منتديات القدار
نرحب بك في منتديـــــــــــات القدارالغرة القدار المغرة
@@@@@@@@@@@@@@@@


تعـــالو مـحـــل مـا الـمـحـنـة أيــــادي تقــطـر ســــــلام
سـمـاحـــة الـحـيـاة فــــوق أهـلـنا القدار يقــرقـر وئــام
تـدخـلــــوا وتقعـــــــــــدو في ســــــــــــــــــــــلام
بـســاط أحـمـدي كــم يـشـيلـنـا قـدارنا تـمــــام التمـــام
نتشــرف بتسجـيـــلك في منتــدي القــدار

محمد جيب الله كدكي

استعرض الموضوع السابق استعرض الموضوع التالي اذهب الى الأسفل

محمد جيب الله كدكي

مُساهمة من طرف كمال صالح في السبت 30 مايو - 5:41

با ولد فتح عيونك




يا ولد فتِّح عيونك ديل إنت من تالانا ليه قلبك غَفَل؟؟
إنت مقطوع أصلو ما عندك أهل؟؟
من زمانك في هواكَ تراكَا في لبس البِدَل!!
نِحن لا لُمناكا لا اْتْفَتَّشْنا لي زولاً سعَل
عاد هواكا دا حدُّو لا وين؟؟؟ إن باريتو لي حد ماب تصل!!
كُتْ قبيل بتقول أبوي بي مالو أبوي بي عيشو أبوي سايق البصل!!
وكُتَّ مستَقْويني بي قمحي المنورَق في تقاتو بَلا الجبل
وبالتِمير الفي الجراري مليِّسٍنُّو يشيلنا في ساعة الوحل
وفي فَرِقْةَ الدور ويوم السوق نسَرْبِق منُّو إن غِلا وان نَزَلْ
عاد السني دي من الكعوبيي!!! أصلو شوَّال ما فضل
مي المطر ضَرَّتْنا فيهو أصبحنا وحلانين وحل
نخَمْخِم فيهو مهرود لي غنمنا الفوق نقِلْبو رحل رحل
وبي تِحِتْ تِحْت امُّو في جاعورتو يِندَسَّ الجمل
أصلو زي دا من الله سوَّاني لا شُفْتو ولا حصل
ولي تَلاتْ ادوار تصيدني المَغَسة لا تِحِت ان نَزَل
وبي تِحِت فوق المِرِق مجدوعة مُلْفَحتي اْم عَبَل
وضارِب شُمَّارتي افتِّح في الجداول، ونَفَسِي قايِم لا مُرُوَّة ولا عَضَل
وراسي دايِشْ بالشَمِش وجسمي يدا اللِّتْوَكَلْ
والضِرِيس الكُتْ بلُوكْبُو علي العليهو يدا إتخَلْخَلْ نصل!!!
إن سعَل مني من تالاكَا داير انْشَقَّ طَرْرْرْ من الزعل
كم مشيت للبوستة ودَّر يومي ساكِت وانضَقَل
منَّ الجواب ناسيني ماك طاريني انا الماسك المحل
وانا لي منو اشتِل في الشتِل مي ليكا أريتو عنُّو شَتْلاً ما انشَتَلْ!!!
إن فتَّحت عينك وانعدل؟؟
دا يعجِبْني... وحبيل الوُد البينا اتقَطَع يكون يادوووووووبو بالتيلي اتفتل
أما اْن قصَّر حالِفْ ياني جاييك جاييك زول شَكَلْ...
حاج حمد إحمد فى العمل .. زولا بضربو بو المثل
من الله خلقو وقام معا سلوكتو ... ما ضاق السفر
طول عمرو فى البرود يزح ويقعد يداير فى البقر
وزمن السقط يعملهن كر من فلق وورق الشجر
لكين وليدو الكان زمان تعبان عليهو
ويقرى فيهو واديتو ليهو بلا المطر
دقش المدينى واشتغل دى اربع سنين فوقن شهر
راقد قفا وقاطع الخبر ومن عندو قلالة آب تصل
وخل أمو قالبى الواطة ملى تسوى
زول ورهيف دحين داير القفر
مرات يقولها ياولية اصبرى ما خاب من صبر
ومرات يقولها يبقى راقد موجعو شى
كان وردى ولا وجع ظهر
ومرات يقولها يبقى راح بارا الهواميق والسهر
بس غايتو قلبى على جناى وقلب جناى علي حجر
ومن ميسو دبا على كريمى وخش توووووف ركب القطر
لابسلو مركوبا نصيييييح وحاقبلو شنطة الت طفيح
لملم هدومو من الحبل شكاها فيها كسر كسر
وسداها بى كسرة جريدتا ناشفى عارضا زى كشر
وقالك كدى اتحكر قعد حكيرة جد
وجر من حرفو المتمر زين كمان قلم فطر
وقطارو ... توت توت توووووت كو نتل
دفق المى تب ما خلا جر
واتفكى ماشى مشى الرماد بقى فى القضيب يشكى العجل
وصوت السلك دا يسوى ززززن والدغفلى وقلبى انقطع
حاج حمد احمد قضى يومين فوق الحطب مانام شخر
ينوم بى وين ؟؟ دا قطر كريمي .. المي ملان لا عينو ديمي
وكتين يجى التمر ؟؟ مكمود كمد
والمنقة وكتين تستوى تلقاها للوكاي زرد
كترة كلف قايل شنو
وابا ما يشيلنا ود منو
عفشا جبال والدنيي حر جرا حمد احمد عرقو تر
وكتين يجى الكمسارى مار تلقاهو بالنطيت فتر
وتلقى الشكل ... لكين قبل يصل الكجر
الناس تعود للقرقراب وتلقى اللكل سوا والشراب
غايتو كدى وكدى فى القطر
حاج حمداحمد قضا يومين خير وشر
ولمالو فى ولدا بيعرف ولدو فى حقو انستر
وراهو درسو معا بعض
والليلى جيرى جوار بعض
ويوم التلاتا من الصباح
اتفكو من قطر المرض
وداهو لى بيت ولدو داك البي هناك بلاخبر
وخلاهو روح جاى ينوم .. فعلا غمد
وتلاتا دقت بى هناك انكان وقف حيلو انسند
وناس المكاتب لى ورا .. تب مافى زولا انكرم
وكان ولدو عاد من جملتن
للسوق غشا وشال الرزم .. ودافس ركب باصن يئن لامن وصل
شايلو اكياسا غلاد توستا وعنب باسطة وعسل
شيتن كتير بالحيل يأكل كم نفر
ويقدل عليك يالله كو للباب دفر
ولقى ابوهو قدامو اتهجم
وقبال يسالمو وقف سعل
إي ؟؟ ابوي ؟؟؟؟
ياب ما معقول الجابك شنو ؟؟؟
ياولد تنقطع ريحتك
يعنى مستغرب اكنو بلاخبر جيت
وفتحتك للباب لقيتنى انا جوا فى البيت
ما دام ياب ضراع كم اجازى قضيت شن بسوى
ترانى قمت معاك طبيت
وقمت ساكت لى الله سهلى الطريق وفى القطر لمانى ولدا ليك رفيق
اقيف اسمعني روق .. قالى قارى معاك كلية الحقوق وبيتو منك جبدا ساكن قبلي فوق
عندى قلبا عليك كيفن حنين ومااااااااااااب تعرفو بلا تسويلك بطينين
تبكى امك زاتا كانت جاي لكين
بيتنا ماب يتفات وخيانك صغيرين
وماشفتا غناها ليك البى الجرانين
الشى نضما كلو يهرد فى المصارين
مرة بيهو تنونى ومرة تحصنك زين
وتقرى ايت الكرسى ومرة معاها يس
ياولد ... اتقونن شوى اوعك من الدين
هسع الخميتو جبتو دا كلو من وين
لاتبقى خدمتك فى الدلاقين المهم فى البنك وفرلك ملالين
جيت اسوقك للعرس لاتقولى ملحوق باقى امك ديك هناك مقلى قلى بالشوق
لابتين تقعد هنى وراسك دا مطلوق
المحل بندر كمان عيشتك من السوق

كمال صالح



ذكر عدد الرسائل : 48
الموقع (المدينة) : السعودية
العمل/الترفيه : ببيع تسالي
تاريخ التسجيل : 14/05/2009

القدار
القدار: 2

الرجوع الى أعلى الصفحة اذهب الى الأسفل

رد: محمد جيب الله كدكي

مُساهمة من طرف محمد علي سكوري في الأحد 31 مايو - 12:45

الأخ عابر طريق شكراً لك
على هذه الدرر للشاعر محمد جيب الله
ونتمنى منك المزيد وتواصلك الدائم
تحياتي

محمد علي سكوري



ذكر عدد الرسائل : 262
الموقع (المدينة) : المملكة العربية السعودية -الرياض
العمل/الترفيه : طالب
تاريخ التسجيل : 19/11/2008

القدار
القدار:

http://fox2010.mam9.com

الرجوع الى أعلى الصفحة اذهب الى الأسفل

رد: محمد جيب الله كدكي

مُساهمة من طرف حسن موسى في الإثنين 1 يونيو - 0:50

اشكرك على رائعة كدكى

كمال القصيدة زاد من جمالها
فى انتظار الجديد
تحياتى.....................

حسن موسى



ذكر عدد الرسائل : 405
الموقع (المدينة) : السعودية
تاريخ التسجيل : 12/02/2009

القدار
القدار: 2

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى