ماهو كفاهو
بس خانو القدر ساكت اجل وافاهو
الراي السديد شيخ العرب يعفاهو
و الزي ود دكين دم طه ما وافاهو

مالك يا شيخ العرب لى راسك حانى ؟

شيخ العرب

الفى صدري شيتا حايصة ما رايحانى
راضى الحال على كاتل نسيبك حانى
الظانينو كان تقتل اسم بطحانى

المك نمر

الظالم لى من ما حملت عزاهو
و حقك تاخدو تام وقتين تقيف فى جزاهو
البعفو المسئ عند الله بلقى جزاهو

جماعة من الشكرية

محال محال نرجع من غير طه ولا نكتلو
نرجع لى قبيلته كتالنا ماليهو بثبتو

المك نمر موجها حديثه لوفد الشكرية

قول ليهم طه نزيلنا و المك جارو
اصبح فى امان الما بهمل جارو
شن جاكم جديد كنتو الفضل تجارو
ما تعفوه طه فى دربه ليه تتجارو

زعيم الوفد

فى زولنا الكتل هانت مسافته و قربت
الكاتل كان بخلوه طه ما كان كربت
غير نطلب اذن زاملتنا كانت شربت
كان دي الحالة بدري الدنيا كانت خربت

يدخل طه ويقف بينهم قائلا

يا مك فداك ودينى
ما تتكتلو سلمنى النسد فوق دينى
بسببى الخراب لى وطنى ما برضينى
حقن دم العرب بى دمى غرة عينى

المك نمر

ما تحسب حساب وقتين بقيت فى امانى
و تسليمك محال فى الدنيا حى عرمانى
الجن و الانس كان تجى مداهمانى
دونك دمى يتدفق و دم قيمانى

المك نمر موجهاً حديثه للشكرية

يا ناس بيناتنا النسب كان جيتو بالودية
فى دم القتيل راضيين نخت الدية
و ان قلتو لا و درتو الكلام ايدية
ندق التور ضحى و نجرب الزندية

احد اعضاء وفد الشكرية

دا الشين البخلى الزول يعضى ايديهو
المك كان ختى منو البقوم يهديهو
كاتل ود دكين لا تكتلو لا تديهو
الشر اقصرو الزول اخير عديهو

المك نمر

بعد الهد (التهديد) بيناتنا حد السيف
و كان ختيتو دية انا منكم ما بقيف
راعيكم جديد ما برعى فى العليف
عتبات الصراط اهون له من القيف

جيتو تهددونا الرسلوكم شربو
بكرة الجيش بجيكم اثبتو احملو حربو
شاردكم ما بخلى و بلحق عقابكم اخربو
و النازل البحر عدوها بس معقورة

رئيس الوفد

الشكرية ظاهرة قبيلة ما محقورة
كان درتوها ياما تلاقو فيها صقورا
قبال يثبت الفارس يختفو القورة

المك نمر

بقيتو رجال و تغيرو تصلو لى عند وكري
يا قراضة القبايل النص جمعكم مكري
قول للرسلكم ما يجينى عقبا شكري
البيناتنا خربت ارجو عاد عود شكري

احد اعضاء وفد الشكرية

قبيل حامدين فعايلك و بانشراح جايينك
ليه بتهينا يا مك كتيرة دي منك
وقت ابعدتنا و بقى طه ليك و منك
ان زليتنا و ان جليتنا ما ناطينك
ما فينا الاضينة و مانا قلة كُتاار
بنصل الحارة نحن نوجب البتار
صغيرنا ان جال يعجبك للصفوف بعتار
كبيرنا يفرتق الحافلة و يجيب التار

جرق ما جفل خايف صياح الساقية
و الحارس السرج لابد تكورك راغية
سمعناها عاد و الفارقة ماهى ملاقية
عرفناها المعاك نرجع و تبقى الباقية

المك نمر

هوي يا عرب احسن تراعو ادابكم
واسوه الكلام قبال اواسى رقابكم
ما عندي الاضينة الاصلو معدود دابكم
فد جعلى ان ركب حالا بخربو عقابكم

فلاحة العربى داب سفروقه و يجلب كلبو
يا يربط درب و يرجى الاضينة يسلبو
الهيلكم حقيقة و فيها ما بتنغلبو
فالحين فى القنص ترعو و تعرفو تحلبو

رجالة و كرم ديل بيهن اختصينا
وكت الكوع يحر نحجا العروض و نصينا
هد شامخ الجبال كان درناه ما بعاصينا
سيوفكم فى الحرب بنكسرن بى عصينا
كفاكم استريحو من الكلام دة قضينا
الدرتوها انتو نحن بيها رضينا
قبل تتمسو دابكم تلقو نحن حضينا (قبل ان ياتيكم المساء سنكون جاهزين للاغارة عليكم )
و الحكم الحسام و السيف يكون قاضينا
انصرف وفد الشكرية غاضبا بعد الاهانات المتبادلة بين الطرفين
و استعد الجميع للحرب
فى تلك الاثناء كانت شمة بت محمد ود دكين زوجة المك نمر
تبكى و تنوح و توصف حال عمها :
غرار العبوس الليلة زار دولابا
يا خريف البطانة و مرتع الجلابه
بتعقر الركوبة و تنحر الحلابة
كم قشيت دموع وجعة و نتعت غلابة

عمى العم سيل ايديه روي الماحل
تساب بحر المحيط الما بضمه الساحل
يا حليلو ود دكين مونة المقيم و الراحل
سند الهاقعة نشال التقيلة الواحل

صعيب فقدك و شوية فيك بكايا
انوح لامن اروح عينى انقطع وكايا
قابلنى الدهر قاصد لو فى نكاية
بعد النكبة دي بادي لو تانى حكاية

وا وجعى الشديد انا جمري زاد فى وقيدو
ابوي بى قبيلته جاء و داير يستتير فى فقيدو
الجيش كله اهلى راسه اخوي و عقيده
طه المك حماه و الشر صعب ترقيده

تاقت للمروق انا روحى جات متطاردة
صعب الحال خلاص و العقدة ما متجاردة
الشكرية امس لحقوها حارة و باردة
خلو المك زعل حالف يعقر الواردة

ديل ناس وجعة كان عملو زي ما يعملو
مالو المك كان فوت كلامهم حملو
قالو عطاشى وراد بينزلو يملو
كان انسل سيف تانى القبيلتين كملو

بعضى مجافى بعضى و ليه اضحى ميلادي
الليلة انا اتصادم مطارفى بى تيلادي
كان المك يفوز افقد ابوي و بلادي
و التانية ان بقت افقد ابو اولادي

ضاق صدري الوسيع يا همومي وين تنجمعى
ودع روحى طشش شوفى فارق سمعى
طال اليوم بكاك يا عيونى جود يا همعى
اصبح جفنى جاف و الوحة حرقت دمعى

كيف اعيش و انا صبري ودع ناجع
اححى فترت فتايري و ما لقيت لى مواجع
غير ود النعيسان منو للمك بيراجع
يسمع قوله لو يلقاه راقد هاجع

دابى عترت فى الزول البحل الصعبة
قدريش عندو فرتيق العقد يوم يعبه
من شدة دهاه القاسية تصبح لعبة
و ان داير يقسى الهينة تصبح صعبة

و تواصل شمة فى حديثها :
طايعه و راضية دهبىو مالى كله اديهو
لى ود النعيسان دون نزاع اهديهو

صافيات .... يا صافيات
تنادى الملكة على احدى الخدم و الجواري
صافيات حسى فى الحال تمشى ليه تناديهو
يروح للمك سريع من زعلو دة يهديهو

حليل ايام هناي و رضاي و مروحى
عاكسنى الدهر اتشفى دمى جروحى
يا صافيات لى ود النعيسان روحى
ما تجى دونه ححى فاضل لى اخنق روحى

تذهب صافيات و تخبر ود النعيسان فياتيها مسرعا
ود النعيسان :
سلام يا ملكة الدار يا ام عمارة سلام
عليك مالى جسارة و صدري فيه كلام
وقت انتى سوت بيك كدي الالام
نايحة الدروب مظلومة كان تتلام

لى فخر الجدود يا ملكة ليه متناسية
تروس الحافلة ابواتك بدور الماسية
تلوب الحارة و جبال الثبات الراسية
انتى تصبري ما بجبروك فى القاسية

من ابواتك العز ديمة ليك اسورة
معروف ثباتك تجبري المكسورة
حليلك سماء العز و اولادا نسورا
دارك عامرة و الفرسان عمادا و سورا

شمة :
صدقت ..على المتلى الثبات مفروض
كمل توب الصبر و اليوم لبسنا عروض
على الهم كتير و انا صدري مملا غروض
و دة النسانى ما قدمت ليك عروض

التحت الطبق شيلو مسحة شارب
ما قدر المقام يختا و شوية يقارب

ود النعيسان رفع الطبق و وجده ملااان ذهب و اساور

ود النعيسان :
ديل خروز دهب يا ملكة و لا عقارب
الجهرن عيونى الدنيا باقى مغارب
جود كفك طمح يا ملكة سيل غرقنا
راشى خضر عودنا بعد المحل ورقنا
يا صاحبى الفقر انا و انت ما اتفارقنا
اختر ما تعود غرب عديل شرقنا

شمة :
انت فرحتى و الهم دخيل قاصينى
و للعبرات ابلع و الدمع عاصينى

ود العيسان :
يا ملكة العليك مخصم يمين خاصينى
ختى حملته فوقى و تانى ما توصينى

الساس الرموه عقب ما بتقدم
قبل ما يختو طوف يلقو القديم اتهدم
كل واحد اخليه على السبق يتندم
قط ما تخافى شئ همك رقد و اتدمدم
ما نيتى شئ غير اعنى ابوك فى محلو
و بشيش ادخل انا بى كلاما حللو
ازيل الفى الصدور و كلامى ينشر حلو
بعدين الكلام بعرف طريقة احلو

بعد ما يرضى ابوك المك بعالج صدره
و بقطع فى الكلام و على افتر قدره

شمة :
نضرا فوق دكين العالى راسه و قدره
التحت الطبق ليك خمسة كيمان قدره

ود النعيسان :
الوصلت كفاي يا ملكة ماهى قليلة
خلينى النمشى هسع وقفتى مليلة
نيتى ابوك عدييل و فى ظنى اقضى الليلة
الجمرة ان انطفت فى يدي تانى اشيله

بدور بنتا توصل لى تكون مامونة

شمة :
تعالى يا ليمونة

ود النعيسان :
شن سموها دي ليمونة و لا امونة
تفتحو فى الشرور ان قلنا شئ تلومونا

شمة :
شن دايرو بيها اسمها ما تشيل توصل ليك

ود النعيسان :
توصل لى بنية الملكة هيل دلليك

شمة :
شن راس مالها ما شيتا كتيرة عليك
شيلها مع الهدية خلاص دفعتها ليك

ود النعيسان :
مقبولة الهدية الكل شئ جامعاهو
فيها غناي و فيها البغنى و البسعاهو
طبقى ملااان دهب و هادي بنتى ماشة معاهو
يجزيك الكريم بالخير حماك يرعاهو

يا ليمونة شيلى النمشى لى قدامنا
خيرك عم دايرين نحن نقضى كلامنا
ودعناك الله نومى عاد مطامنه
تصبحى تلقى كل شئ تم و دارك امنه

يخرج و النعيسان

شمة :
فى وداعة الله قدامه و وراه عديلة
ما يصادف شرور من ديك او من ديلا
سائلة المولى الاحزان سريع تبديلا
بالهنا و السرور الداريتم تقديلا

يذهب ود النعيسان الى ارض الشكرية ليقابل محمد ود دكين ابو شمة
و شقيق حمد و يدخل عليهم

ود النعيسان

سلام شيخ العرب تلب التقيلة اللازم
ثمرة صافنات راس القبيلة الحازم
خريف الماحلة اب رعدا بيهدر رازم
سلامى عليك قليلا ماهو قدر اللازم

كنت اقول كتيير الا الكلام قاسانى
صعيب وقع المصيبة عقد على لسانى
يمين موت حمد فى قلبى نار مسانى
اظن شيخ العرب طال الزمان و نسانى

شيخ العرب

اظن ود النعيسان ادني لى جاي قارب
فى الشوف ضعف و الدنيا باقى مغارب
كتير الموت حمد باقيالو دبرة غارب
فارقتك صغير كنت لا دقن لا شارب

ود النعيسان

الدنيا العبوس سايقانا بى نبوته
الصبا للكبر حكمة و صحيح مثبوتة
قامت دقنى حت بالشيب بقت مربوتة
يا شيخ العرب و الراس صبح هبوتة

شيخ العرب

يسلم راسك انت اللي المحاله خريف
اب قدحا مبرز ما بضاريه صريف
ركازة البميل كان حبشى و لا شريف
جرديق العرب لا عند حدود الريف

خبر موت حمد كل البلد هماها
فجعه و وجعه حار كل الديار عماها
سافل و الصعيد كل دار جعل بى تماها
حزنانين عيونهم حرقة دفقت ماها

شيخ العرب

المك خليه تانى قبيلته ما تطراها
ما حقت نسب ما جاتنا فى محراها
عاميها التقى و فار الشحم غراها
ما بتحدث السواي بتشوفه براها

ود النعيسان

ما بغباك كرم المك و ليك معلوم
ما خاتيه ابو عماره و حاشاه من اللوم
الخرب الكلام الشايب الضقلوم
و ان عدنا ه هسع المك يكون مظلوم

الشئ الحصل احكيه ليك ممهول
ما بنسى الكلام ان كان قدم او طول
هسع اقصه ليك للاخر من الاول
حكمك نقبله و احكم براك و اتاول

السواها طه بقت و حصل الحاصل
ماهو كفاهو لكن المقدر واصل
عرف البينا بالجنى و النسب متواصل
اتحوانا خاف سوانا حدا فاصل

البيكم عارفها و كل البلد فجاهو
قصد المك عدييل و دون القبايل جاهو
تبقى السمعة كيف كان املو خاب فى رجاهو
بتقبل لى نسيبك شين كان ما حجاهو
فكر فى الامر شاهدو اليمين عضاهو
الحاصل حصل و المولى قاضى قضاهو
ادي رقبته متلك و العفو مرضاهو
شينتك ما بدورها و شينو ما ترضاهو

شيخ العرب

لومكم انتو خلوه اصلو ما بتغسل
المك ما راعى للبيناتنا فينا اتفسل
حابس طه قال غير سيفو ما بتوسل
حتى للعزاء زولكم لا وصل لا رسل

ود النعيسان

برسل ليك عقب خيرة البلد و وجوها
فى داب الشديد باقى له ناسك جوهو
بدا لهم حديث باقى الكلام ما رجوه
هاجو و اتفلتو غايتو البلد خجوه
اتهمو المك قبل لكل شين نسبوه
و هاجو و فاخرو بى دم حمد طلبوه
الزين داره و جاهد الا هم ابوه
قال القالوه شين لاكو الكلام خربوه

ما حسبو له حسبة و جهلو لى مقداره
المتل المك بهدو عريبى داخل داره
قال الشين عدييل متعمدين ما داروه
و هاجو و اتفلتو و الشر براهم داروه

فى عموم دار جعل ما خلو بطنا باردة
عقدو لهم عقدة صعبة ما متجاردة
خلو المك زعل حالف يعقر الواردة
خلى الناقة ما بتشرب عنيزة طاردة

ناسك عكرو صافى المودة الناقعه
بتشكن سيوفكم بكرة تقع الواقعة
بجيكم منشتح شمس النهار الفاقعة
و اولادك بلاقو متل سيوف الصاقعة

من بعد الفقد عقبا تفقدوا تلوب
هنا بتساوي الغالب مع المغلوب
ما بموت الخبر لى جنى الجنى مقلوب
ما تعقرو الكرم هيلكم بقرته حلوب

يا تلب الحمول انت الكرب فراجها
مدخور للقواسى العاطلة اياك دراجها
الحجه ام عقد رايك بضوي سراجها
كيفن ترضى فينا و تشمت الفراجة

كرمك يعرفوه الغير قبل جيرانك
المعروف رجالة و راي تقيل ميزانك
عرضية و صبر ما بنعبر ميدانك
تقدم للفضل لو تمشى فوق مصرانك

ما جابنى خوف ما بخاف من سيوف و مدافع
ما جابنى الرقم جيت لى قبيلتى ادافع
جيتك و املى فى كرمك هو كان الدافع
و ان وقع القدر كتر الحذر ما نافع

بقيت داب الرجوع ادينى اخر فكرة
فى ايدك بقت ان صافية او كان عكرة
اصلو الحى بموت من بعده تبقى الذكري
كعب النقص سمح الزول يخت الشكرة

محمد ود دكين

كان القلته صح الحق معاك فوق ايدك
و كرمنا تشوفه انت و فى التظنه نزيدك
عندنا ليك سؤال من بعدو نحن نفيدك
المك رسلك و لا انت جيتنا وحيدك

ود النعيسان

المك ود عمى انا لا غفير لا حاجب
و مهما تعلى العين ما بتفوت الحاجب
الشئ الحصل لى زول يمين مو عاجب
ما رسلنى ليك براي عملت الواجب

وقتين تصفى انت ارجع له حامد و شاكر
بتسر البقت و تصفى بحر العاكر
اصلو المك قديم لى فضلكم مو ناكر
بجيك طالب العفو مرساله بصلك باكر

شيخ العرب

غير شورة الاهل ما بنشري شئ جامعنا
الراي هو البتمنا شينة كان ما تبعنا
الزول قال كلامو سمعتوه زي ما سمعنا
حقيقة دم حمد فى الجملة خاص جمعنا

وجه شيخ العرب هذا الحديث لمن كان حوله من اعيان الشكرية و فيهم واحد
الكلام ما عجبه... كلام العفو الصلح فهب فيهم قائلا

الزول ما بفوت الاصله بتقدر لو
من نفسك بشوف دم ود دكين هدر لو
المثل القديم مالك زي التقول ودر لو
ما قالو الاضينة اكفتو و أتعزر لو

ما بترجع قبيلتك دمها مطالبابو
صلحا فوق حمد بالمرة سادين بابو
طه بنقصدو و عارفين براه اسبابو
وان عارضنا زول مرحب حبابو حبابو

المك كان ما بطر شن دخلو فى الرفقة
تقية و رجلة خيولو على الفسل متسبقة
ان جا بنقتلو و التبقى بعدو التبقى
انشاء الله السماء تجئ فوق الارض منطبقة

احد شيوخ الشكرية كان رايه موافق لى شيخ العرب فقال

الراجل الصميم دون الرجال اختار
ساعة الحجة يقطع رايه زي بتار
ظانيكم قبيل فى الحارة ما بتحتار
المك ان قتله غيركم انتو تطلبو التار

انتو اولاد قبيلة اوعى النقص اوعوه
التلب الما بشيل فوق الدبرة ما تسعوه
شيطان الغضب اعصوه ما تطاوعوه
بيناتكم نسب حق الكرم راعوه

