منتديات القدار
نرحب بك في منتديـــــــــــات القدارالغرة القدار المغرة
@@@@@@@@@@@@@@@@


تعـــالو مـحـــل مـا الـمـحـنـة أيــــادي تقــطـر ســــــلام
سـمـاحـــة الـحـيـاة فــــوق أهـلـنا القدار يقــرقـر وئــام
تـدخـلــــوا وتقعـــــــــــدو في ســــــــــــــــــــــلام
بـســاط أحـمـدي كــم يـشـيلـنـا قـدارنا تـمــــام التمـــام
نتشــرف بتسجـيـــلك في منتــدي القــدار

قبقبة والدهب

استعرض الموضوع السابق استعرض الموضوع التالي اذهب الى الأسفل

قبقبة والدهب

مُساهمة من طرف حسن موسى في الأربعاء 12 مايو - 21:17

هذه القصيدة من القاء الشاعر نزار سراج احمد الحاج من منطقة القمبرات

يا الدهب النفيس الباهي لونك وغالي
شارد فكري فوقك وفيك سارح بالي
جيتك والعشم فوقك تتم آمالي
يا خي اديني منك بالحجار وتسالي

قبقبة نفسي ازورها وليها ناوي القومة
وبي سبب الدهب عينيا جافت نومة
يا الله الكريم ادينا بكسي وقومة
واقهر للعوارض وقبضة الحيكومة

البكسي ان قبض حتما مصيبتو مصيبة
حلمك ينتهي وعيشتك بي تبقى عصيبة
بي صادرو الجهاز وعليك يفرضو ضريبة
تبكي عليه وتحن زي الفقدت حبيبة

قبقبة ليها ماشي حتى بي كرعيا
اجمل من اقامة وشقة في المنشية
يا الدهب المتمر ليك مني تحية
يا الله الكريم اطنان كليك وخلية



مفقود السنين الليلة جات اخبارو
راجع بالجهاز الليلة عاد لي دارو
خلاهو السفر شغلو الدهب واخبارو
راجع للخلا وعدسو وكتر وغبارو

الحلّال فضت عدمت شبابها رجالا
بي جيب الدهب صبحت نفوس شغالها
سافرو قبقبة وقصدو السيوح وجبالا
والبيت الكبير الليلة حارسو حتالة

تسرح بالجهاز وتمني نفسك كيلو
تمسح بالارض بي فد اشارة تشيلو
وان حظك صعب واتمادى في بهديلو
تلعن ابو الدهب لي ابو اليجي ويمشيلو

مزعج يا آب كدر صوتك غراب إن زمه
فالح في الحديد فوق الدهب ما نمه
طاط ما طاط وكورك وتاني ما بهتمه
انعل أبو صناعتك وما كذب من سمه



والداير الدهب يقع الجهاز الجيبي
أفضل مكتشف ياهو البيطفي لهيبي
يا رب العباد أتمنى بيهو تنغيبي
والقا لي خلية تزيد علي ترطيبي

قبقبة مرة قاسية وإلا مابتتملا
فيها دهب يحير لا كمل لا قلا
تزهج منها وترجع تجي وتتدلا
زي تمر الفكي وباقة عسل عوض الله

والعجب العجيب العيشه فيها تحير
الوش بالوسخ بصبح دشن متغير
أحلام المنام أحلاها تصبح نير
احلم تستحمى ولي اللبستو تغير

آ حليل اللحوم البدمع مرشوشه
فارقنا النعيم ومشينا دار الدوشه
ناكل في السخينة قرشنا لي قرقوشه
قرقوشاً قسم يجرح حشى الحنكوشه


فيها حقيقة مرة بقولا من جوايا
لومك في نهارك وشمسك الشوايا
لومك في سمومك ودا البيهد قوايا
وفي العدس البمحن والبجيب لوايا

وإن حظك سمح حتماً خليه غليده
تفرح وتنبسط روحك تزيد تنشيده
وإن حظك كعب ما تلقى فيها حديده
ترجع بالزعل حمى وعدم توريده

يا رب العباد أرزق جميع من زاره
يركب ليلى علوي ويبني بيتو عماره
في مسك الختام انا ودملوك الساره
ودالمك سراج إن قفه مابتجاره


حسن موسى



ذكر عدد الرسائل : 405
الموقع (المدينة) : السعودية
تاريخ التسجيل : 12/02/2009

القدار
القدار: 2

الرجوع الى أعلى الصفحة اذهب الى الأسفل

رد: قبقبة والدهب

مُساهمة من طرف رضوان جودة في الأربعاء 12 مايو - 22:36

مشكور الاخ حسن على القبقبة الجميل يديك العافية
نحن كان دايرنك تزور محل الدهب عشان تدنا الحقيقة
الخفية فرصة زيارتك السودان لاكين المره الجايى
إن شاء الله متعك الله بالصحة والعافية

رضوان جودة



ذكر عدد الرسائل : 189
الموقع (المدينة) : بيروت
العمل/الترفيه : موظف
تاريخ التسجيل : 26/12/2009

الرجوع الى أعلى الصفحة اذهب الى الأسفل

رد: قبقبة والدهب

مُساهمة من طرف حسن موسى في الخميس 13 مايو - 16:01

رضوان جودة كتب:مشكور الاخ حسن على القبقبة الجميل يديك العافية
نحن كان دايرنك تزور محل الدهب عشان تدنا الحقيقة
الخفية فرصة زيارتك السودان لاكين المره الجايى
إن شاء الله متعك الله بالصحة والعافية

أشكرك ع المرور ياغالى

هو للمرة الجاية انت قاعد هناك تسو شنو
الحقيقة يكون عندك جهاز جبى وتضرب الخلا وتكون معاك رفقة سمحة
وشرطا تكون حافظ ليك كم نمة كدا
صاحبك حسين مشى قبل اسبوع وختى اصبعوا فى اضانو وقال
ياجبنا مالا فرح الراجيانا ***** ويا اتكندكت واتفرش البرش لبكانا

حسن موسى



ذكر عدد الرسائل : 405
الموقع (المدينة) : السعودية
تاريخ التسجيل : 12/02/2009

القدار
القدار: 2

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى