منتديات القدار
نرحب بك في منتديـــــــــــات القدارالغرة القدار المغرة
@@@@@@@@@@@@@@@@


تعـــالو مـحـــل مـا الـمـحـنـة أيــــادي تقــطـر ســــــلام
سـمـاحـــة الـحـيـاة فــــوق أهـلـنا القدار يقــرقـر وئــام
تـدخـلــــوا وتقعـــــــــــدو في ســــــــــــــــــــــلام
بـســاط أحـمـدي كــم يـشـيلـنـا قـدارنا تـمــــام التمـــام
نتشــرف بتسجـيـــلك في منتــدي القــدار

الشعر الشايقي للاضافه والتعليق

استعرض الموضوع السابق استعرض الموضوع التالي اذهب الى الأسفل

الشعر الشايقي للاضافه والتعليق

مُساهمة من طرف ساتى محجوب يس في الجمعة 22 مايو - 3:46

بلادي أنا

بلادي أنا بلاد ناسا مواريثم
في أول شي ..كتاب الله
وحصان مسروج، وسيف مسنون حداه درع
كتاتيبم تسرج الليل مع الحيران
وشيخا في الخلاوي ورع
وكم نخلات تهبهب في جروفا الساق
وبقرة حلوبة تتضرّع وليها ضرع
بلادي أنا
تشيل الناس
كل الناس وساع بالحيل وليلا يسع
وتتدفق مياه النيل على الوديان
بياض الفضة في وهج الهجير بيشع
بلادي سهول ، بلادي حقول بلادي الجنة للعاشوها
ولي البرّة بيها سمع
بلادي بلد ناساً تكرم الضيف
وحتى الطير يجيها جعان ومن أطراف تكيها شبع
بلادي بلد الصفقة والطنبور وجاراتن تنق بالليل
وبنوتن تحاكي الخيل
يشابن زي جدي الريل
بلادي أمان ، بلادي حنان وناسا حُنان
يكفكفوا دمعة المفجوع
ويبدّوا الغير على زاتم
يقسموا اللقمة بيناتم
ويدّوا الزاد حتي ان كان مصيرم جوع
يحبّوا الجار
يموتوا عشان حقوق الجار
يضوقوا النار عشان فد دمعة
وكيف الحال لو شافوها سايلة دموع!
ديل أهلي .. واللــــــــــه ديل أهلي
البقيف في الدار في نص الدار
وأقول لي الدنيا. كل الدنيا ديل أهلي
عرب ممزوجة بي دم الزنوج الحارّة
ديل أهلي .. ديل قبيلتي لمّن أدور أفصل للبدور فصلي
ديل فصلي
أقول بعضي
ألاقيهم تسرّبوا في مسارب الروح
بقوا كولي
ألاقي قلبي والإحساس
وسافر في بحار شوقم زمــــان عقلي
أنا محل قبّلت ألقاهم معاي ، معاي زي ضليّ
أنا لو ما جيت من زي ديلا وا أسافاي ، وا مأساتي وا زّلي
تصوّر كيف يكون الحال لو ما كنت سودان...
وأهل الحارّة ما أهلي

ساتى محجوب يس



ذكر عدد الرسائل : 127
الموقع (المدينة) : الفاشر
العمل/الترفيه : مهندس
تاريخ التسجيل : 27/03/2009

القدار
القدار: 2

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح محمد خالد في الجمعة 22 مايو - 20:51

وقالوا حتي اعجزوا الحروف واندهشت المعاني
يا وطن حبك متكن جوه ما بين المفاصل
قلنا لازم ناخد اجرك ونرفض الكان فيك حاصل
ومشتهيك انا با بلد كم بي من فرقك صبابا
وليك راجع يا بلد عشان اداري افكاري من وجع الكتابة
وغناها صديق احمد وتراصت الالحان والحروف تجسد المشاعر والمعاني كائنات تسير علي قدمين وساقين
وتطير بنا فلا ندرك لنا مرسي
لقد ابدعوا يا ساتي ورموا بعيد خلاص
اعماق تنقطع من دونها الانفاس
حبك عقيدة ومبدا
ريدك لي طريق انا منو لازم ابدا يا زينة العمر
من الازاهر اندي
يا ضي القمر
يا المنو صافي واهدا
وغريبة ما بكت العيون في يوما داك
يوم انكتم نفس القليب الكان بشيل هوي من هواك وهذا غور بعيييييييييييييييد
صالح

صالح محمد خالد



ذكر عدد الرسائل : 117
الموقع (المدينة) : khartoum
العمل/الترفيه : eng
تاريخ التسجيل : 09/04/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف ساتى محجوب يس في السبت 23 مايو - 17:54

شكرا ياسيد الشعر ولكلم ايضا
[الرائعه (معزور)






( معذور )
معذور لو قلبي اشتهاك ما إنت عارف فرقتك ما بيحملا القلب الهواك
معذور

دا مناهو يوم ما نتفرق يا ريتو كان يفضل معاك
لو بي مرادو يقوم يجيك تلقاه بين ايديك حداك
متمني ألحق بيك سريع نتلاقى والأشواق هناك
جاييك هارب من سنين جاييك واقع في حواك

غلبو النواح يوم فُرقتك بالدهشة خانس إتعبر
ما بين نوازع الروح إليك هايم وبين حُكم القدر
ما اتزعزع الإيمان جواه ولكنو في الآخر بشر
قايل عليك شدة وتزول ما قايلك إنت علي سفر

ما كان هو فاهم يومو داك إيه ضحكة البرق اللصف
ولا كان هو شايف للهموم الجاية واقفات ليهو صف
ولا كان هو حاسس بالغرام الباني في الغيم إتنسف
لقى نفسو فجأة بلا وجيع مفجوع ومفقوع بالأسف

يا ريتو كان وقف الزمان قبال تروح صدَّ ورجع
ما كان غشانا الحزن يوم لا فُرقة بيناتنا بتقع
كان لا رثيتك لا بكيت لا قلبي فيك يوم إتفجع
وما كان قدر ذكراك صِبح يومها التزور مُره ووجع

معذور… لو قلبي اشتهاك

ساتى محجوب يس



ذكر عدد الرسائل : 127
الموقع (المدينة) : الفاشر
العمل/الترفيه : مهندس
تاريخ التسجيل : 27/03/2009

القدار
القدار: 2

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح جلال في الأحد 24 مايو - 3:39

وقالوا ياساتي كمان من القصايد الجميلة جدا
حبل الصبر للراحل عبدالله محمد خير

أمـسـك حـبـل الصـبـر خـلـو قلـبـك لا يبـقـي نــي
أصلـو ود أب زيـد كـل يـوم مــن بلـدنـا يـرحـل جــدي
شــن بسويـلـك عــاد أنــا القبـلـك الحـرمـان مـــر بـــي
والضنـا الهسـا عليـك زاد مـن زمـان أنــا زايــد عـلـي
كـم حبيبـا شغـل الفـؤاد فـي العيـون كـان متـل الصـبـي
حـل بـي (توفيـق) السـواد مافـي زول قـال كـفـاره لــي
أرقــى يــا رحمن ودعـــت قـبـلـو كـــم قـمــره مـنــوره
وكم تحـف نـادرات سافـرن وكـم فراشـه وكـم جوهـره
وكــم قـلـوب متـلـك بالـفـراق الأنـيـن والـشـوق سـهـره
شوف عوض عبدون الحروف خل مـن باطنـه ظاهـره
يـا عـوض مدرسـة الشعـر بــي جــداره إيــاك نـاظـره
بي غناك حرف السيـن بقـت فـوق بنـات جيلـه مبطـره
سـابــك الـلــى بـلــد الـجـلـيـد ودعــــك ودقّ مــغــادره
يــا قـلـب مـالـك انـجـرح ولـسـه لـيـه جـرحـك مـابــره
أمــا أنــا المسكـيـن الـظـروف غــرزت فـــي أظـافــره
ويـن غنـاي لـي شـتـل الـجـروف والجنـايـن وأزاهــره
أسألوا الدرويش عن صديق عمرو كم جمرات عاصره
خـلـو يحكيلـكـم عــن حـيـاه النجيـفـى الـهـو مـعـاصـره
الككـر يـا رحمـن زمـان ضـاع مــع العـشـاق شـاعـره
مانـفـع تغـريـدو الحـزيـن مــا نـفـع صـــدق مـشـاعـره
جنـنـو (البتوفـيـق) رحــل وهــام ورا الـقـام بالـبـاخـره
خــلا دنيـاهـو فـرنـدقـس مـــا عـــرف أولـــه وآخـــره
أرقـى يـا رحـمـن فــي السـمـاح مـافـي بـلـداً بتجـاكـره
الله مديـهـا سمـاحـه صــاح مــن كـروهـا ولــى تـكــره
أصلـو ود أب زيـد معتـرف بـي جريمتـو ومــو نـاكـره

صالح جلال



ذكر عدد الرسائل : 84
الموقع (المدينة) : هجلیج
العمل/الترفيه : مهندس
تاريخ التسجيل : 15/02/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف ساتى محجوب يس في الأحد 24 مايو - 18:40

أمونة بت الشيخ حمد
ابوها كان مزواج خلاص
ناسب جميع ناس البلد
ميلادها كان عرسا كبير
هيصة وضبايح مالها حد
يوم السماية اتيتمت
حكم القدر فى الام نفد
كانت شبيهة امها
فى القدلة والعوداللبد
وبقت امل كل الشباب
وجمالها فى بت ما اتوجد
فى مرة رفة قليبا يوم
حبت قريب الشيح حمد
واظن كمان حباها هو
سوى الضلوع لى حبو سد
كاتمين غرامن فى القلوب
ولع لهيبم ما برد
خايفين يصارحو يقولو
شومال بالدايرنو ست
خايفين عيون الناس
تشوفم والخبر يملأ البلد
والحب هناك عيبا كبير
لا بت تبوحبو ولا ولد
فى يوم ابوها ضحك كتير
برم شواربو بلا الاسد
ناداها امنة تعالى جاى
فوق البرش ربع قعد
قالتو هوى جاياك خلاص
قليبة فر وما رقد
حاج الخضر عارفاهو داك
قالتلو ايوة ابو سند ؟؟
جانى الصباح طالب ايديك
داير نسب شيخ البلد
وانا قتلو اهلا بيك تعال
يومين تلاتة تكون عقد
راجلا عظيم عندو القروش
عندوا الحرير راقد لبد
هو كمان كريم واخو رجال
ماعونو فى يوم ما برد
جرن الدموع من عينا شو
سكتت وابت تديلو رد
قام مرق خلاها فات لا سبة
لا كايس غرض
عند المغيرب تانى جاها
كدى لى محاسن الحاج سرد
داير يأثر فى قليبة
لو كان تقول تديهو رد
وقتا غلب واحتار خلاص ولع
فؤادو جمر وقد
فسر سكوت البت رضا
جهزولو لما الناس عقد
والمال مخمخم والحرير
تحت الرجول مدوهو مد
يوم الصفاح والناس تجوط
بالفرحــــة مقلوبة البلد
امونة تبكى بكا السواد
بدل الفرح جاها النكد
وبشيشى قامت للمروق
فى سرقة ما حس بيها حد
كان الحبيب راقد هناك
والصدمة قادة قليبو قد
وقفت قصادو بكت كتير
لامن دميع العين جمد
قام جاها بى شوقو الكتير
وقليبو داك انهد هد
قالتلو ما بى ايدى شى
ديل ناس ابوى وابو سند
اتلملمو وسووا الكلام
وانا لا رضيت لا جبتا رد
داك عندو مالا مو قليل
وابوى شاف المال سجد
ادانى للراجل العجوز
المن عروقو الدم شرد
قايلنى بسعد بالقروش
ولا المراح الفات ورد
لكن محـال اسعد بلاك
كان السماء ينهد هد
بديك قليبى وروحى ديل
وأعيش هناك صورة وجسد
اتراجعت رجعت تصد
لكن قليبة رجع رفض
مسكت دريبا مو قريب
كم بيهو صف بنوت ورد
قاصدة البحر دايره تموت
لا عيشة لاهم لا نكد
اترددت وقفت كتير
لامن قليبه خلاص صمد
شافت مسار النيل حزين
حتى النخيل حزنان خمد
وبشيشى فكفكت الحرير
لا زينة لا ربيط عقد
ما دام حياتا بقت دموع
وقليبة من زولا انفرد
قالت اخير ارتاح خلاص
ارسى وشقاى القالو حد
فى لحظة موج النيل علا
وفى جوفو غابت للابد

ساتى محجوب يس



ذكر عدد الرسائل : 127
الموقع (المدينة) : الفاشر
العمل/الترفيه : مهندس
تاريخ التسجيل : 27/03/2009

القدار
القدار: 2

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح جلال في الأربعاء 27 مايو - 4:18

و هاك يا ساتي من اجمل كلمات ود ابنعوف:-
عيني بالدموع ملياني:

عيني بالدمـوع مليـاني عيني بالــــدموع مليانـــي
ماعـارف المحن بمشيلا ولا هي قاصــدي تتلقاني
***
ليه ما اكتب غنـاي بدمعي وامزج بالحزن الحاني
اشعار تحكي عن مأساتــــي تشـرح للبعيد والداني
***
داير اقـــولا ياخلق الله ياخلق الله مــــــالو زماني
لارحم الصغر في صغري لارحم الكبر في كياني
***
الناس في سعــاده وبهجه انا بحر الهمـوم ضماني
وين قـــارب نجاتي آخلقو ولا انا دايمــا الأخراني
***
ياريت السعــــاده قريبي كان تسمعني أو تلفـــاني
لكن كيف أصيـح ليها والعبرات معضــــي لساني
***
اهرب من دناي وين أمشي ياريت الامــاني اماني
طال ما الدنيا ياهـا الدنيا طال ما ياني ياني انا ياني
***
ياسجم السجم يابخـــــــــتي ياحظــي المولي وفاني
كيفن في الشقــــاوه عترتا والخير فاتني وإتعــداني
***
اه يامرتـــــــي المليــــــوكه يانار قيدي قيـدي وتاني
من مغصا مقطع قلــــــبي في جــــواي كاتمو لساني
***
اه ياقدري كـــون في همي راجيك من قبل ترجـاني
هـــــــم وأحـد بودر سيدو متلمــات علـــي تمــانــي
***
في ها الدنيا شــن ســويتا متعـــــــذب كانـي الجاني
شان لاتبــتا لااستغفرتا من حب زول مـلك وجـداني
***
حتي الكان كفر بي سببي دا بي صور الجمال أغراني

صالح جلال



ذكر عدد الرسائل : 84
الموقع (المدينة) : هجلیج
العمل/الترفيه : مهندس
تاريخ التسجيل : 15/02/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح جلال في الأربعاء 27 مايو - 4:21

وهاك واحدة تانية لمدة اسبوع :
سماحة عيونك
ود ابنعوف

تشيلك تهاجر بلا إغتراب .. تثير في شعورك حلاوة العذاب
عجيبات عيونك عيونك عجاب
***
عيونك تحير عقول الشباب .. تعاين تغرود تقولك حباب
تقود لي عوالم الهوي المستطاب .. عيونك تعاويذ بتشفي المصاب
***
عيونك تشكل فواتح كتاب .. كتاب بين سجله الدعاء المستجاب
قلوب خاشعة تطلب جزيل الثواب .. دراويش ونوبه ومدايح شباب
***
مطيرة تبشر تبل التراب .. تساري وتفرح عطيش اليباب
يضاحك بريقا رواحل السحاب .. تصحي الأماني يخدر سراب
***
عيونك تجهجه فصيح الخطاب .. يحاول يعبر يخونه الصواب
يعاين رموشن تجذبه إنجذاب .. يصارع هواهن يكون فكره غاب
***
سماحة عيونك يقولوا الصحاب .. سماحة غنانا ونغيم الرباب
البفصل منانا وحديث كل باب .. (البشاهد) عيونك يكون غاب وجاب
***
سماحة عيونك رجوع للعقاب .. وكليمة أحبك تبروز خطاب
سمرنا وحجانا ولذيذ المطاب .. وقميرة فريقنا التتاوق الضباب
***
متين لي عيونك بتصبح قراب .. وأشوف الحنين في صفاهن مذاب
يشع فوق قليب بينه بينك حجاب .. يخاف التلاقي البعقبو الغياب
***
عيون في جمالن تسام الرقاب .. وعشانن يهونن قواسي الصعاب
سؤال لي جلالك يدور الجواب .. منو الشاف عيونك ورجع تاني تاب ؟

صالح جلال



ذكر عدد الرسائل : 84
الموقع (المدينة) : هجلیج
العمل/الترفيه : مهندس
تاريخ التسجيل : 15/02/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف ساتى محجوب يس في الأربعاء 27 مايو - 20:58

الى رحم امي
كلمات حاتم حسن الدابي

(خطاب الطفل لاخية الجنين)..