شن راسه طه و قعره الفيهو الخلوق مشبوكة
عتودا حتى جلدو ما بجيب قبالة محبوكة
يا شيخ العرب وحاة ابوي و ابوكا
كان دبغوه لا بسد طارة لا دربوكة

تدخل شكري اخر فى المجلس قائلا :

قدر ما سكت موجوع و السكات ما بقالى
يا شيخ العرب هاك النصيحة اصغى لى
الدم عندي نعفاه ان سمعت مقالى
بى طه الرخيص نشتري المك غالى

شيخ العرب

ان وقع القدر ما بنعركن كفينا
كم حلينا عقدة و بالوعد وفينا
الشورة البقت ما تظنو وراها دفينه
روح ليه اليجئ بلقاها الماملة فينا

ود النعيسان

قدر ما تكبر الافكار تقيف دون فكرك
يمشى مع الشمس فى الدنيا مرفوع ذكرك
فى راس الكرم جالس و خالف حكرك
ربنا يحفظك ما نشوفه عاد يوم شكرك

حقنت دموم كتيرة من الحروب و تلافا
داويت النفوس بالحكمة زلت خلافا
ودعتكم الله برجع للفتق اتلافا
و الفيها الخير بقت ما تسووا تانى خلافا

يعود ود النعيسان الى شندي و يجد كل الجعليين على اتم الاستعداد للحرب

المك نمر وحواليه اركان حربه و اكثر زول متحمس للحرب اسمه عثمان

عثمان

عقبان ما فضل جعلى القبيلة انساقت
خيول و سيوف كتار شندي بيهن ضاقت
يمين و شمال تقول ضل السحابة الساقت
رجالا يعجبوك كان الوجوه اتلاقت

فوق شاشة بطاحات القبيلة خبارن
حارسين النحاس لامن يولى نهارن
ربعناها كان هجم فوقا العريب ديل غارن
احلف ليك يمين فى ضحوة نقتل نارن

كدي دقو لنا النحاس و شوفو إستعداد
رجالاً يعجبوك و كترة ما لها عداد
خيولا معبية تتعب الشداد
و سيوفا سقايتها تغلب الحداد

المك نمر

الساس الرميتو انا عارفه ما بتهدم
بكرة الخيل بقودا و فى الصفوف اتقدم

ود النعيسان

قالو اهل المثل دم ما بغفر دم
و الامر العنيتو ان تم اخاف تندم

عثمان وهو اكثرهم حماسا و استعدادا للحرب قال

تب الخملة المن وجودو احسن عدمو
ساعة الحارة تلقى رويسه اخف من قدمو
من شورتك اخير عندي البشاور خدمو
بركب بكرة و اشمت و امتى ساعة ندمو

ود النعيسان

الاعوج دوام فى رايه ما بتثبت
متل الطوب كلامه تلقاه كله ملخبت
قلت و طلت دلينا النجوم ترا قربت
بقيت سيد شورة يا داب البلد ما خربت

المك نمر

قبيل يوم شورتكم ما كنت ناقص راي
لقيتكم اولاد ما جيتو فى محراي
ماشر دق النحاس دقوه و ابقو وراي
كلامكم اقصروه بسوي عوسى براي

ابوك يا عمر ما بخشى يوم الباس
بتلقى الصفوف من غير دروع و لباس
الشكرية حالف اخلى دارا يباس
اوريهم ضحى هيبة بنى العباس

ود النعيسان

الليلة النمر اصبح كلامو مبالد
وان كان للنسب ما اداهو حبا زايد
بقولو اهل المثل الخال شريك الوالد
انظر لى عمارة و عمر واحمد و خالد
( عمارة و عمر و أحمد وخالد هم أبناء المك نمر و امهم شمة الشكرية بت محمد ود كين شيخ الشكرية و خالهم حمد و د كين المقتول )

المك نمر

دمك جعلى و اسمع من كلامك شكري
كنت قبيل بريدك زي جناي البكري
المال بيك ..مال خيبت فيك ظن فكري
و الشينة ان بقيت فيها ساكت مكري

البينك و القبيلة نشطت فى تعكيرها
شديت فى الخلاف ماك راضى بى تفكيرها
شمة شن ادتك وقتين تبعت فكيرها
ما المحرية الكروة ليك شكيرة

ود النعيسان

الزول بيلزم الحملة البحملها صدرو
و هدية الملكة لابد تناسب قدرو
الدرب الفتحته لو كنتو بيهو بتدرو
الشئ الانكريت بو تدونى عقبا قدرو

المك نمر

ديمة المكري ملخوم ما بشوف التحتو
ما بتنغش لا بغضبه لا بى فرحتو
فى السما و الارض وين الدرب دة فتحتو
خسر شورتنا الا كراك كفاك ربحتو

ود النعيسان

لى جار و لى عشير بى شينه مانى مبدر
و مانى الطقطق البجى فى الكلام متسدر
اسمع سيل نصيحتى الفى الصواب متحدر
و خت ليهو الختة دربى كان لقيتو مودر

المك نمر

فى رزق العبوس الشين فال البطمع
يفقد ناسو و اتفرق قدر ما يجمع
ما تدس الكلام احكيه وسط المجمع
الجيت بيها قولها ترانا نحن بنسمع

ود النعيسان

عاصمك من نشيت من النقائص ربك
شيطان الغضب تعصاه ما بلعب بك
احكى لك مناك يا مك سرورة قلبك
بينك و بين حماك اتحلحل الاتشبك

شديت اب حجول البارح العصرية
طابق سيفى غرت دخلت فى الشكرية
لاقيت ود دكين و حادثته من دون ريا
و قلت ليه البقت ما الكان قبيل محريه
الزول داهية تانى معاهو حجة قوية
اللوم صابر و عداهو ماهو شوية
قال لى لومى قولو و فرش المطوية
كان صح اشيلو بلا سرج و حوية

كان شيخ العرب فى صدره حلة و سوق
هدمتها و طرحت مكانها بالواسوق
حكمت الفتل استوثقت منه وثوق
زللت الصعاب ليك انت اجلب سوق

اتلمو العرب فى المجلس اتداولنا
هجنا و مجنا اتقاصرنا و اتطاولنا
عادين الصواب و رجعنا لى اولنا
دم حمد العزيز على القدر حولنا

لكن بى شرط يا مك ترسل ليهم
وجوه جعل العزاز يدنو و يرضو عليهم
قاسية مصيبتهم اندعكو فى واليهم
و القوم اكرموه ان فاتو دم واليهم

المك نمر

روح شيل كراك خلى النضم و الحجة
خليهم يجو للتار يخوضو اللجة
كان تقع السما و الارض تترجى
نحن بلا السيوف الماضى ما بنترجى

ود النعيسان

يا مك المكوك البينكم فكر ليها
فكر فى الامر شورة الغضب خليها
الشكرية ناسك و انت اياك واليها
فى طارف الحديث شايفك حقدت عليها
كان شين ولا زين الدايره بتسويها
يا مك دار جعل الهينة ما تقسيها
امشى على القبائل و الحقود نسيها
زالفة العرب بى حكمتك واسيها

كان فى وسط الجعليين شيخ وقور اسمه حسن وافق ود النعيسان
بعد ان كان من مؤيدي المك فقال موجها حديثه للمك

العلم فوق راسك متوج يا اب عمارة سلام
قاعد من قبيل ساكت بدور لى كلام
بى كلام ود النعيسان اخير الصلح و الدايرو ما بتلام

عثمان

بقيتو على الصلح يا عم حسن حتى انت
انحليت دحين بعد انكرابتك لنت
اتفشيت انا .. اتحفحفت و اتزينت
على حس الغنيمة .. رهنت و ادينت

حسن

يا ولدي القضية قريبة بينا و بينك
مالك متحرق و تعضى فوق ايدينك
الخير فى الصلح كان اصله همك دينك
هذا المك بحلو و منه بتنوم عينك

راس المك يعيش و نحن جملة فداهو
يحل صعب الكلام يعرف دواه و داهو
نحن ضراعه معدودين نهين اعداهو
و الشئ البقولو ... ما بنتعداهو

المك نمر

بقيتو على الصلح ننهى الكلام نقضاهو

حسن

منو البيابا الصلح كل النفوس ترضاهو
دة الراي السديد كان المك مضاهو
الراي هو المفيد و الامة ما معارضاهو

المك نمر

انقطع الكلام باكر مع البادرية
شدو و اركبو اتوجهو الشكرية
قولو لهم نمر ما همه طه و ريا
داير السمتة ليكم و لى تكون مقرية

ابقو لى رجال ما تخضعو و تترجو
القول اقصروه و خلو الغلاط ما ترجو
قولو لهم صلح و ان ابو و رجو
نارنا بتاكلهم من البطانة يهجو

يدخل احد الجعليين

عامل بى ركابه قدامه راجل شيبة
بيناتهم عظيم فوقه الجلال و الهيبة
لى هسع وصل كانت مسافته قريبة

المك نمر

خليهم يدخلو دارنا بتلم المريض و الطيبة

كان معروف عن الشيخ محمد ود دكين الكرم و الفضل و الشجاعة
و المرؤة و كل الخصال العربية السمحة و لذلك قرر الحضور للمك
نمر قبل ان ياتيه

ود النعيسان شافه من بعيد فقال موجها حديثه للمك :

يا اب خلقا رضيه و ليك يريم النافر
جرديق العرب توب القبيلة الوافر
حلمك من زمان ياوي و يلم الطافر
تري شيخ العرب وصلك قبل ما تسافر

عاد ما بخبروك و انت سيد الخبرة
بالنضم البخلى جروح قلوبهم تبري
الراجل نسيبك و ليهو على القبايل كبري
عند نصب الحقوق الفاس توازن الابرة

يدخل عليهم شيخ العرب

سلام يا مك جعل نخبة بنى العباس

المك نمر

حباب شيخ العرب ال للصفوف كباس
اياك حصنهم لى شرهم حباس
يا درقة بلاهم يوم يجيهم باس

مرحبتين حباب جد الاسود الحو
مرحبتين حبابه الفى القبايل ضو
ايدك من قديم للصالحات بتسو
قشاش دمعة الببكن بسون هو

شيخ العرب

تعيش يا مك دوام فوق راسك الطاقية
بعد كتلة حمد ما فينا تانى بقية
شاقة علينا و البندورها كان ملقية
اسم بطحانى نهد حلالو للشايقية

المك نمر

قنب استريح مشكور سعيك يا عم
تعبك ما بندورو الا المصيبة اعم
بدورك دم حمد تعفاه ان بقيت انعم
شكرك فى البلاد يسري و تضوق له طعم

حمد فقد القبايل ما فقد شكريته
بالزين و الكرم فى الدنيا باقية طريقته
حاص بيه القدر صعبت علينا قضيته
حكم المولى نافذ لا محال فى بريته

انت ابو العرب فى حاضرها و باديها
و فى المثل الابل سوقوها بى هاديها
قول كلمة عفوك طامن النفوس هديها
و الوصلتنا نحن كتيرة بنعديها
من ناسك امس الجات نرحب بيها
كتيرة فى المنام ما كانو يحلمو بيها
لى اولاد اولادهم تانى يفخرو بيها
عشانك نقبلها و ليهنوا يفرحو بيها

من دون الصلح للزين مافى سبيل
مافى قبيلة خليت من سفيه و هبيل
بينكم و البطاحين مافى شئ قبيل
عد طه و حمد هابيل قتل قابيل

شيخ العرب

بالنار الدهب يصفو و يبين غاليهو
و تصفية الرجل يوم يندعك فى الليهو
الدم وليانه نحن و حتى انت واليهو
عشانك ضمة نعفاه طه بنخليهو

المك نمر

يا تلب العرب فوقك نخت الحملة
ما تضيق عفوك خليه فوقهم شملة

شيخ العرب

ما داب طه عشانك عفيتهم جملة
امتد من قفى ما يضوق قرصة النملة

المك نمر

يا شيخ العرب تسلم تعدل المايل
عفوك لى دم حمد سديت به فقدا هايل
انقذت البلاد و ربطت تلاتة قبايل
بى حبل الوداد انشاء الله عمرك طايل

ياتى طه و يقف بينهم قائلا

من تبيت صغير شيطانى ما غرانى
بتلقى المصيبة وقتين تجى مبادرانى
ما كان بى خوف الا الصلح سرانى
لى سالف الكرم عرب الحجاز طرانى

اخوك ما كنت قاصده هو الكان قاصدنى
فريت منه خوف الفتنة قام طاردنى
فى المال و العرض وقتين دنا و جابدنى
دافع بى ضراعى و مافى زول ساعدنى

الزول ما بفوت الموت قدر ما سوي
ان طار السما و ان غتس فى هوه
كان ما عولى كنت غير سيفى ما بتحوي
قبيلتى ضعيفة و انتو كتار و تانيا قوة

يا شيخ العرب من البطاحين اتلو
ما تربو العدا تتخاصمو و تتقتلو
احلف ليك يمين ما ليهم يد فى قتلو
قتلته انا و حقيقة خسارة موت المتلو

للان ما بخاف راضى البساط اخذوه
عن حد الشرع ما تختو تتعدوه
بدور قد الخلاف بى راسى انا تسدوه
الزول من وهم ما بسوي اخوه عدوه

شيخ العرب

الزول التقدر لو ما بفوتو
مسكين العبد ما بدري بى يوم موته
وقتين اصله من الدنيا يكمل قوته
واحد كان يموت فى غربة و لا بيوته

مع كبر المصاب ما اظنى افقد جلدي
و السعى فى الخلاف ما يمر يمين بى خلدي
زي ما اخوي حمد حتى انت برضك ولدي
عشان حظ النفوس ما برضى اخرب بلدي

البمسك قفانا نخافه و نحسب لو
مضيناهو الكلام و الشينة كان تعقد لو
حديث المك رضيناه و سر عقولنا و قبلو
يا ولدي العفو مثبوت فى محل قبلو

وكان العفو و ساد الأمان بين قبايل الجعليين و الشكرية و البطاحيين
(النهاية)

ان شاء الله عجبتكم

احيـــــــــــك الاخ /الــصـادق ابو
فعلا اعجبتنى ملحمة العشق السودانى النبيل 0
واكرر لك شكرى وانت تجوب فى ديار البطاحين والشكرية والجعلين0
واسمح لى ان ابدى لك ملاحظتى على الملحمـة0
اولا:-
بعد ما طلق طه النار فوق ريا وقالت لية
تطلق فوقى نارآ 0000 عقبآ تقول لى انسى ؟
هنالك اربعة مقاطع 2 لريا و2 لطه سقطت من الملحمة وهى تقع بين ماذكرته اعلاه وحتى بداية تفاصيل الحلم لريا0
ثانيآ:-
هنالك ايضا حوالى 10 مقاطع وهى تقع مابين رد ريا لطه
كــــــان غرضـــــــــآ صعب ؟؟؟؟؟؟؟؟ و رد عبد الله لود دكين
يفتخروا البطاحين ساحتم راحبالك0
ارجو مراجعة المصدر وشوف لينا وين الناقصة وكملا و ملحمة عشق طه وريا 16248

0
وفى انتظار المزيد من امثال هذا الشعر 0
ولك شكـــــــــــــــــــــــــــــــــــــــــــــــــرى ،،،،،،،،،،،،،،

تحياتي للاخ حسن موسى
وسنقوم بالبحث عن الناقص ونكمله
ونحيطكم علما بأننا أضفنا مقطعا بعد الملاسنة بين وفد الشكرية والمك نمر وهو المتضمن كلام زوجة المك نمر

لك التحية الاخ/ الصادق ابو حسن

ممزوجة بدم الزنوج ديل اهلى

نشكرك على ملحمتك الطويلة التى عرفنا بها تراثنا السودانى وابطالها وقبائلها وعادتهم وتقاليديهم السمحة وصفافتهم فى الشهامة والرجولة والكرم والجود

وشكـــــــــــــــــــــــــــــــــــــــــــــــــــــــــــــــــــرا

الأخ الصادق أبو
عاجزيييييييييييين عن الشكر
حقيقة روووووووعة

شكرا على مروركم
هذا يدل حماسة السودانيين المعهودة يعجبهم كل حماسي

التحية للاستاذ / الصادق أبو ..

نشكرك على إثراء المنتدى بمثل هذا العمل الرائع الجميل ، ونقدر لك هذا الجهد الكبير الذي بزلته في جمع فصول هذه " الملحمة " كما سميتها ، والتي تجسد حياة البادية وأعراف القبيلة وتمازج القبائل فيما بينها ، وتصور لنا كيف كان الحب طاهراً وعفيفاً في ذاك الزمن وفي تلك البيئة النقية .

لك كل والود والتقدير ،،،

إن مال الشجر ما بتكسرن فراعو
وقمحان الطلب لي المابجيبه ضراعو
ليه يا أهلنا للبيناتنا ما بتراعوا
القال راسو موجعو بربطولو كراعو ؟
********************
يا جماعة شوفو الحِكم الجميلة دي ... صراحة كلام موزون ... يعطيك ألف عافية أستاذ الصادق ...ومزيداً من كتاباتك المتميزة ،،،

طه الضرير والطيب ود ضحوية كانا

في طريقهما إلى أبو دليق

وكان طه يبحث في اللاب توب

في الإنترنيت بال Wireless. ،

عن رد من محبوبته ..

فوجد رداً قصيراً ..

فأنشد قائلاً :

شديت ال Pentium وأصبح يبرطع جايط

وال Internet دقش قلبتو صايت صايت

على ام شعراً حلال ما طولنو وسائط

وعطشان الغرام ما برونـّو 2 K.Bite

@@@@

فرد عليه الطيب قائلاً:

الفيك يا طه Virus والله الكريم الشافي

وما بفيدك طبيب حتى ان بقيت Mc Kafi

غير لخلوخة الهرفة أم قليباً جافي

وأركز للتجيك يا طه Options مافي

@@@@

استسلم طه وقال :

إيميلك وصل زود علي الهم

والفكر انشغل ال Ram عليك وال ROM

يالصلاح جميع أنا والحبيب نتلم

ويا ساكن الضريح سيدى الحسن Dot Com

@@@@

الليلة ام شلوخ لاقيتا عند ال Chat

وال Virus ضرب قلبي ومحى الفايلات

يوم شافني الفقير البكتب البخرات

قال Defrag ما بفيد أحسن To Reformat

@@@@

بعد ما كت فقير بخراتي Word و Excel

دقشتني أم رشوم خلت درايفي إختل

Mother Board القلب الكان زمان Intel

بقى Chipset رخيص كل ما ربطتو أنحل

@@@@

الخبر الأكيد الليلة جابو ال Yahoo

وقال ست البنات إيميلنا مـي طارياهو

ست القوام Hardware نظامو براهو

غرامك Virus الهجعة البقرض الجاهو

ملحمة عشق طه وريا

ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا

ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا

رد: ملحمة عشق طه وريا