سيدأحمد الحردلو يتغزل فى امدرمان

ياست الدنيا ياامدرمان

(1)
ياست الدنيا ...... يا امدرمان
يا ست الجاه ...... وست الشان
يادار البقة والمهدية..........
ودار عموم اهل السودان .....
ويا ست كرري وست الطابية
وست شيكان وكمان وكمان
ما انت محجة لكل انسان
وانت تسامح فى الاديان
فالسلام عليك يا امدرمان
ياست الدنيا وست الشان

(2)
ياست الدنيا يا امدرمان
ما انت نادي الخريجين
وثورة اربعة وعشرين
منك ازهري ومحجوب
الرفعو علم بلد حبوب

(3)
ياست الدنيا ياامدرمان
ما انت الفن
وانت مدينة الاشعار
وانت مساجد الاذكار
وفيكي كمان هلال مريخ
وفيكي كمان
وفيكي شتم
ورقص رقبة
والتم تم
امانة كمان بناتك حور
وامانة كمان رجالك نور

(4)
كيف بالله يا امدرمان
يخونك زولا ايكان
يجيكي بشيش وزي سراق
ويفجر فيكي ناراحقاد
ويسوي سماك ديكا رماد
ما انت القبه والامجاد
وانت البدري والاحفاد
وانت علم
وانت فهم
وانت للمساكين زاد

(5)
تسلمي .. تسلمي.. يا امدرمان
جوكي عشان يهاجر النيل
جوكي جوكي عشان يموت وياك كل جميل
جوكي عشان يموت فيك العديل والزين
سلمت .. سلمت .. يا امدرمان

(6)
ليكي سلام وتاني سلام
وليكي قيام .. وتاني قيام
ياست الدنيا .. يا امدرمان
وست الجاه
وست الشأن
وست النان..
سلمت .. سلمت يا امدرمان

سيداحمد الحردلو ــ الخرطوم ــ 11/05/2008

اشكرك اخى احمد عبدالرحمن
على المرور الانيق يديــــــــــــك العافيـــــــــــــــــة