قصيده للشاعر حسن الدابي

قطرك من " كريمة " ادّو الاشارة وقام
لونك خافى للدهب المسوّا زمام
في " الكاسنجراب " اثنين دقيقة وقام
ودّاك " ام رهو" الساعة واحدة تمام
***
قام من "ام رهو" دخل الخلا اب غزلان
شقّابك جبال الرملة والخرصان
وداك " اب حراز" سوّاقو كان زهجان
زوّد سرعتو وخلاّ الارض دخان
***
ودّاك العصير فى " الكاب" شراب الشاى
شايل قلبى وزّينا بريتو براى
يا قلبى الصميم ما بقلبوك جاي جاي
ليه الليلة جنّيت وعدمت الراي ؟
***
من الكاب نهر طالب " كحيلة " " محيسة"
السواق عجوز عندو النفس والريسة
يا ام شلخا قضيب الكبرى فى التقييسه
زي ريش النعام فوق الفنايد ديسا
***
وداك التقاطع "لاب حمد" طالبين
ياكل فى القضيب وداكي رمشة عين
السواق حريص فى مشيهو ما بيلين
قال متاخرين نصل اب حمد لامتين
***
قام من اب حمد بارى البحر لى" اب ديس"
السواق حريص في مشيهو جابلو حديث
قاعدين فى بسط زايد بنا التحسيس
كم لله من المحبوب سمعت حديث
***
وداك" الشريك" نجم الوكت نوّرلو
السواق حريص اسقا وطلع صفّرلو
زي برق الظلام وكت الاشرجى اشّرلو
يسهك فى القضيب تقديرو ما تقدرلو
***
وداك " العبيدية " .. بكان ( ---- )
ما راضى القيام قام يبكى قبل الشرقة
فرقان الصدف وانا قلبى زايد حرقة
قاسى علينا يا اهل الكون طريق الفرقة
***
هاك وهاك في" بربر" اخدلو دقايق
مليانين عجاج يا عطشجى مالك ضايق؟
هدّن جيب لنا الونسة ومشيك الرايق
قبل الوصلة ..سائل الله يعيقك عايق
***
وداك "عطبره" المليانة بالعمال
الركاب كتار والله لا امثال
بالشباك تتوق تتفقد الاحوال
قالت لا تقوم خايفى المحل ينشال
***
قام من عطبرة وانا مانى راضى قيامو
كيف الشورة؟ والدامر قريب قدامو
حين قال قربنا وكشف لبلامو
الدمّاع جرت... حتى الخنادق عامو
***
فى الدامر وصل حتى الوداع غالبنا
يا ستّار علىّ اجمعنا يا فارقنا
يا رب يا كريم يوم الاحد رفّقنا
بى موت او طلاق محبوبنا يبقى رفقنا

احمد عبد الرحمن سيد احمد كتب:

قصيده للشاعر حسن الدابي

قصيده للشاعر حسن الدابي

رد: قصيده للشاعر حسن الدابي

رد: قصيده للشاعر حسن الدابي