صيغة خطاب مكتوبه من قلب الولد
من جوف طفل لحظاتو بين مره وشهد
لسع ما عرف طعم الحياة ويادوبو لسع في المهد
كلنو كان يعرف تمام غير انو مخلوق في كبد
كانت رسالتو دروس حياة في الزهن تسكن للابد
فيها المداد دمعة عيون منسابه الهبة الغدد
كلماتو من معجم لغات الدنيا كلها تستمد
مظروفا جوف كاتم انين فياض دوام ما ليهو حد
والطابعه كانت قبله من بين الشفاه مختومه بي صبر و جلد
عنوانا كان ظاهر مبير من غير حروف اللا اسد
الي رحم امي وختي قوس قبال يقفل القوس قصد
يكتب كلام شان يلفت الانظار قصد
مضمونو بين قوسين يقول( ممنوعه ما يقراها حد)
وكان الخطاب عبر البريد السري حافظ المستند
في ذبذبات هذت دواخل امو لهبا ما برد
لمن صرخ ومسك الثدي واتواري في حجرا وغمد
لما الخطاب وصل الرحم بقي نطفه يادوبك تعد
تكوينا ما وصل المشيج في علقه منتظره المدد
لكن قدر يحكي الظروف الجات عليه بلا وعد
حكي لاخوه وقال كلام لابد من يلقالو رد
وكان الحدث صحوة ضمير علاما حلال العقد
دي رساله من طفلا صغير حكي لاخوه وقال سرد
********
دنيانا ما دنيا واحلامنا ما احلام
دي حقيقه ما رؤيا وقالو السبب اقسام
لو ليك كتب تحيا ضي عالم العلام
طال شوقي لي لقيا وخايف من الايام

بالله زنبنا ايه من قبل نتلاقي
نرد الغفار والتيه في الدنيا نتشاقا
ليه شجرة الوالدين يتحتو اوراقا
ما نلقي جيم لسين غير المعيشه اقسام

انا شوقي لجيتك دايرك معاي رفيق
بي جيها خايفلك عيشت نشاف الريق
انا نيتي زي نيتك لمت شقيق وشقيق
سالكين طريق مسدود ما بمشي لي قدام

انا داير احكي لك احوالي بالتفصل
انا كالضفاف مخضر كانت حياتي قبيل
لكن بدين اصفر لمن هجرني النيل
اسع بقيت مجبر اتحمل الاقدار

العيشه بين والدين من مده متفرقين
زي المياه والطين وفقد النظر للعين
بيقلوا مشتاقين شاربين كؤس البين
كاس الوداد في الحين اصبح شرابو حرام

ما راعوا للجاين وما قدروا المولود
واظنهم ناسين الجاي والموجود
حتي الشرع والدين اتناسو ليه حدود
لما الصحف رفعت وجفت الاقلام

والليله ندمانين ايه الندم بيفيد
خلوني باكي وحزين عايش فرد وحيد
زي زهرة الياسمين من ايد اروح لي ايد
قطعوا الشديد ومتـــين لا غربه لا ارحام

انا داير اوصيك اصبر علي البلوه
ولا بد تلاقيك المره و الحلوه
كل العشم فيك انك تكون اقوي
من كل بلاويكا دنيكا تبقي سلام
ودنيانا ما دنيا واحلامنا ما احلام..

ساتى محجوب يس



ذكر عدد الرسائل : 127
الموقع (المدينة) : الفاشر
العمل/الترفيه : مهندس
تاريخ التسجيل : 27/03/2009

القدار
القدار: 2

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح محمد خالد في الخميس 28 مايو - 19:49

ما قلت ليك من قبل ده
ساعد عواطفك ساعدها
يا خوي
قلت ليك ده غور بعيييد
بتغرق جب
ديل وصلوا المدي
لكم حبي ساتي وصالح الاخر
صالح

صالح محمد خالد



ذكر عدد الرسائل : 117
الموقع (المدينة) : khartoum
العمل/الترفيه : eng
تاريخ التسجيل : 09/04/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح جلال في السبت 30 مايو - 4:30

شكرا الاخ صالح علي المرور والمشاركة والاخ ساتي وهاك

مرارة اللقيا


وكت الزول يقابل زولو ما يدي السلام في تلاقي
الله من مرارة اللقيا في لحظة عميرو الباقي
****
يا سابل النظر تالاي مالك ما بتعاين لي
خايفة تشوفي حالي الفيهو ما انتي الفرضتي علي
حزني عليك اقول اخفيهو يفضحني ويبين في وشي
ما بين الحزن والذكرى تمتزج الدموع باشواقي
****
لا لا انا ما بكيت من ضعفي نفسي انا في هواك ابية
باكي علي ضياعك انتي اتنين راح يروحو ضحية
لو حكمتي نفسك تلقي بينك وبيني مافي قضية
الا بس الاباليس حامو واغروك ترضي بيهو فراقي
****
مهما ابعدوك منو دربي مهما قالو ليك وقالو
برضك عندي زي ما كنتي ياكي منى القليب وآمالو
قبلان بالشقى وراجيك ما الحب في شقاهو جمالو
لو ضاعت عهود الريد انا الوفا شيمتي واخلاقي
خليهم يساسقو ويجرو كل زولا فعالو قبالو
ان كان قدرو حققو غاية بي دجل الفقير وضلالو
معقول ارضي كتر ميسونا والطير ضحى شان اطفالو
****
مش لو كان عرق او ورقة لو جا الشيخ مع العرافة
وايه يعني الخصام بيناتنا عشان ناس المحبة سماحة
والفي قلبو اكبرواقوى من اقسى واشيلو قباحة
عنك قلبي ما متخلي لو قام السبيب في الراحة
راجيك يا منايا تطلي لي ابواب عذابي تتاقي
متأكد تكوني حسبتي فراقي وهسا ما مرتاحة
بينك وبين ضميرك عارفة بس ماك دايرة تقولي صراحة
معليش حاولي تاني وتاني لا بد الوصول للواحة
قلبي معاك خطوة بخطوة يا فرحي وشموس اشراقي

صالح جلال



ذكر عدد الرسائل : 84
الموقع (المدينة) : هجلیج
العمل/الترفيه : مهندس
تاريخ التسجيل : 15/02/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف ساتى محجوب يس في الخميس 4 يونيو - 20:49

سوقني معاك يا حمام
للرائع حميد
سوقني معاك يالحمام
... ...
سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منام
... ...
سوقني محل ما المحنة
أيادي تقطر سلام
سماحة الحياة فوق أهلنا
وبلادي تقرقر وئام
... ...
غلابه وأمان مو الطيابة
ضكارى بصارى وكرام
حبابه الحبان في بابه
وتدخلوا عليّ الحرام

فقارى ولكن غنايا
غنايا بهذا الغمام
بهذا النيل كم تغايا
وتيرابا النرميهو قام
... ...
إرادة القمره البتقدر
براها تضوي الضلام
شعاع شمشاً ياما خدّر
وإذا يبَّس لا يُلام
... ...
فيابا خرابا الحرابة
وخرابة فكر سوسي سام
خرابة الكل نفسو تأبى
عقابه .. تلِم عم سام
... ...
ولِيد مخلوق للقرايي
خزين مدخور للجِسام
تتمر نيتو التخايي
إلاما مذهلل إلام

درب من دم ماب يودي
حرِب سُبّه .. حرب حرام
تشيل وتشيل مابِ تدِّي
عُقب آخرتا إنهزام
... ...
بطانة الشيطان قديمِة
وبعد دا منو العرشو دام

إذا الإنسان ما لو قيمِة
علي إيش خلَّفُو سام وحام
... ...
تعالوا الدم ما هو مويةِ
ولا ها ترايي المسام
أخويا وطراوة الخوة إبتسام
... ...
تعالوا نحانن بعضنا
تعالوا نحانن بعضنا
نخل قلبو على التُمام
نبضنا يشهل أرضنا
وأرضنا تجِم العضام
... ...
تعالوا بدل نبني ساتر
نخيب ظن الصدام
نطَّيب للعازه خاطر
نقوم لأطفاله سام
... ...
أخير كرّاكةً بتفتح
حفير وتراقد الركام
أم الدبابة البتكشح
شخير الموت الزؤام
... ...
تعال لي غابتك يا خيرا
تعال لها يا أسده الهمام
بدل دوشكة يغني طيره
محل قنبلة عش نعام
... ...
بلد صمَّي وشعب واحد
عصية على الإنقسام
أبيه وبكراها واعد
صبية ومشهاده تام
... ...
بساطه أحمدي كم يشيلنا
وتشهِّلنا على الدوام
نَقِل ليلنا تقوِّي حيلنا
ودليلنا تمام التمام
... ...
نلقّم سقف المتاهة
نجم هدّاي في الضلام
ونطعِّم حرف النزاهة
لإيئلافك يا حمام

ديموقراطية وأمان
سوا .. سوا عالين مقام
مواريثنا المن زمان
محصَّنة في أروع نظام
... ...
بريدك يا زول بريدك
بعشقك حتّى الهيام
أريحيتك عد تزيدك
مهابة وليك القيام
... ...
عهدي معاك يا حمام
حبِيْب الرُسل الكرام
رسول الأمراء العظام
عصامي على ما يرام
... ...
ماب تهدِل في خنادق
ولا ب تقدِل فوق حطام
ولا ب تنزل في فنادق
وسطنا مراعيك قُدام
... ...
فيا ملدوغ من أديس
معوَّق في كوكدام
تعال عمِّر فينا ميس
كفانا طشيش الكلام
جناحيك جنوب شمال
وأمش طوِّف يا حمام
محِل غصن العزّة مال
عليك وعليهُو السلام

حكيم الطير يا مهبِّر
شُراكة القَتَلة اللئام
متين بإسم الحق تكبِّر
وبالرحمة تصلِّي إمام
... ...
فلاحة العالم تعمر
محبّة مودة ووئام
يقص الايد التدمر
تشمِّر ساعد السلام
... ...
سوقني زمن كُلُّو عافي
نتاجو عِلم خيرو عام
بري آيمة من المنافي
وطن وافي على الدوام

ساتى محجوب يس



ذكر عدد الرسائل : 127
الموقع (المدينة) : الفاشر
العمل/الترفيه : مهندس
تاريخ التسجيل : 27/03/2009

القدار
القدار: 2

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف ساتي السيد في الجمعة 5 يونيو - 2:15

ابداع بلا حدود افاق واسعة رغم جهل كثير من شعراء الشوايقة لكن فاقوا كثير من الشعراء المتعلمين ودا برجع للخيال الخصب والبيئة المشبعة بالعاطفة والفن والالق ..

لك التحية اخي ساتي وياريت لو سمعتنا من أشعار علاء الدين وشئ من اشعار خالد شقوري ..

ساتي السيد



ذكر عدد الرسائل : 124
الموقع (المدينة) : الخرطوم
العمل/الترفيه : مهندس
تاريخ التسجيل : 02/03/2009

القدار
القدار: 2

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف كمال صالح في الجمعة 5 يونيو - 16:27

ساتي محجوب يشوت والباش صالح يستلم ويعكس.



هاك دي ياساتي السيد (كلكم سواتي كده).

ياالشايل شمسك
(شقـــــــــــــــــوري)
يا الشايل شمسك في جواك خليها تبين للناس تطلع
يا النازع فرحة والدة هناك غير حس آهاتك ما بتسمع
******
يا الناسي اللبقة المفتوحة دي بلاك طوريتك ما بتقرع
المنجل في راس التمرة ناسيهو وامك ما بتطلع
الكتقة وقعت والحملان في اللوبي بقت تجري وترتع
والزير الفي بيت الضيفان حرمان لا نزّ ولا نقع
******
يا السبت عقابك وروحت وحيات عز بلدك لا تنجع
الشتلة تقولك لاتنجع الواطة تقولك لا تنجع
الحوض الما رفعت سرابو ينادي يقولك لا تنجع
الحبل الما تميت وسيرو يهاتي يقولك لا تنجع
والنيل الفي واطاتنا ترع بيقولك ازرع ولا تنجع
******
ماك فاكر يوم داير ترحل وابوك الحاج شايلو عصا
لا حيلو وقف طقش الابريق اندفق سال فوق المصلاة
قام بارى الحيطة واتوكل ويقوم فد مرة ومية يقع
ويقولك يا المبروك ارجع
******
ارجع ارجع يا زول ارجع غير ارضك عاد ما بتلقى بطاح
شن داير في بلدا والناس ما فيهن حاس وما فيها صباح
الليل الويل مليان اتراح الويل الليل مليان اتراح
بياع بيقول افراح افراح زي البيقول تفاح تفاح
******
مجلوبة الفرحة ومفروشة من ضحك الناس دايرين ارباح
لو كان في ايدن ملك الكون كان لمّو عبير الزهر الفاح
كان علمو نفس الزول العاش في سدر الليل داير يرتاح
كان حجزوا الغيم في واطاتو وكان آمسكين باعو الارواح
******
وين تلقى الفرحة وتتهنى في دارا ضيقي ومافي براح
جم ناسا من عين العطشان تخطف ومضات البرق اللاح
******
سايب اهلك ونخلك راحل قول وين ماشي وين آ صاح
الشمس النايري ابت تطلع النيل يا زول اصبح رحراح
الضل قصر ما غتى رويس ولدا ساكب عرق الكداح
الواطة ابت تديك الخير ولا انت عليك ما هابي رياح
******
قولي وين ماشي ووين غاشي ولي شن سايب بلد الصلاح
النسمة ان جاتك بتجيك ملياني عبير عند الفياح
الموية ان داير تلقاها نقاعا واطيب من الراح
ان درت نغيم الموج تلقى وان درت كمان الطير صداح
******
ارجع ارجع يا زول ارجع
الضحكة هناك من جوة الجوف الفرحة هناك ما فيها الخوف
الشقى ارحم في ضل النيم وبعيد من ناسا واقفة صفوف
جم ناس حبان تلقى المكسور مشيول في كتاف واحد مكفوف
الجن الاحمر فاقد الحيل في خلوة حاج الخير مكتوف
دكان الشيخ فوق الواطة كيمان كيمان ما فيهو رفوف

كمال صالح



ذكر عدد الرسائل : 48
الموقع (المدينة) : السعودية
العمل/الترفيه : ببيع تسالي
تاريخ التسجيل : 14/05/2009

القدار
القدار: 2

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف كمال صالح في الجمعة 5 يونيو - 18:08

شـــــــــــــــــــــــــــــــــــــــــوق
وحنــــــــــــــــــــــــــــــــــــــان
وريـــــــــــــــــــــــــــــــــــــــد
(علاء الدين عبد الرحيم)




رويان من قليبك يمه شوق وحنان وريد
غرقان فى عفوك والله من ماقم وليد
***************
يفضل فى القلب ذكراك مهما اكون بعيد
كل مازاد عفوك علىّ اقول هل من مزيد
ماسافرت أشان ارتاح اعيش هانى وسعيد
ولا هم العرس يايمه كان بيت القصيد
***************
لا تقولى إنو فات خلاكى جافاك الوليد
شاغلاه المداين العايمه آسراتنو غِيد
ما بشغلنى عنك حاشا لا مال لا وليد
ولا بتمنعنى شوفتك يمه اغلال الحديد
*************
ما كان قصدى هجرك يمه لما رحل بعيد
قصدى امسح دموع بالحسرة جارية على الخديد
لا تلومينى إن قصرت او إتأخر بريد
ما هو جفا السبب والله ما نسيان أكيد
************
بين اتنين وليدك يما بالو صِبح شريد
بين يرضيك وبين يا والده يرضى طموح عنيد
رضاك يايمه كل منايا وغاية ما اريد
تحقيق الهدف ما ببقى بالتمن الزهيد
***************
يومي قليبى فى ذكراكِ يجترً ويعيد
طيفك ما ببارح لحظة حامينى الغميد
الله براهو عالم يمه مشغول بيك شديد
ومنايا جنبك اعيش والله لو كان ليا ايد
**************
لازم يما أنسيك الشجن واللوعة والفرح الوئيد
لازم تنسي زمناً فات وتعيشى زمن ولِيد
لازم كل تعبك فينى اتعبو فيك وازيد
ولازم اشيلا همومك وألبسك الجديد
************
دينك فوقى ما بتحلا لا يوم الوعيد
شبابى فِداكى وكان ما كفى ليك عمرى الوحيد
ما بتلهينى عنك دنيا وما بمسكنى قيد
ما إنتى الفرح والراحة والهوى والرصيد
***********
ليكى سلامي ما محدود من الأرقام يزيد
عدد ذرات تراب الكون جبال وسهول وبيد
عدد ما أشرقت أنوار وطلّ صباح جديد
وعدد ما نسمة هبت باردى داعبت الجريد
***********
كلو منايا تلقى العافية والعمر المديد
تفرحى بيا يوم الفال تباركيلى الجديد
يوم داك بالفرح نتباكى ونتقالد شديد
وتبقى الدنيا بسمت ليا وجات زى ما أريد
**********
جاييك جايى لى عينيكى منها ما أحيد
ومنها نستمد الراحة ومنك نستفيد
ويتمدد فرحنا ويبقى عمرى انا كلو عيد
وفى حضنك أكيد للدنيا لون وطعم جديد

كمال صالح



ذكر عدد الرسائل : 48
الموقع (المدينة) : السعودية
العمل/الترفيه : ببيع تسالي
تاريخ التسجيل : 14/05/2009

القدار
القدار: 2

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح جلال في السبت 6 يونيو - 4:13

شكرا ساتي وساتي الآخر وعابر طريق للباصات البينيه دي . ونتمني ليكم وقت طيب وجميل . والقصيدة التالية هي:-
للشاعر خالد شقوري مســـافــة الســـــــكـة

كنت بقصِر المشوار لو عارف متين أرجع
كنت بحدد الميعاد وأبقى من الزمن أسرع
إلا مصيري في الأيام هي البتقول وأنا البسمع
وما لاقاني يوم في الدنيا زولاً حظو كان فاتو
***
مسافة السكة وأرجع ليك معايا الشوق وغُنواتو
أنا البهواك وقلبي عليك وأنا الزول البِحب زاتو
***
مسافة السكة مهما تطول برضي مصيري أرجع ليك
ألم حزن السنين الفات وأقيِّل في ظلال عينيك
ألمِّع بالحروف دنياي وأخاف أحزاني ترسى عليك
ألِِم باقي العُمر تحنان وأقول للناس حِكاياتو
***
ما يهِمك كلام الناس وحاتك إنتي ما ناسي
أنا البحسِب عشان ألقاك ثواني الفرقة وأنفاسي
وعارف لوعتك يا روح كيفن إنتي بتقاسي
وأعمل إيه مع الأيام مع قلبي وصباباتو
***
مراسيك وين عشان أرتاح وأعِوض قلبي عن صبرو
معاك بحصِد من الأفراح حصاد زولاً زرع عُمرو
أنا الراجيك ولي جِراح مُناي بي إلفتك يبرو
والآقيك في زمن نشوان تصُب للحب غماماتو

صالح جلال



ذكر عدد الرسائل : 84
الموقع (المدينة) : هجلیج
العمل/الترفيه : مهندس
تاريخ التسجيل : 15/02/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف ساتى محجوب يس في الأحد 7 يونيو - 16:55

قلب بالصح
محمد سفلة / محمد النصري




داما القلب البجرسو شوق ** اذا ما اختار سميرو بعاد
ولا القلب التبكي حبيبه ** لو غابت عن الميعاد
قلب بالصح دا ما القلب البجرسو شوق
************
قلب من قام صحاري الالفة كان يشقهن بالنوق
محكوم بسياج العفه فد يوم ما سرح مطلوق
شيال للتقيل مانحا لو ساق العمر ارقوق
ندي ورياد كريم واجواد الا من الضعف معتوق
****************
دا قلبي نبيل وكلو جمال ومابيحقد علي مخلوق
ومهما جرحو المحبوب وخلا قليبو كلو شقوق
كتوم من قام يضاحك غيرو صابر والجرح مفتوق
عليه اب يضحكوا الشمات وتجري دموعو روق فوق روق
*******************
قلب ما همو يقضي ايامو جنب الصابر المحروق
قلب مشغول بهم اكبر من اشواقو ورضى المعشوق
هم وطنا عشانو نزف دماهو على الارض ماروق
هم انسان قضايا كتار ما قادر عليها يحوق
*******************
حكيم يعرف متين يرتاح وينسي شقاهو يصفي يروق
ومتين يعكر يكون فيضان ويبقي علي الزرع خازوق
فشكرا ياحبيب الروح عليه مروادك المطبوق
انا ان حبيت بقدر زولي وان فارق بفوت بي زوق
*****************
الا بيبكي لما يشوف مابين الخلق في خلوق
ماخده طباعا من الغابه شايلي ضميرا ماشي السوق
وتاني بيبكي لما يشوف مابين الحقوق في حقوق
نزلت من سماها زلال وطارت من تحت لفوق
*****************
وداعا وما بقول بنساك وداعا القلب مخنوق
وداعا وفي الختام دنياك مناي وراي تسوي القوق
تمدلك السعاده ايدينا لفردوسا ليك تسوق
وسيبني اعيش قسمتي وراك باسم والكبد محروق
******************
قسم بالله رغم جراحي لسا عليك قلبي شفوق
قبال الزمان يفرقنا بوصيك والعتاب ملحوق
بخاف يا من رضيتلي معاك غصب اتمطق العميوق
بكرة تدور عليك الدنيا ومن كاسا سقيتني تضوق

ساتى محجوب يس



ذكر عدد الرسائل : 127
الموقع (المدينة) : الفاشر
العمل/الترفيه : مهندس
تاريخ التسجيل : 27/03/2009

القدار
القدار: 2

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح جلال في الثلاثاء 9 يونيو - 3:12

این انت صالح محمد خالد <عابر طریق > ساتی السید>
معروف انو الفاتح ابراهیم بشیر یمیل للشعر القصصی کثیر رغم تمیزه فی الغزلی لیک مثلا هذه الابیات>
الفاتح ابراهيم بشير
قبــــلة غُنـــاي


احترت كيفن اوصفك .. والله يا قبلة غناي
لو كان بحور الكون مداد بتجف قبل ما تنصفك

حاولت اكتب ليك واقول * واوصف ملامحك بالشعر
لكن حروفي تذوب عديل * قدام عيونك تنصهر
يا عايشة في دمي وغناي * يا ديدن الروح والفكر
خلدت اسمك بي حروف * قطرات دماي كانت حبر

يا غنوة في وتري الحزين * يا ضحكة في الزمن الصعب
يا واحة في عز الهجير * يا راحة من بعد التعب
يا نسمة هبت في الدغيش * عزفت علي وتر العصب
يا رحمة من رب العباد * مكبوبة فوق خلق الله كب

سافرت في عينيك سنين * زادي المعاي ابيات غنا
مكتوبة بي دمي الصبح * شلال من الهم والعنا
صورت احساسي الدفين * بي قافية ليك معنونة
بتقول بلا كلفة ورتوش * يا انتي يا الموت والفنا

احترت في وصفك انا * وحارت معاي كل الحروف
مرات بشوفك يا مناي * ياقوتة في قلبي الولوف
مرات بشوفك ضي امل * دبج خطاي رغم الظروف
مرات بشوفك جارية نيل * امواجو عانقت الجروف

صالح جلال



ذكر عدد الرسائل : 84
الموقع (المدينة) : هجلیج
العمل/الترفيه : مهندس
تاريخ التسجيل : 15/02/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف ساتى محجوب يس في الثلاثاء 23 يونيو - 20:41

ما بتخيَّل
الشاعر/عوض علي حامد
أنا ما بتخيَّل إنو تروحي وتسكني بين طيات الذكرى
وشايلة معاك في روحِك روحي

ما بتخيَّل أصبح باكر وألقاك مافي قُصاد عينيا
وكيف إتحمل فقد الدنيا الفيها أحلامي إترسمت ليّا
عُمرُو ما كان البعد مسافة وإلا الطيف كا ملَّ الجيَّه
وما بتتخيلي هزت قلبي لحظة طيفكِ ماشي عليًّا

ما بتخَّيل وين راح أمشي لمن ترحلي مني تروحي
كيفن يصبح ذكرى البينّا وسيل أشواقنا ولحظة بوحي
ما حأسيبكِ ترحلي وأبقى بين نيران أحزاني ونوحي
ولو لا حت لنا فرقة بقوللها لأ يا فرقة أرجوك لا تلوحي

أنا ما بتخيَّل إيه راح أبقى لما أعيش في الدنيا بِدونِك
وكان خليتكِ وين راح ألقى الكت بلقاهو يشع في عيونِك
أبقي معايا مودّة ورحمة يا الفي قلبي هواك وسكونِك
كوني في عوني أنا بي تحنانك شان بي شوقي أكون في عونِك

ولما الشوق كان جابك ليّا ما خيّبتَ أشواقِك فِيّا
وإتشربت إحساسك شهقة دون ما أحس بك إنتي هدية
ما صدقتِ أنا إني لقيتك أم وحبيبة وروح وأُخية
هم الفُرقة أنا كاتلني كيفن عاد بي هم الجيّة

ما بتخيّل ما بتخيّل

ساتى محجوب يس



ذكر عدد الرسائل : 127
الموقع (المدينة) : الفاشر
العمل/الترفيه : مهندس
تاريخ التسجيل : 27/03/2009

القدار
القدار: 2

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف ايوب سليمان محمد سليمان في الخميس 25 يونيو - 2:08

والله ياساتى بالغت فى اختيار الاغنيه فهى حد الدهشه رائعة محمد النصرى هذه
ارجو ان تمدنا بهذه الروائع اخى ساتى
لك تحياتى

ايوب سليمان محمد سليمان



ذكر عدد الرسائل : 24
الموقع (المدينة) : القدار
العمل/الترفيه : موظف بشركة النيل للبترول
تاريخ التسجيل : 16/06/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف ساتى محجوب يس في السبت 27 يونيو - 19:35

شكرا ايوب فى انتظارك عبر هذا البوست :وين انت ياصالح وصالح
ولكم




لا تنجع للشاعر الهرم (خالد شقوري)
يا الشايل شمسك في جواك خليها تبين للناس تطلع
يا النازع فرحة والدة هناك غير حس آهاتك ما بتسمع
***
يا الناسي اللبقة المفتوحة دي بلاك طوريتك ما بتقرع
المنجل في راس التمرة ناسيهو وامك ما بتطلع
الكتقة وقعت والحملان في اللوبي بقت تجري وترتع
والزير الفي بيت الضيفان حرمان لا نزّ ولا نقع
***
يا السبت عقابك وروحت وحيات عز بلدك لا تنجع
الشتلة تقولك لاتنجع الواطة تقولك لا تنجع
الحوض الما رفعت سرابو ينادي يقولك لا تنجع
الحبل الما تميت مسيرو يهاتي يقولك لا تنجع
والنيل الفي واطاتنا ترع بيقولك ازرع ولا تنجع
***
ماك فاكر يوم داير ترحل وابوك الحاج شايلو عصا
لا حيلو وقف طقش الابريق اندفق سال فوق المصلاة
قام بارى الحيطة واتوكل ويقوم فد مرة ومية يقع
ويقولك يا المبروك ارجع
***
ارجع يا زول ارجع غير ارضك عاد ما بتلقى بطاح
شن داير في بلداً والناس ما فيهن حاس وما فيها صباح
الليل الويل مليان اتراح الويل الليل مليان اتراح
بياعه يقول افراح افراح زي البيقول تفاح تفاح
***
مجلوبة الفرحة ومفروشة من ضحك الناس دايرين ارباح
لو كان في ايدن ملك الكون كان لمّو عبير الزهر الفاح
كان علمو نفس الزول العاش في سدر الليل داير يرتاح
كان حجزوا الغيم في واطاتو وكان آمسكين باعو الارواح
***
وين تلقى الفرحة وتتهنى في داراً ضيقي ومافي براح
جم ناساً من عين العطشان تخطف ومضات البرق اللاح
***
سايب اهلك ونخلك راحل قول وين ماشي ووين آصاح
الشمس النايري ابت تطلع النيل يا زول اصبح رحراح
الضل قصر ما غتى رويس ولداً ساكب عرق الكتاح
الواطة ابت تديك الخير ولا انت عليك ما هابي رياح
***
قولي وين ماشي ووين غاشي ولي شن سايب بلد الصلاح
النسمة ان جاتك بتجيك ملياني عبير عند الفياح
الموية ان داير تلقاها نقاعا واطيب من الراح
ان درت نغيم الموج تلقى وان درت كمان الطير صداح
***
الضحكة هناك من جوة الجوف الفرحة هناك ما فيها الخوف
الشقى ارحم في ضل النيم وبعيد من ناساً واقفي صفوف
جم ناس حبان تلقى المكسور مشيول في كتاف واحد مكفوف
الجن الاحمر فاقد الحيل في خلوة حاج الخير مكتوف
دكان الشيخ فوق الواطة كيمان كيمان ما فيهو رفوف

ساتى محجوب يس



ذكر عدد الرسائل : 127
الموقع (المدينة) : الفاشر
العمل/الترفيه : مهندس
تاريخ التسجيل : 27/03/2009

القدار
القدار: 2

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح جلال في الأحد 28 يونيو - 4:02

جنى امدرمان
للمبدع محمد سفله

نحن مانا لميم من عريب ناس فحم واقود ناس حطيب
نحن من اصل المجاذيب ناس ابل يعرفنا الوضيب
نحن ناس طنبور ناس دليب ناس سدارى عمم جلاليب
ناس تمور وقموح قواسيب خيرنا تشهدبو القساسيب
مافى بينا الراجل الضنيب الاضينى البسرق الجيب
مانا ناس ونسات فى المغيب نطق مع البنوت قرقريب
عزة الله الدارى بالغيب وتانى بى نبى الله الحبيب
نحن عند الوكرة ام لهيب سيفنا يأكل المو فى النصيب
الجانا منك كان جد غريب قولى فزع الناس شن يجيب
بلا شماتة ووجع قليب صون لسانك وكون زول اديب
اوعة تقرب وكر الدبيب
جنا امدرمان ابقى شوى شادى الحيل
شيل من ايدك المفدوعة عاج الفيل
خليهو الدلال للريل
ما بتعرف بلا التجميل
تعال فد مرة زورنا هناك عشان تعرف حضارة النيل
ناساً بالطوارى قسم يجسرو السيل
تعال شوف السواقى النايحة طول الليل
والتور البسوق ارقوق وتب مو فاضى فى الفتيل
يملأ عيون جداولنا ودموعنا تسيل
ولاد ترهاقا نحن هناك تراثنا اصيل
ناس بركاوى تن جريدو فادعو الشيل
اهل المنقة والمشرق مروق بالصفوف قنديل
اكلنا قمح وكلامنا سمح ويانا اهل حضارة النيل
وكت الحارة تتوتر وتسمع لى سيوفو صليل
تغنى مهيرة فوق الخيل
يتبل الركاب بالدم انين الخيل يقصو صهيل
جنانا بتلقى يملأ العين يزيد الكيل
ويسقى عدونا من شلاخنا نار الويل
ويبقى شلخ شوايقة اصيل
اصلو الخوف يمين مو هولنا الاعور نقولو عديل
نحن اولاد بعانخى وشبكة ابونا صبير
امنا ياها بت عبود صباح الخير
بناتنا يمين نعومة حرير
عويدن بان وغلاوة اكسير
وسمحات هن بلا منكير
حلات ايدن مع حبل الدلو الفى البير
كيف الحوش يرشن داجى ليهو الجير
دهينة الودكة فوق راسن تقطر بالشمس قطير
تسيل فوق الرحط تتدلا تملا عجاجى عاد للدير
نحن اهديل براك زورنا وتعال اعرف حضارة النيل
شن داير تقول يا نذار ..
بتسمع بالاسود فى الضيقة نحن اولاد على الكرار
اسأل كورتى عن تاريخنا عشان تحتار
وكت الباشا جانا هناك بلا انذار
مدرع وكان سلاحو النار
وكت الحارة ما بنعرف شى اسمو هظار
يمين لاقيناه بالفرار ..
واشعلنا المراكب نار ..
امانة يا جنى خسرلو خسار
ورجع لى بلدو شايل العار
نحن هاديل عشان تعرفنا يا البيقولو ليك نذار
صحيح لو قلته عننا اشو لا اسع نكوس التار
حليل الطابية يا امدرمان
حليل كررى وحليل ابوعنجة يا حمدان
حليل المهدى واسلافو اللى كانو زمان
حليل جيش الغبش يا هوان
جناكى الليلة يا امدرمان
فى جواى هز كيان
تعال شوف الغبش يا هوان
لا عرفو الماييج ضمة لافى دهان
الطاقية فوق الراس وبارمين عمة الدبلان
وعند الضيق امانى يا جنى امانى يا وليد امانى حنان
جنا امدرمان وليد ابو عاج
حصل يا وليد اكلت الكسرة من الصاج
نزل فى النيل تعوم راقد قفاك وفاج
حصل يا وليد نزل فوق ضهرك الكرباج
وجرب بالقرض تتداوى زى ما نحن لينا علاج
ما بتعرف بلا المكياج
واكلك يوت من الطوة بين كبدة وحمام ودجاج
جنا امدرمان هوى يا جنى
ما بتعرف بلا اكل الطوستى والبامبى
والبسبوسة والباسطة ام عجينا نى
بتعرف ترقص الجامايكا يا ابو شعرا مبرم طى
هوى يا جنى بتسمع بى بلاد الصى ؟
تعال فد مرة زورنا هناك عشان تعرف نحن ازى
نحن ايقاع دليب ينبح يشق الحى
وزغرودة فرح مصحوبة بالحمبى
وحس سوط العنج يصهل يفتق فوقنا جرحا نى
وفوق جرحا جديد يا دوب تخلف الكى
ودمنا يروى أرضنا رى
وحس بنوتنا مع الزغرود يسون سى
نحن اها ديل ايانا جنات بلاد الصى
جنا امدرمان شوف غباتو وجنو
مو عارف الشوايقة اظنو
الذرة والقمح زارعنو
الميرتق بنشرب منو
السيف والدرق راكزنو
للغارة الحصان ساعنو
والاسد البحجر الغابة نافش شاربو شافعنا البيرضع دابو يقلع سنو
اخير يا جنى لا تفلع وبيتكم من قزاز ساونو

صالح جلال



ذكر عدد الرسائل : 84
الموقع (المدينة) : هجلیج
العمل/الترفيه : مهندس
تاريخ التسجيل : 15/02/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح جلال في الأحد 28 يونيو - 4:06

بين زنجي وعرب كان الأصل سوداني
وبين كل الشعوب زان الأدب رباني

عِن حوبة الوطن دائماً تبين همتنا
سودانية سود الكل يهاب شبكتنا
أرزم يا سلاح ساحات غناك اللتنا
وفي الوكرة أم لهيب توزن قبيلة مرتنا

وخليها الرجال المن جفير السيف
مرقت للكتال وشايلاه ضل في الصيف
إتنين نعرفن وبيهن نتم الكيف
كتل المفتري والتاني كرم الضيف

ولينا الحق نقيف وسط الشعوب نتفشر
وفوق الطول نطول والطول يشوفنا ويقصر
مين الزيّنا كل ما إنذكر إتشكر
ومين دلّ القمر غيرنا ومكانو إتحكر

المجد إن وقف بلقانا ساسو وراسو
والعز من قديم بينا إنفتح كراسو
من قمنا الكرم بيناتنا داير كاسو
العدو والصليح من توبنا يلقى مقاسو

وسرنا كان صفينا الزول بنلحسو كلو
وعاقلنا إن عكر مجنون يكاتل ضلو
الكايس العدل عوجو بنمسكو نحلو
والكايس العوج قبال نكتلو نزلو

صالح جلال



ذكر عدد الرسائل : 84
الموقع (المدينة) : هجلیج
العمل/الترفيه : مهندس
تاريخ التسجيل : 15/02/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح جلال في الجمعة 14 أغسطس - 1:27

مشــاوير الفــرح ل عبدالله محمد خیر

غريبة ما بكت العيون في يوما داك ..!
لما انكتم نفس القليب
الكان بشيل هوا من هواك
***
تاهت خطاوي عليك من قبل الوصول
وقفت هناك .....
***
ورثت من الزمن الصبر
ممهوله ما صبقت خطاك
مع إنو يا القمر الملجلج في سماك
أطول مشاوير الفرح كانت معاك
***
مبهورة ما بكت العيون
مسرورة للفرح الملاك
معصورة بالحزن الدفين
مغمورة بي فرحة لقاك
مسحورة بالحسن الرزين
مأمورة تنظر لي بهاك
مكسورة تخفيه الحنين
مجبورة ما رادت سواك
محصوره في الوجه الحسين
ياصورة أجمل من ملاك
***
وغريبة إني وقف أمام عينيك
وما إنهارت قواي !!!
اتجمعت كل المعاني السامية
ديك اللحظة واتحدت معاي
غاية رجاي .....
قيمة وفاي .....
معني غناي .....
وتمن شقاي .....
يامن وهبتك كل ما مضي
من شبابي ومن صباي
أنا هل ظلمتك ؟
أم ظلمتني ؟
لما سبتك لي سواي
***
لي حكمة ما بكت العيون
الشاخصه في وجهاً جميل
حافـــــظ نــــــداي
والليلة كاسيهو الشحوب
في يوم زفاف خاصم هواي
كان صاغيه لي صمت العيون
الكان بردد يا ضناي

صالح جلال



ذكر عدد الرسائل : 84
الموقع (المدينة) : هجلیج
العمل/الترفيه : مهندس
تاريخ التسجيل : 15/02/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف شنان عبد الرحمن في الإثنين 17 أغسطس - 20:07

البوست دا مع أنو اجمل بوست والشباب ساتي وصالح وكمال صالح مامقصرين فيه يختاروا اجمل القصائد .. لكن مافيه تعليق من الاخوة الاعضاء . انا شخصيا ما قاعد اعلق لاني مستحي من نفسي أقول شنو ؟ لكن تأكدوا أمثالي كتيرين من شدة الاعجاب بنكتفي بالاستمتاع والصمت لكن نهمس سراً ونقول الشباب ديل الله يديهم العافية .
لكم كل الود .

شنان عبد الرحمن



ذكر عدد الرسائل : 626
الموقع (المدينة) : السعودية / الريلض
تاريخ التسجيل : 02/02/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح جلال في الثلاثاء 18 أغسطس - 3:34

الاخ شنان لک التحیه وشکرا علی الکلام الطیب ده ونوعدک بالمزید انشاالله
لک ودی
واهدی لکم جمیعا
بلاد الشوق
الشاعر : خالد الباشا


مشيت بعدك بلاد الشوق .. غشيت في سكتي الأطلال
لقيتك لسة في الخاطر .. وفي مرقة شمس باكر ..
ملان بيك طول حياتنا جمال
رسومات روعتك تذكار .. علي ابواب بيوت الحي ..
محل تاوق .. لقيتك شوق .. مشتت في الشوارع ضي ..
اماسينا البتسهر بيك .. نجيماتنا البتشهد لي ..
وراك لاجفن الدمعات .. ولا اتلاقن رموش عيني ..
اونس بيك نصايص الليل .. احجيك دندنة وموال ..
سألت عليك براي النيل .. تميراتنا وعصيفير الهوى الصداح ..
لقيتك في عيون الناس .. حنين ساكن القلوب مرتاح ..
بتطلع من حكاياتنا .. وخيالاتنا .. بعيد شايفك رهاب رحراح ..
انادي عليك شموس تمرق من الواطه .. قلوب بيضا .. شعاع وصباح ..
يبق نورك مع الفجاج .. علي النخل العزيز وطوال ..
اتاريك إنت كلنا بيك .. بلاك نحن وبيوتنا شجن ..
تموت سيرة الفرح نبكيك .. نتوه مانلقى لينا وطن ..
جناينا وضرانا الفوق .. قمارينا وحسيس القوق ..
رحل كل البلد وياك .. نزل جواك .. حنين وسكن ..
وأنا ( الكاتلني ) من يومداك .. علي عينيك عيوني بكن ..
اقالد ذكرتك جواي .. وأعيش باقي العمر رحال ..
سلامات وين نزل محياك ... تحياتنا وأمانينا ..
اكيد باكر نجي ونلقاك ... قمر باهر أماسينا ..
تبل شوق القلوب ترتاح .. علي نمك غناوينا ..
(لدايات) شايك الرماي .. مزاجات قهوتك جواي ..
احاسيس فيني تتحكر .. جمال نيلنا وعصارينا ..
نضاريك في العيون تظهر .. بريق لهفة ودمع هطال ..

صالح جلال



ذكر عدد الرسائل : 84
الموقع (المدينة) : هجلیج
العمل/الترفيه : مهندس
تاريخ التسجيل : 15/02/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح جلال في الجمعة 16 أكتوبر - 2:24

جسيمي الناحل ((تعد من اجمل القصائد ))
يا ضارب جسيمي الناحل هديت بي قساوتك حيلو
شلتا جنازتي وانت القاتل ظلمك ما في زيو مثيلو
الصرح المشيد عالى هديتو وبقيت تبكيلو
ودرتا الحنين الغالي كانوا اشجارو راميه ضليو
اظلم لا يهمك حالي لو كان عمري عندك شيلو
شديت في المسافه رحالى الخليتو الله كفيلو
الشر يا قليبي الباكي ابعد من بعيد غنيلو
قبلي يا مشاعري وراكى درب الريد حاربي دليلو
دفقي يا عيوني تراكي فجرك جاكي سايق ليلو
وارحلي يا سنيني براكي والحقي في عميري رحيلو
الصبر الطويل مديتو واتقطع معاك حبيلو
النغم الحزين غنيتو وانتى معاي صفقتيلو
الهم من وراك لاويتو والأسى ياما جاكى زميلو
لو ينفع بكايا بكيتو بينك ما رجاني عديلو
قلبك لي دائما قاسي رغم العزه كنتا زليلو
فقدني الهناء واحساسي ما قررتا تاني اجيلو
فتر في دواخلي حماسي لو سمع الزمن بشكيلو
درتا كتما حر انفاسي وين بالله قلبي تطيلو
شوقك لليالي بسيبو بتحمل اذاهو وويلو
طال ما قليبي خانو حبيبو فتش من وراهو بديلو
والريد الحرقني لهيبو لو سيف عاد كفاني صليبو
الحق كان يقيني دريبو لا يرجعلى لا بمشلو
في الأخر بدور اوصيك فرعك لا يغرك ميلو
ما تتغشي في عينيك محياك كل يوم عن نيلو
انسجي من ورود خديكى للزمن العبوس اكليلو
والباقي المفضل فيك لو شداك انتى ارخيلو.

صالح جلال



ذكر عدد الرسائل : 84
الموقع (المدينة) : هجلیج
العمل/الترفيه : مهندس
تاريخ التسجيل : 15/02/2009

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف عادل حسن حمد في الجمعة 6 نوفمبر - 8:47

شنان عبد الرحمن كتب:البوست دا مع أنو اجمل بوست والشباب ساتي وصالح وكمال صالح مامقصرين فيه يختاروا اجمل القصائد .. لكن مافيه تعليق من الاخوة الاعضاء . انا شخصيا ما قاعد اعلق لاني مستحي من نفسي أقول شنو ؟ لكن تأكدوا أمثالي كتيرين من شدة الاعجاب بنكتفي بالاستمتاع والصمت لكن نهمس سراً ونقول الشباب ديل الله يديهم العافية .
لكم كل الود .

أنتوا شايلين حسي عادل خرج عادل لم يعد عادل أوصافوا
صاحب المكان دا وينوا ؟؟؟؟

علاء الدين عبد الرحيم
جن الريد



احمد زول معروف بالطيبة حسن اخلاقه عليها اتربى

تكفى شهادة ناس الحلة انه خلوق وخجول ومربى

مهذب رغم حداثة سنه لبس تهذيب واصالة وهيبة

ادى الناس فى الحب وادوه حسن الظن بيناتهن شب

خشت فجأة اميمة حياته وصارت بينه وبينا محبة

قلبه اختارها عشان معروفة زولة حنينة وراقية وطيبة

دسو الريد فى السر بيناتن خلو حبيس ودفين ومخبا

وكيف تنضارى متل اشواقهم وليه زى ريدهم يوم يتخبا

بعد اعوام وصلتلو رسالة جواب مليان تقيل ومعبا

قبال يفتحو عرف الراسل وباينة وظاهرة رسايل وهبة

اخوه الليهو زمن متغرب تسعة سنين قضاهن غربة

مرسل ليه تذاكر وفيزا دايرو يجيه هناك فى طيبة

طار فى الاول احمد فرحة كلم كل الناس بالصحبة

ولما اذكر اميمة حبيبته فجأة انتابه شعور بالهيبة

لكن قرر انه يسافر سرعة يعود ويتم الخطبة

لأنه الغربة طريقا قصير وفيها يهون تحقيق الرغبة

جاته اميمة حزينة توادعه جاته تجفف دمعه الكبا

جاته توصى عشان مايقوا و ما ينساها هناك فى الغربة

جاته تطمنه انه حيفضل ريدا الخالد مهما غبا

وحافظة عهود الريدة البينهم ومهما كان حا يظلوا احبة

ادته مصحف عشان يرعاه من العين والهم والكربة

لبسا عهد الريد فى جيدا عقد ممهور بصورة الكعبة

قامو اتوادعو زين واتباكو فات خلاها وحيدة وخبا

وسافر شال همو واحزانو بعد ايام فى المملكة صب

لاقو الناس يا زول كيف حالك بالاحضان قام سالم وهبة

قالو نصاح ناس امى وابوى مشتاقين راجينلك اوبة

قالو احمد سافر يا وهبة غير جوك وروق حبة

امك ياخ تلاهى عليك لا خالالا ضريح لا قبة

السودان مشتاقلك كله ضفاف ورمال وسواقى وتربة

وحتى النيل فرحان راجيك تجى وتنهل من مويته العذبة

بعد ايام كان وهبة هناك بين اصحاب واهل واحبة

فى حضن امه الطول منه فى حيشانه الواسعة الرحبة

قالتلو امه اخوانك كبروا ومافضل لنا زول يتربى

بس فضل لى اشوفو جديدك وكتين لسع حية وطيبة

اختارولو بنية سميحى تشع حيوية ورونق و هيبة

اديبة وراقية وكلها عفة وبرضو اهل وقراب فى الحسبة

يوم العرس الحى صباحى الفرح مطبوق والناس منطربة

وشاقى الليل صوت كم زغرودة وحس طمبور ودليبن رب

الا فى واحدة حزينة وباكية سايلة دموعا دوام منسكبة

خلف دموعا سؤال بيحير وفى آهاتا اسرار محتجبة

وقالوا الناس دى دموع الفرحة وغيرها شنو الحايكون السبة

بعد ايام ساق وهبة عروسه ساقا رجع لبلد الغربة

شايلو حنين لكل اصحابو ولاحمد اخوه اشواق ملتهبة

وصل الباب كورك يا احمد فتح احمد بلهفة ورغبة

شاف قدامو الما متوقع هم الكون فوق راسو انصب

شاف السلسل عهد الريدة نفس السلسل وصورة الكعبة

شاف قدامو اميمة حبيبته وكانت قاسية وقاضية الضربة

شاف احلامو تضيع قدامو بعد ما كانت منه قريبة

كانت لحظة تفيض بالدهشة شاف الدنيا كأنها كذبة

كورك اميمةاميمة اميمة صنقع ودّر دنقر وغبى

وجن احمد فى نفس اللحظة وجن الريد ما اظن ينطبة

_________________
أيا من ليس لي منه مُجير بعفوك من عذابك أستجيرُ
أنا العبد المُقّرّ بكلّ ذنب وأنت السيّد المولى الغفورُ
فإن عذّبتني فبسوء فعلي وإن تغفر فأنت به جديرُ
أفرّ إليك منك وأين إلاّ إليك يفرّ منك المستجيرُ

عادل حسن حمد



ذكر عدد الرسائل : 361
الموقع (المدينة) : المملكة العربية السعودية - جدة
تاريخ التسجيل : 30/10/2008

القدار
القدار: GHADAR

الرجوع الى أعلى الصفحة اذهب الى الأسفل

رد: الشعر الشايقي للاضافه والتعليق

مُساهمة من طرف صالح جلال في السبت 2 يناير - 3:39

دون العيون
إبراهيم أبنعوف


أنا أخترت من بين العيون ياغالية عينيك أعشقا
وأخترت شوفتك كل يوم لو حتى شوفتك أسرقا
لكني مالاقي الفرح لا في البعاد ولا في اللقاء
وما من هواك .. أنا أصلي عاد خلقوني من طين الشقاء
مديت كتير حبل الصبر لامن فقدت أنا أولو
ومن غير صبر بقدر أساي ياغالية شانك بحملو
بس لو سمحت ومرة بس داير قليبك أسالو
حافظ معزّتو زي زمان ولا الحصل كان بدلو ؟
والله يا نور العيون أصعب سفر سفر الأمل
تلقاك تعاين في الهدف .. وما داري أنت متين تصل
كل الدروب جربتها وسافرت فيها عشان أصل
وفي كل مره الف وأعود من تاني لي نفس المحل
سيبي العواطف ديك بعيد .. وأنسي ريدك وقولي لي
أيه الفرق لو زول زرع أمالوا في أخصب ودّي
والتاني روح للبعيد وأختارلوا يا محبوبة صيّ
حايحصد الأول أكيد والثاني زي حالتي العلي
ولو جيتي تسألي عن هواي بالله أسالي عن هواك
تلقي الجواب نفس الجواب ماقلبي يادنياي معاك
أرجوك أوعي تفكري أنو قلبي يصبح لسواك
لكن لو فقد العشم يمكن أقولوا خلاص كفاك
أنا عارف المواجع لي براي أنا طول سنيني أبكي وأنوح
فقدت أحساس الألم ياروحي من كُتر الجروح
ومابلقي عارف فرحتي غير فيك يا أم وجهاً صبوح
وكفاية كل القلتو ليك .. أنا تاني مابقدر ابوح

صالح جلال



ذكر عدد الرسائل : 84
الموقع (المدينة) : هجلیج
العمل/الترفيه : مهندس
تاريخ التسجيل : 15/02/2009

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى